ليل الشتا في الريف

ليل الشتا في الريف
مبقاش له طعم زمان
اللّمه ويّا الدفا
وعباية ابويا الصوف
تغفل .. ما تعرف خوف
وتنام أولها عندك
وآخرها عند الجيران
ليل الشتا في الريف
وعيال ماسكه الساعات
شباك موارب وباب
مبيقطعوش حكايات
وخيال جاي من بعيد
تسأل .. يقولوا فلان
نازل ف ميعاد اجازته
مستنياه البنات
ليل الشتا في الريف
الشارع طين.. وضلمه!
لكن.. تحسّه زحمه
وتنام ف آخر الليل
لكن.. تصحى بهمّه
دلوقتي ف كل شارع
عيل ناقص وصايع
وصوات حريم وبنات
وفضايح وخناقات
وعيال كانت شطار
فجأه بقوا "فتكات"!
دلوقتي ف كل حته
ولا فيه ضمير ولا ذمّه
وتنام وتقوم تلاقي
بنت الشرف عنَّست
وخطيبها راح ومجاش
والعيشه مش تتعاش
والرّمّه خلّف رمّه!
ليل الشتا في الريف
مبقاش له طعم زمان
وبلاد سايقها كفيف
فهمهاله سليمان
صادق وأمين وشريف
حتى اسأل سامي عنان
عشر سنين (يا لطيف)
مين يحنو ع الغلبان؟!
ليل الشتا ف الريف
أصبح لا صوت ولا حس
ويا دوب بتطلع شمس
أصوات الناس بتشبه
عنبر كبير.. للخرس
وكل شئ حواليك
بقى شئ.. يسدّ النفس!
....
محمد سلامه
فبراير 2023

ليل الشتاء في الريف كان له طعم زمان بيوت من طين وقلوب من ذهب
والشمل ملموم على دفء الكانون تسهر العيلة بالجملة وتنحكى الحكايات
واتغير الزمان واتبدلت الأحوال ، وليل الشتاء في الريف مبقاش له طعم زمان
وقول للزمان ارجع يازمان.
قصيدة رائعة بمعنى الكلمة نسجا وتصويرا ومعان رائعة
عبرت عن الواقع في صور شعرية توضح المعنى في عين وعقل المشاهد.
سلم قلمك على جمال هذا الإبداع.

تحيتي وتقديري لحضورك الألق أستاذة نادية