شيطان الشعر وسوس لي
و أنا خايف أطيع أمره
لكن مشتاق
أتلِّج حبر مقلمتي بنار الخوف
عشان أعصاه
و تاه الشوف
يسيح الحبر م الرغبة و م الأشواق
ألملم فيه يعاندني و يعصاني
فخلاني أطوف و اوصل لبستان البيان و الحرف
فامد إيديا للشجرة
أقول واحد يكفيني
يقول لي لأ
لازم لك ألف
و أنا واعد إله الصمت مش هأقطف
لكن برضه الشيطان شاطر
ادير ضهري للشجرة
منيش قادر
ما هو شيطان الحروف فاجر
أفكر قلمي بالوعد اللي أخده عليه إله الصمت
يرد علي و يقول لي منيش فاكر
خلاصة القول
شيطان الشعر و الأشواق مع قلمي على سكوتي بيتآمروا
و بستان الحروف مغري
و أنا دوغري
لقيت نفسي على الشجرة بامد الإيد
عصيت رب السكوت غفلان
بقيت عريان و كل حروفي عريانة
بتخطف قلب عشاقها
تخيّط في القلوب عناوين
و أنا مسكين و قلت أتوب
و ألبس من سكوتي توب
لقيت توب السكوت دايب
و عنقود الكلام سايب
عبيد رب السكوت زعلوا
لأني كفرت بسكوتهم
فحاربوني
و في الميدان
لقيت درع الكلام مشدود
ما هي الكلمة في إيد الحر
أقوى سلاح
آخرها إيه في دنيتنا ؟!
آخرها موت !
كلام الحر بينبِّت و بيكون بعد موته حياه
إذا كان موته في الدنيا لوجه الله