( بلاش تبقي كدا عاشقة سراب كداب ) .. شعرعامية / نبيل مصيلحي

( بلاش تبقي كدا عاشقه سراب كداب ..!!
ــــــــــ
معرفش ليه
حظي كده
وكانت ..
تشتهي قربي
وتحكي لي
تفضفض لي
بكل ما عندها
من سر ..
وكنت افرد
براح قلبي
واسمعها
بكل ما فيا
من ودٍ
وأهدت قلبها
لعصفور
شقي خالص
بعيد عنها
وكان واعر
مفيش زيـِّه
لسانه جميل
وشعْره جميل
ومواله ..
يميل له القلب
ما يملـُّه
وحسيت إن
انا أقرب ..
صديق ليها
ومش أكتر
وده غايتي
وإحساسي
ودام بينا
اتفاق واصل
....
يا عيني عليكي
عصفوره
وقعتي خلاص
لعصفور واد
ومتودِّك
مالوش أول
ولا آخر
وسواق للقلوب
واعي
ورسام محترف
ورهيب
بيعرف يسحر
الكلمه ..
فتسبي عقول
وتسجن خلف
قضبانها
قلوب دايبانه
في الأوهام
شباكه حرير
وواد لعيب
مؤلف للكلام
نسَّاج ..
ويخلق تاج
لكل فريسه
تبقى أميره
في حكايه
من قصصه
عشان يروي
بألوان الغرام
قلبه
ووجدانه
فيرسم
أحلى صورة
همس
وغصن القلب
مال
بالحلوه والقمره
في شرق غرب
وشفت بقلبي
موالها
ولا بوحتش
لها بنيِّة ..
وطار منها
ورغم براءة
الصحبه
مابيني وبينها
صدمتني
بعذر سراب
قفلت الباب ..
ولسه بتشتهي
كدبه ..
ولسه عندها
حتة بصيص
من وهم
يكون ليها
برغم
رجوعها
لامبارح
غرام الأمس
يا عصفوره
بلاش تبقي
كده عاشقه
سراب كداب
وفي عشك
غرام عصفورك
امبارح
يا عصفوره
" حرام " فعلك
وخليكي
على غصن
الغرام الصبح
وإختاري
غرام فالح
كما شمس
النهار
واضح ...
وفي كتاب
الصدقه
كتير
من الحواديت
بتعجبني
وأعيش فيها
ولكن لا
يا عصفوره
الخيانه
بلاش
...

نص ولا أجمل بما يحمل من معان ونسج
دمت مبدعا متألقا.