من غير صباح ولا مسا ولا سلام عليكم
ندخل في الموضوع على طول
واحد هيسألني طبعا وهيقول لي
أيه يا عم مالك داخل حامي علينا كده ليه ؟
ولا صباح ولا مسا ولا كلمة كويسة
وطبعا الإجابة معروفة جدا للجميع
لأن الإخوان باعونا في محمد محمود
وأنا باعوني أغلى شوية لما اكتشفوا إني بكتب شعر
وقعد الراجل الإخواني اللي طلع من الكرة الأرضية اللي تحت منصة رابعة
وهو راكب سفينة أرضية حربية
تشبه الرسومات اللي على جدران المعابد بتاعة الفراعنة ،
وماسك الشمس في إيده اليمين والقمر في إيده الشمال
وسلاح غريب الشكل كده في إيده التالتة
سلاح مرعب بصراحة وعمال يسن بيه سنانه
أنا قلت يانهار اسود هياكلني ويقرقش عضمي
وطلع بردية طويلة بإيده الرابعة وقعد ينادي ويقول
من يشتري هذا الشاعر الزنديق ؟؟
هأ هأ هأ هأ هااااااااااااااااااااااي
وأنا رجليا خبطت في بعضها
قلتله زنديق ايه بس يا عم الإخواني الله يكرمك
دا انا حتى معرفش يعني أيه زنديق دي ؟
أنا جاي أقول يسقط يسقط حكم العسكر
والانقلاب هو الإرهاب ، وحاجات كده من اللي بتعجبك
وإذ فجأة انشقت الأرض عن طفل طوله 5 أمتار
وماسك فخدة بيرضع فيها ولقيته بيصرخ ويقول
دا جاثوث يا ثيادة الملثد
قلتله الله يخرب بيتك جاسوس ايه ومين المرشد ده ؟
قال له دا حتى بيثلب ثجايل
قلتله هو كل اللي بيشرب سجاير يبقى جاسوس يابني انت ؟
امشي ياااد انت شوف امك فين خليها تغيرلك البامبرز ، ريحتك وحشة
وبلتفت على يمين المنصة ورا الكرة الأرضية عند منصة الصواريخ النووية
لقيت أمه ماسكة الفخدة التانية بتشويها على الفحم
يانهار اسود .. دي ليها خمس صوابع زي صوابع البني آدمين
ضربت بطرف عيني على شمال المنصة ورا الكرة الأرضية عند القاعدة الجوية
اللي مليانة طيارات بدون طيار وأقمار تجسس صناعية
لقيت العيال الصغيرين عمالين يتخانقوا مين اللي ياخد الكبدة
ومين اللي ياخد القلب ومين اللي هيبقى محظوظ وياكل اللسان
ويشدوا حاجة بيضة كده ، ده يشد وده يشد
لحد ما طلعت الجثث من المقبرة الجماعية
اللي ناقصة إيد واللي ناقصة رجل واللي واللي مافيهاش غير صدر بس
واللي مش فاضل منها غير الجمجمة
صرخت بأعلى صوتي وقلت ....
انت يا مفجوع منك ليه
أنا بحب الكبدة إياك حد يقربلها وإلا قسما عظما
أخبط أبوكم قصيدة تسلم الأيادي
أبوهم المرشد سمع تسلم الأيادي وجنونه طارت
وراح مادد لسانه ومكتفني بيه وقال لي طب والله ما تكتب قصايد تاني بإيديك
ومسك صوابعي يقرقشها واحد ورا التاني وأنا ميت من الضحك وأقول له
بالراحة بغير بغير بغير من صوابعي
راح مطلعني على المنصة وفرد البردية وقرا إعلان بيعي بـ 5 قنابل يدوية الصنع
وعشرين قزازة مولوتوف وفردين خرطوش إخواني الصنع وآلي متعدد الصرخات
ومن ساعتها وانا بكرههم جدا
لأنهم باعوني في محمد محمود
ومادونيش ولا حتة كبدة