هدي تعدي

@@@@@
هدي تعدي
يا اللي معارض هدي تعدي
قبل ما تنسي إنك مدي
السياف واقف علي الباب
عنده أوامر يجز رقبتي
وطي دماغك تبقي أفندي
من غير غاغة أو زمارة
و طبلة تضرب في راس الحارة
أحكي حكايتك واقعد جنبي
واخفض صوتك وأوعي تعلي
فيه طيارة ليها سنارة
جايز تاخدك قبل ما تدري
عيش أيامك وبدل حلمك
لسه كتير عليك وبدري
كل الناس ليها حجارة
أما حجارتك طين ورملي
جاتك نيلة يا واكل ناسك
عايز تلبس بدله وتبقي إفرنجي
ناسي أبوك وناسي جدك
وضارب الحزمة ورابط خصرك
وناس إن الدنيا لينا مقلوبة
من أيام السيد أبو عرقوبة
تدينا وش وبناكل مش
والمسكين ما قادر ينش
ما إحنا أموات في عصر صاجات
واللي قتلنا أبو هتهات
من أيام عمنا مينا
واللي يصقف ابن لمينا
وإحنا في محنة وفين كلوينا
واللي حاكمنا ليه رقابينا
@@@@@
يا اللي معارض هدي تعدي
فوقنا طيارة ليها هدير
زى العاصفة وعاملة زئير
إيه لو يعني كانت العيشه ،
جو مغا رة
ما الصياد ليه سنارة
لو عايز يصيدك في ضربة حظ
قبل ما تلحظ وعينك تبص
تاخدك غارة في الدوامة
يا له وقولي فين الشاطر يا أبو شطارة ؟
نازل تغني علي الزمارة
وطبلك يضرب وعامل غاغة
آه لو شافك عمي غبارة
وسجل اسمك بإس الجارة
رحت في داهية ودخلت مغارة
يا اللي معارض هدي تعدي
عايز تشرب سم الدردي
وتنسي عيالك وتطلع تجري
وأمك تصرخ وتنزل تبكي
ما إحنا تمام وفي أحسن حال
شوف حوالينا بلاد الشام
كل ديارها أضحى ركام
حتى الناس ملاقية خيام
والأموات كــــــــــــام تعد
واللحاد راح يــــــــــــــكد
كأن الدنيا ما راضية تهد
ذنب وكاسر بعد ممات
بص بعينك وحكم عقلك
شدة تزول ولا حد يموت
بكرة ها تفرج وناكل توت
بكره ها تفرج علي الكتوت
والعطشان ها يشرب صاقع
يعني قازوزة وشربات ناقع
والجوعان ها يقول لحمة
من غيـــــــــــــــر هيصه
ولا تقف في زحــــــــمة
ولا تضرب علي النص الحزمة
مهما كان ليك مــــــــطلوب
أنت تأشر من غير طوب
ولا تعاند أبـــــــــو عرقوب
رزقك قاعـــــــد ليك مستني
إياك تعـــــــوج وتروح تني
كلمــــــــــــــــة في راسك
تبقي خــــــــــــــــلاصك
هدي يــــــــــــــــا روحي
ولما تهدي مش ها طاطي
شدة وزنقة ولازم تعدي
بقلم : سيد يوسف مرسي

كلمات رائعة
وعلى رأي اللي قال: مش أحسن ما نبقى زي سوريا والعراق..
فعشان كده لازم اللي معارض يتأدب.

عجبتني القصيدة جدا
لكن فيه بعض الجمل محتاجة تتظبط ف الوزن..يعني بلاقيها مش متغنية معاية
زي: وطبلة تضرب في راس الحارة
شوفتها تمشي كده: وطبلة بتضرب راس الحارة

تحياتي

كلمات رائعة
وعلى رأي اللي قال: مش أحسن ما نبقى زي سوريا والعراق..
فعشان كده لازم اللي معارض يتأدب.

عجبتني القصيدة جدا
لكن فيه بعض الجمل محتاجة تتظبط ف الوزن..يعني بلاقيها مش متغنية معاية
زي: وطبلة تضرب في راس الحارة
شوفتها تمشي كده: وطبلة بتضرب راس الحارة

تحياتي

وعلي رأي المثل المصري ( الباب اللي يجي منه الريح سده واستريح )
وأحيانا تكون الريح عاتية وقفل الباب يكون مفيد فمهما قلنا لا نفيد
[ لا يغير الله ما بقوم حتي يغيروا ما بأنفسهم )
وأن ما أصاب شعوبنا فبما كسبت أدينا أثاما وأقترفت من الذنوب
كل ما نملك هو أن ندعوا الله سبحانه وتعالي أن يفرج كرب أمتنا وشعوبنا
وأن يقينا شر أفعالنا ويصلح حالنا جميعاً حكاما ً ومحكومين
حضورك شاعرنا طيب المذاق والرائحة طاب لنا ثراء حضورك وبهاء تعبيرك
دمت ألقاً سامقا ً لا عدمناك أبدأً وجليل تحياتي لك وشكر يليق بسموك
(ولهمسك الراقي )

أجدت التعبير عن واقع مؤلم
دمت شاعرا يرتشف قلمه من حبر الإبداع.