عالسمسمية والربابة

معدتش تفرق نعيش أو نموت ..
أصله في الزمان دة مفيش فرق
بين القصر والتابوت
دة اللي قالو لي صاحبي القديم
شفت شايل حزنه اللي متخبي
من سنين
وفي عيونه قصة كل المحرومين
سِكِتْ
ومعرفتش أواسي يا صاحبي همنا
أصلنا .. وطول عمرنا
بنقول :
ملناش غير ربنا
عارف يا صاحبي مين اللي سرق عمرنا !
هو
خوفنا ..
وضعفنا ..
وعجزنا ..
وخبينا جوى القلوب
فرحنا
لكن يا صاحبي
مقدرناش نحوش
دمعنا
عاش معانا وجوانا
يشكي ويحكي
قصة هوانا
وعشقنا
لأرضنا السمرة الطيبة
في يوم يا صاحبي
حنغني
على السمسمية والربابة
وبإيدنا نقتل كل الديابة
ونقول ..
خلاص معدتش تخدعنا
دنيا كدابة
يلا .. ياصحبي
نكون للوطن أهله وناسه
ونشيل الظلم من أساسه
وننهي حكم الخاين وأنجاسه
حنقدر يا صاحبي
لانه طول عمرنا
بنقول :
ملناش غيرك يا ربنا

عارف يا صاحبي مين اللي سرق عمرنا !
هو
خوفنا ..
وضعفنا ..
وعجزنا ..
وخبينا جوى القلوب
فرحنا
لكن يا صاحبي
مقدرناش نحوش
دمعنا
عاش معانا وجوانا
يشكي ويحكي
قصة هوانا
وعشقنا

بوح رقيق شجي

رائع أستاذي الشاعر محمد

خالص تحياتي وتقديري

ما أحوجنا للاتّحاد من أجل الذّود عن أوطان تضيع وتحترق بنار التّفرقة

دام حرفك رسالة صدق مبدعنا

مودّتي

عارف يا صاحبي مين اللي سرق عمرنا !
هو
خوفنا ..
وضعفنا ..
وعجزنا ..

امتعت وابدعت اخي محمد الصاوي الاديب الحبيب
قدرنا يبدو انه واحد وهمنا واحد
اللهم صبرنا وثبتنا وانصر بنا ولنا امين
تحياتي لهذا العبق الغزاوي المصري
دمت مبدعا ابدا