وسامحينى
.................
وسامحينى ...
خلاص هبعد
وبكرة الجاى من غيرى
أكيد هتشوفى فيه غيرى
ويجى اليوم وتنسينى
وسامحينى ...
حسبت الحسبة مية مرة
لقيتك صح م الأول وللاخر
لقيت الحب هيجى
برضه فى الاخر
وهيسيبك تفارقينى
وسامحينى ...
حاولت أحارب الدنيا
لقيتها كل يوم أقوى
ولما تشوفنى يوم بفرح
علىٍّ تزيد وتستقوى
ووسط النار بترمينى
وسامحينى ...
هعيش فى النار لوحدىّ
ومش عايزك تحنيلى
ولا تلومى فى يوم نفسك
ولا حتى تبصيلى
ونار بعدك بتكوينى
وسامحينى ...
هشوف جرحك قصاد عينى
وأنا واقف ضعيف مقهور
ومش عارف أكون ضهرك
وأنا ضهرى جريح مكسور
ومش لاقى اللى يشفينى
وسامحينى ...
خلاص همشى يا أغلى الناس
ومن بعدك
هشوف الحزن والقسوة
وأموت فى الثانية مية مرة
ما أنا بعدك
حياتى بحالها ولا تسوى
ولا عمرى ولا سنينى
.....وسامحينى .....