تخاريف تخاريف.. أحلام تخاطيف
تظهر لو انام تحت التكييف
قال خير اللهم اجعله خير
أنا شفت الشعب كما الدبابير
بيثور ويطالب بالتغيير
وكرامة ومأوى وأكل نضيف
تخاريف تخاريف.. أحلام تخاطيف
قال شفت كمان إعلام مسلول
لا يحابي لعسكر ولاّ فلول
ولا له في صاجات ولا دق طبول
مايطيقش لوطنه ف لحظة نزيف
تخاريف تخاريف.. أحلام تخاطيف
قال شفت كمان شرطة بتحْرس
لا بتقمع حد ولا بتقْرص
ولا تسحل مرّة ولا بتهْرس
ولا تتشطّر على كهل ضعيف
تخاريف تخاريف.. أحلام تخاطيف
قال إيه وكمان الواد باسم
كان ويّا العسكر واد حاسم
ولا كانش مقضيها مواسم
فوق كده كان يؤمر بالمعروف
تخاريف تخاريف.. أحلام تخاطيف
قدامي كمان مرتضة بُقّو
مسجون مع كل اللي يزقه
بعد الافترا مكسور حُقّه
من كُتر الكدب مع التزييف
تخاريف تخاريف.. أحلام تخاطيف
وكمان القضا رافع راسه
ومافيش أحكام برة اكْياسه
ولا واسطة ف أهله ولا ف ناسه
ومالوش في الكوسة ولا البلوبيف
تخاريف تخاريف.. أحلام تخاطيف
والأزهر وبروح سماوية
شيخ أكبر ومالوش تبعية
لا شيوخ سلطان ولاّ هفِيّة
وف قُول الحق كمان حَرّيف
تخاريف تخاريف.. أحلام تخاطيف
محمود موسى