قصيدة : مخطوفة ليه تاني ؟ !

مخطوفة ليه تاني ؟ !
اشتقت لك موووت ..
اشتقت لهدوئك
تثوري ما تثوري ..
تتفكي عن طوقك
تتغطي بالدخان ..
تملي السما ألوان
مخنوقة في شروقك
……………
اشتقت لرجوعك ..
وأكره أوي خضوعك
أكره ساعات الظلم ..
ولو متنا من جوعك
الحزن يملا الصوت .
عشق الشباب الموت
والصرخة في ضلوعك
……………
شايفك في ليل الحزانى
و سكة المجهول
مين اللي فيكى اشترانا
و خلا ليلنا يطول
مين اللي دخل عِدانا
اللي سبوا صحب رسول
مين اللي غير حياتنا
عشان يعيش مسؤول
قال إيه بقالك حبيب ؟
و أنا اللي بس عزول !!!
………………
مين اللي عشق الزعامة
وشاف في نفسه زعيم
وبص لينا بهايم
نعشق البرسيم
نموت قباله و يشخط
بصباع في عينا غشيم
فاكرنا حبة عبيد
و محتاجين تقويم
…………
ملعون أبوكي لو ..
ما رجعتليش تاني
أنا اللي شارب المر
و متكسرة سناني
و أنا اللي جواك حر ..
و هو جِهْ أناني
خطفك في ليل الحزن
و بدلوه مكاني
مشاعر د. هاني أبوالفتوح
الجمعه 8 فبراير 2013

رائع دكتور هانى فى احزانك وحرمانك واشتياقك ولقائك
كلمات تعانق فيافى القلوب وتسكن الوجدان بسلاستها ودقة تعبيرها
لى رأى سيدى الفاضل فقط فقط تعثرت قرائتى هنا


مين اللي فيكى اشترانا
و خلا ليلنا يطول
مين اللي دخل عِدانا
اللي سبوا صحب رسول(واللى سبوا الرسول)
مين اللي غير حياتنا (ومين اللى غير حياتنا)
عشان يعيش مسؤول
قال إيه بقالك حبيب ؟
و أنا اللي بس عزول !!!

ولك مطلق الحريه استاذى الفاضل
تحيتى وبالتوفيق

ترجمة بديعة للاشتياق والحزن ورؤية الواقع بعين البعيد عنها بجسده ولكن معها بالقلب والروح
بوركت شاعرنا واليراع المبدعة
ومرحبا بك في واحتك
تحاياي

بوركت مصريتك الحرة القوية شاعرنا
ولا حرمنا إبداعك

تحيتي

حمادة الشاعر