رساله غلى جبهة الإنقاذ

يا جبهه كلامها مش واضح
كلام مستور ومتخفي
كفاية فعلكو الفاضح
شعلها نار وبيطفي
كلام فاضح ماهوش موزون
بيفضح فكرة المجنون على الكرسي
مافيش انقاذ
دا والله خراب على وطني
هدفهم كلهم واحد
مافيش اخوان مافيش مرسي
رساله ونفسي اوجهها لكل الجبهة بالواحد
عشان تبقى زعيم ديماً
تخلي مبدأك واحد
هدف وطني
ما تبقاش ثوري ومعارض
وقبل الثورة بتعارض
وبعد الثورة بتعارض
في ايد ثوار تحط ايدك
في ايد فلول تحط ايدك
كأنك فاهم الثورة .
أعاون ايها واحد
مع الاخوان بيتعارض

يا حبيبي ياللي مش فاهم المعارضه
حكّم العقول والعب
بكرة تحكم لما يحكمها النهارده
والعب الكورة بكياسه وبسياسه
حتى لو ما جاتش جون
تبقى تيجي في أي عَرضه
تبقى حينها انت الزعيم
واللي بيمارس السياسة
في المواقف يبقى عُرضه
أنه يتعرض لضغط
وانه ياما يقابله سخط
وانه بيعلق مواقفه
فوق سراب.. زعيق وشخط
قوللي انت بعد مرسي
جيتو كم مرة اعتصام
واختلقتو وافتعلتوا كم خناقة
راح فداها كم حطام
كل ذرة دم سالت
تبقى ف رقابكم حرام
كل هول جوه البلد دي
انتو جبتوه بالكلام
الرساله نفسي اقولها
انتو جبهه مش تمام
كيف أقول ع الشرعي لأ
انت ما اخترتش .. معارض
لكن اللي اختار له حق
تبقى مين ؟؟ انت فرد جوه دوله
والرئيس الشرعي فيها بيها أولى
واحنا نستنى الهدوء
مالنا قوة ولا حوله
نفسنا تهدى البلد دي
لكل واحد منا جوله
أرمي نردك وامسك الخشب اللي عارضك
تبقى بيها كسبت طاوله
مش تلم الدور وتخسر
قبل ما نبدأ محاوله
يا جماعه..
انتو بتحبو البلد دي؟؟
مش صحيح
انتو قولكم مش صريح
اللي بيحب البلد دي
ينقذ الوطن الجريح
يحضن التراب بقلبو
مش يذّريها في ريح
اللي بيحب البلد دي
ما يساهمش ف دبح بلدو
ويقتل الوطن الطريح
البلد دي عاوزه خدمه
كله يخدم من مكانو
واللي هيعافي اقتصادها
ان نبقى ايد عفيه
مش خراب زي اللي كانو
مش بقولك تبقى ساكت
باللي فيك لازم تقول
واما يبقى فيه مشاكل
تجري وتقدم حلول
لكن اني اشوف معارضه
واقفه في الشارع بتدبح
واقفه في الشارع بتقتل
تبقى تابعين للفلول
لما اشوفك حُر واقف للبلد دي
يومها هتنول احترامك
واللي هاتديه هيبقى
والشعوب تعرف مقامك
أما لو كابرت فيها
تبقى باني ضريح حطامك
يا جماعه انا قولتلكو اللي عندي
بس فوضت البلد دي للي خالقكو وخالقنا
خلي ازمتنا تعدي

الله الله رائعة واكثر
طرح بديع وتسائلات كثيرة لمن اغواهم هواهم ف الجرى وراء المناصب بدون عمل حقيقى
وافتعال الازمات واراقة الدماء وسلكوا طريق الشيطان
نص زاخر بالمعانى الجميلة والجمل القاطعة والاعتراض الراقى على امثالهم
اجدت استخدام مفرداتك
النص شابه بعض الخروج عن الوزن رغم ذلك لم يفقده رونقه وجمال الفكرة ودقة التعبير
وحسن السبك والسرج
*رجاء اخى الفاضل عدم نشر اكثر من نصين بالصفحة الاولى وهذا من قوانين الواحة هنا
دع نصوصك الاقدم تاخذ وقتها فى المشاهدة والتعليقات .حتى انك وضعتنا فى معضله بوجود نصوص جميلة لك تستحق التثبيت ومنعنا
وذلك بسب نصوص موجوده لك مسبقاً لم تاخذ وقتها الكافى
اعتذر لك استاذى وشاعرنا الجميل القدير
انت شاعر وبحق تمتلك الكثير واتمنى لك مستقبل زاخر بالألق والابداع
تحيتى
وبالتوفيق

رسالة ليتها تصل ويعملوا بها
ولكنه الكرسي الذي مازال بريقه يلمع في العيون
بوركت شاعرنا واليراع المبدعة
مرحبا بك في زاحتك
تحاياي