يا ريتني تراب
رهافة حس أديب وليست بالضرورة قناعة.
******//////******//////******//////******
يا ريتني تراب
(نص بالعامية).
في التعليم فنيت شبابي
واليوم راني في التقاعد كيما صحابي
قطعت المصاعب من صف لصف
وجاهدت لمكايد والصعاب
لو كان دريت نولي هكذا في آخر عمري
أضحوكة بين طلابي ما قريت
نقسم بربي..
ما عرفوا واش قريتهم
ما داروا لشيبتي حساب.
آه يا زمان جيلك مكشوف
والكل يشوف فيا كالغراب
حالي كنوح في قومو
قاس لمحاين ولعذاب
دعاهم ألف غيرخمسين عام
والكل كفروا وتاب ربي على من تاب.
راني من الدار للمسجد
والناس يشفوني بنص عين يا عجاب.
بالأمس كنت السيد
واليوم...هههه عجوز خراب.
المطالب كثرت
والمرتب ما يكفيش
والدنيا في عيني ولات يباب(خراب)..
الناس حديثهم قصور وسيارات
والكل يجري على الدراهم ويجمع
ما يقرأ ما يكتب ويترشح للانتخاب.
فنان وشاطر في لعبة الحساب.
ما يعرف في الأخلاق ولا الأرحام
لكن يتقن الفايسبوك
والماسنجر والوات ساب.
الدنيا جيفة اتباعها كلاب.
ربي يجيب الخير إذا طوالت لعمار
واذا قصارت يحسن خاتمتي
ويحشرني مع النبي وبشفاعتو في الفردوس.
هيا أمنوا يا لصحاب .
الأستاذ ساعد بولعواد
الجزائر.
رد مع اقتباس
