ف رحبة وسيعة,نشرت كلام
لضمته ف غفلة من الرزانة
حروف مجردة تحكيني أنا
كلت في كلامي بلا ميزان
يا العز.ويا الشان
يا صحبة حلوة ,من ماضي
مشى بلاما يعلم
ولا يوصي
ولا يسلم
غمضت عيني وشفت
حياتي ملضومة بحال خيط الجوهر
مزوق بشلا حجار
حليتهم جبرت فحلكي غصة
كلت خير وسلام
وسالت دموعي
وااه عليك يا الدنيا
بديت نبري علي ,في
ونبري على كلامي
ولكلام شدرات...
وعيوط...وبراول...
مفتولة من صروف ليام
يا عيني شحال شفتي ومازال تشوفي
شفتي حوال بشلا لوان
حيرتك حياة بني الانسان
شفتي الدم لعزيز,وشفتي الدم الدليل
شفتي الدم لي كان دليل وعاد ليه شان
وشفتي الدم لي كان عزيز ودلتو ليام
عياني ما شفتي يا عيني
وكلت نجول
يمكن بعد الشدة الخير يصول
وعزمت وتوكلت,
بلا تخمام ,
هايم جيحني مكر لعباد
ياعيني شحال شفتي
ومازال تشوفي...
حرايق دمرت جوفي.
وهاني اليوم ,تايه مجلي
تخبلت ف ايدي خيوط اللعبة
ضيعت النصل وبقات الحربة
ماضية من جوج وجوه
يا وعدي دمات كفوفي
وشوفي ياعيني شوفي
اح ياعيني شوفي دمي حار
شوفي دمي نار
شوفي دمي تكدى وعاد رماد
والرماد ما بغات عافيته تطفى
زايدة وتدفى,
وتدير لسانات ولهيبها يحمى
حرها يا خويا عمى
ما تنفع معاه مسايسة ولا حكمة
كيعدبني وخا ندير - غافلة-
شوفي يا عيني لي في مرمى الشوف
شوفي شويفة بلا مسامر
غفلي على لوجاه لمزوقة بحال لحلام
غفلي على حرايب ليام
شوفي شويفة حلوة تبرد الخاطر
بلاما نتضام.ونداويها بالصبر ونكابر
حاضر انا ف طوعك يا مولات الريش انا حاضر
انا,وانت
تمتعنا بشوفت ناس النخوة والمروة
بيك شفت الغالي
وشفت العالي
وشفت الحطات لمحصنة
وشفت الخيل لمرصنة
وخير لمرابط كثير
ودار الزمان
وبيك شفت الغالي دميم
وشفت العالي داني
وشفت الحطة رهينة
وشفت الخيل لجامها فيد البراني
وعلى جنابها امرات الكي
أخي على غدر الزمان أخي
أخي على دنيا دوارة ماليها امان أخي
أخي على كان
وكان
وكان,أخي
انا شفت,,ايه شفت ,وشفت.
ولي شفت ما هناني
لله يا عيني شوفي
شويفة حلوة
بيها يرجع كل شي كي كان
يعلا الشان
يرجع لامان
شوفي يا عيني .موضع فيه الراحة
فيه نحط حملي
يخفوا لكتاف
يرتاح الكلب,ونخالط الناس
فهذه الدنيا بلاما نتعب