بَحرْ الوَجَعْ !
............................
بحر الوجع واقف بعيد
وما لهش فَرْحْ
وما لهش عِيد
واقف يعذب في البلد
من سينا يجري
لوجه بحري .. للصعيد
الآة تقولها اسكندرية
الصوت يِرِنْ ف بورسعيد
...........................
كل الوشوش الحزن طالع مِنَّها
رغم ان حُكْمُه راح خلاص انتهى
القصد كان .......
نفسي اقولِّك كلمتين
بس الزمان ......
بيقول دا كُلُه سلف و دين
........................
و إنتي بقى يا بنت الحلال
اوعاك تقولي الحظ مَال
فين الضفاير اللي كانت
سارحه فوق خد الجميل
فين احلى بحر
و احلى ميه و احلى نيل
فين اللي كانت أُم دنيا
أم اللي عبروا و كَبَّرُوا
ساعة ما عَدُّوا المستحيل
..........................
هو انتي ليه حُبك عذاب
يا حنينة يا أم الضفاير
دايما معاك القلب حاير
قومي افتحي كشف الحساب
شوفي اللي عامل نفسه وطني
واللي عامل نفسه ثاير
واللي بيقتل في الشباب
قومي افضحي لؤم اللئيم
واللي عمره في يوم ما تاب
......................
قومي افضحيهم كلهم
عري المخبي واللي بان
و اللي يِخَبَّط عالبيبان
و اللي حياتهم كلها
كان اللومان
و اللي أساتذة في السِباب
........................
قومي افضحي كل اللي فات
هاتي كتاب الذكريات
و عَرَّفِي مين اشتراك
و مين اللي خان
اصل اللي يقتل ف النهاردة
هو اللي قاتلك من زمان
.........................
انتي اللي طمعتينا فيك
طبعك كده دايما مِسَامْحَه
ولو بِيقْطَع في الوريد
بتقول مصالحة
هي المصالحة بس بوسة وكلمتين
و للا المصالحة انسى اللي فات
نام عالسرير و مخدتين
و للا المصالحة
خلي النيران جوة الصدور
والحقد لما بْيِمْلَى عِين
..........................
و في الحقيقة ...
دمك بقى عنده رخيص
أصل البعيد ويا الخسيس
لا يهمه موت
ولا همه شعب
ولا همه جبش
و للا البوليس
................
الدم عادي بيشربه
زي السجاير
علشان كده
خليتى قلبي بِمُرُه صابر
يالا افتحي كشف الحساب
يا حنينة و فُكِي الضفاير
د. هاني أبوالفتوح