عندما تزور الاردن ستجد كل هذا

الدليل السياحي للأردن


١- كل واحد بتقابله بحكيلك انه اله ابن عم واصل بالحكومه
٢- كل مصعد كهربائي اله رائحه سامه
٣- كل واحد بتشوفه بشتكي
٤- معظم البنات شبه بعض
٥- معظم البنات بلبسوا زي بعض
٦- معظم البنات بلفوا وبدوروا
٧- كل واحد بتشوفه بحكيلك انه جده اول واحد اشترى مرسيدس بالبلد
٨- كل واحد بتشوفه بحكيلك انه كان غني بزمناته
٩- ٩٠٪ قدموا او بدهم يقدموا على جرين كارد
١٠- كل الناس بتبحلق فيك بدون اي سبب محدد
١١- الشيك المؤجل صرفه لسنه يعتبر (كاش)
١٢- ما حدا بعرف يحكي انجليزي صحيح بس بشكل او بأخر ما حدا برضى يحكي الا انجليزي!!!!
١٣- كل واحد عنده قريب عايش بشيكاغو
١٤- بين كل سياره وسياره بتشوف بي ام دبليو موديل ١٩٨٠ (زعره)
١٥- حراس الديسكوات برحبوا فيك بكلمة (كوبلز......... بس)
١٦- محلات المواد الغدائيه بتبيع مزيل عرق!!!
١٧- بتشوف حادث سير كل كم كيلومتر
١٨- ممكن تشوف مية شخص متجمعين على بنت حلوه
١٩- كل واحد بحاول يحكي انجليزي بحكي كلمة (يعني) بعد كل كلمه
٢٠- الواسطه هي حل لكل مشاكلك
٢١- معظم اسماء العوائل بتنتهي ب(ات) او ب (هه)
٢٢- كل واحد بتشوفه بحكيلك انا مدير عام ... بس مدير على شو الله اعلم
٢٣- كل واحد عنده مشكله مع البنك
٢٤- ازا كنت رايح على امريكا... حط في بالك انه ١٠٠ واحد راح يتصل فيك عشان يبعت معك شنطه لقرابته
٢٥- بس تدخل مصلحه حكوميه بتتفاجأ انه الكل قرابة الكل
٢٦- الناس لما تحب توقف طابور... بتقدر تشوف الناس بس صعب تشوف الطابور
٢٧- في وسط البلد... كل واحد بمر جنبك راح يخلعك كتف لأنك لابس غير
٢٨- بكل زاويه بتلاقيلك خمس او ست اشخاص متجمعين
٢٩- البطاله ٦٠٪
٣٠- ازا سألت حدا من وين شاري هاللبسه.... راح يحكيلك : شارع مكه (الباله)
٣١- الساعه سبعة الصبح بتشوف كل الناس ماشيه وحامله صحون حمص وفول
٣٢- بتشوف شبين بتطاوشوا على بنت على اساس انه صاحبتهم ... بس البنت ما بتعرفهم الأتنين
٣٣- كل الناس بتطلع رحات على الغور
٣٤- الشباب عاملين تاتوو على دراعاتهم ( غدار يا زمن) او ( بحبك يما)
٣٥- على الاشاره الناس بتزمرلك قبل ما تصير الاشاره خضراء
٣٦- اعظم اختراع اردني: موس ابو سبع طقات
٣٧- اشهر انواع الادمان هي: شم التنر
٣٨- الزباله بتكون بره الحاويات... لانه الحاويات للبسس بس
٣٩- ازا رحت على مستشفى البشير.. راح تعرف شو يعني ( سلخانه)
٤٠- ازا كنت بالخدمة العسكريه مسموحلك ب ٣٥ طلقه بالسنه ... ازا حبيت اكتر بتشتري على حسابك
٤١- التحية المتداوله : أيش يا ابو الشباب!!!!!
٤٢- ازا كانت الدنيا حر... بدل الغور بتروح على الساحه الهاشميه
٤٣- الشخص اللي يقوم بتفتيشك على بوابة المطار... بحكيلك: تراك حليوه
٤٤- لك حرية الاختيار بأن تطلب (تشيز برجر) بدون جبنة !!!!!!!!!
٤٥_ معظم دخل التلفزيون الاردني من اعلانات مركز ضراغمه التجاري ( قومي معي هنيه ... وين وين....)
٤٦- كل يوم هناك حوادث انفجارات لأسطوانات الغاز... السبب انه يتم فحص تهريب الغاز عن طريق الولاعه!!!!!
٤٧- بتروح على صلاة الجمعة بكندره جديده .... وبتروح بزنوبه
٤٨- عشان تصدق شهادة عليك ان تقوم بجوله مكوكيه بحثا عن ١٠٠ توقيع وطابع بريد
٤٩- بتلف على كل محلات البلد عشان صرافة ١٠ دنانير و ما بتلاقي
٥٠- مطار عمان الدولي بسكر الساعه ١٠ ليلا !!!!!!!!
٥١- ازا كنت حابب تشوف حالك زمان كيف شكلك.... روح على التعبئه والتجنيد ... عندهم كل صورك بالاضباره
٥٢- ازا بدك تخلص من مرتك... وديها على البحر الميت
٥٣- بتشوف كندره صغيره معلقه على كل سلك كهرباء
٥٤- كل مراكز التسوق : للعائلات فقط!!!!!
٥٥- القوات الخاصه الاردنيه (قوات الباديه) مسلحين بقنوات
٥٦- الشعب الاردني يعتقد ان حرس الباديه بتقدر على قوات المارينز الامريكيه
٥٧- الكل بدخن بس ماحدا بشتري دخان (شغل سلبطه)
٥٨- تعريف النجاح بالأردن: هو ان تفوز على نسيبك بلعبة طرنيب
٥٩- داقق على سنانك: هو ان تفوز بلعية تريكس بعد ما تفوز بلعبة طرنيب
٦٠- من السهل ان تتنقل بالأردن دون مرشد سياحي لأنه لا يوجد طريق سريع الا عمان-العقبه
٦١- الخلوي يحمل بالجهه اليسرى من الوسط ليوازن الميداليه الموضوعه في الجهه اليمنى
٦٢- الشعب الاردني الشعب الوحيد اللي شاف صدام حسين على القمر بدون منظار
٦٣- الاردن الدوله العربيه الوحيده ....العطله الاسبوعيه: جمعه وسبت !!!!
٦٤- ازا الشباب حابه تشوف صبايا بروحوا على عمان الغربيه
٦٥- ازا زرت حدا... بسألك شو تشرب... وببعت الولد الصغير يشتريلك من الدكانه

يا له من دليل سياحي أخي مهند

هل أنت متأكد أنه في الأردن فقط ؟؟

أراهنك أن كل بلد عربي فيه هذا الدليل السياحي المتنيل على عينه

تقبل الود

أخوكم د. جمال

هل تصدق يا أخي جمال حين كنت ابعث بهذه الرسالة لكل صديق لي في الأردن كان يرد بنفس الرد
بالرغم من أن البعض سيظنها ساخرة لكنها الحقيقة مئة بالمئة
صدقني لم يكن فيها 1% من التبلي على المجتمع
أنا أعيشه وارى بعيني كل حقائقه
ربما لاني لم ازر مجتمعات عربية اخرى لم اقارن
لكن هذه حقائق
لان الحقيقة أن واقعنا جدا ساخر

اخ مهند هذا الواقع لا يقتصر فقط على المجتمع الاردني وسبقني لذلك الاخ د. جمال لذلك ولو انها تزداد او تنقص او تتغير الوانها واشكالها من بلد الى اخر
وانا منذ سنتين عندما سافرت اخر مرة وزرت فيها الاردن وسوريا ولبنان ما عدا فلسطين للاسف !!!!!

كنت اعمل في اليوم اكثر من عشر مشاكل على تلك الظواهر السلبية والتي كنت اراها بعين الحزن والاسى وليس نوعا من التكبر على هذه الشعوب ولا لاني اصبحت اوروبية ولا يعجبني العجب ولكن بسبب حزني على حال هذا العالم الاسلامي الذي يعمل بوجوهره في بلاد الغرب كافة ونحن نقلد القشور فقط

واذكر هنا حادثة حصلت في طريقنا من بيروت الى دمشق
كنا قد اكلنا في الطريق من دمشق لبيروت مناقيش طيبة كتير واردنا ان ناكل مثلها في طريق العودة ولكن السائق قرر من عنده ان المطعم الاخر افضل لانه صاحبه ومتفق معه على زبائن فطعمانا على كيفه سندويشات لبنه ومرتديلا
يلى بعين الله خلينا ساكتين بدنا نرجع نسافر كمان مرة احسن ما يزعلوا منا

ههههههههههههههههههه

الله يقدر لك يا مهند!!!!!!!!!

فرطني من الضحك

بالفعل شر البلية ما يضحك.

لما رحت على احج من نابلس لعمان

اعطوني نصائح لاني اول مرة في حياتي بترك نابلس

اوعه ! دير بالك

الشرطي على الحدود .. مخابرات

سواق التاكسي .. مخابرات

بياع السحلب .. مخابرات

نص زباين مقهى السينترال .. مخابرات

اذا سألوك عن جنسيتك قول لهم انك أردني مش فلسطيني

دير بالك من ازمة الفراطة

وووووووووو

شكرا اخي فقد بسطني

الله يعزك ويخليك

(ان شاء الله ما تكون من المخابرات يا مهند)

اما انا؟

منين يا حسرة ! أنا على باب الله

سلام

عبدالوهاب القطابنه

الاخ عبد الوهاب القطب

لعلك بحاجة للضحك اكثر فلماذا لاتقرأ ذكريات رحلة في وطن عربي

اسفة على الحشرية وتقل الدم

الاخ عبد الوهاب القطب

لعلك بحاجة للضحك اكثر فلماذا لاتقرأ ذكريات رحلة في وطن عربي

اسفة على الحشرية وتقل الدم

حياك ربي ورعاك اختي أم ياسمين

انت على الراس والعين وما في حشرية

كلنا في الهم غربُ

أما فيما قلت أدناه:

(
واذكر هنا حادثة حصلت في طريقنا من بيروت الى دمشق
كنا قد اكلنا في الطريق من دمشق لبيروت مناقيش طيبة كتير واردنا ان ناكل مثلها في طريق العودة ولكن السائق قرر من عنده ان المطعم الاخر افضل لانه صاحبه ومتفق معه على زبائن فطعمانا على كيفه سندويشات لبنه ومرتديلا
يلى بعين الله خلينا ساكتين بدنا نرجع نسافر كمان مرة احسن ما يزعلوا منا )


فاروي لك ما حصل معي وزوجتي وهي امريكية وابني وبنتي

فقد اخذنا تاكسي من نص البلد بنابلس الى المساكن الشعبية لزيارة اختي هناك واخذنا شارع عمان

وفي نص شارع عمان وقّف السائق التاكسي وطفا الموتور وتركنا احنا الاربعة في الانتظار

لانه الاخ الكريم قرر ان يشتري بندوره مجرّحه من احدى الباعة المتجولين على العربات.

وطبعا مرتي التخمت وسألتني شو المشكلة بس حكيتلها كلنا فرطنا من الضحك.

وبعديها رجع شغل السيارة وضلوا ماشي بدون اعتذار او اي كلام.

بس كانت ايام حلوه والله.

ان شاء الله ربنا يكتب لنا ونزور فلسطين عن قريب.

انا مشتاق والله .كتييييييييير

يالله تسلموا جميعكم

(على فكره البندورة المجرّحه مش من القصف)

عبدالوهاب القطب