الحقيقة
في الحقيقة
كِذب أصلاَ ، مش حقيقية
الحقيقة طريقها واحد
عندنا بمليووووون طريقة
زَي أُم ضناها جاحد
ذلَّـها وسط الخليقة
دي حقيقة ، مش حقيقة
........
لمَّـا واحدة تبيع شرفها
لاجل ما تحسن ظروفها
واما تتمسكن تشوفها
رَبِّـة العفة البريئة
دي حقيقة ، مش حقيقة
.....
واما واحد راح لمسجد
فاكر انه مات شهيد
لما فجَّر نفسه فيه
ولَّـع الجامع حريقة
دي حقيقة ، مش حقيقة
....
الحقيقة . سلعة نادرة
واحنا منها مفلسين
الحقيقة . لما تسأل . تلقا رد
مش تجيني تقولي سين؟
تلقا ردي ألف سين؟؟؟؟؟؟
الحقيقة إننا من أصل طين
واننا راجعين لطين
واننا في الوقت نفسه
نستقل بأي واحد
لِـبسه متلطخ بطين
الحقيقة إننا
وسط الحقايق
كدابين