ابليس
ابليس بعينه
بشره بناره وبلونه
ابليس
وغيره أبالسة كتير
ابليس لا تسأل
ولا تطلب التفسير
الشر جوة عنيه
والدم سال ف ايديه
والغل منه يطير
ييجي ف صورة ارهاب
ييجي ف شكل كلاب
وقصة متكررة
من اول الحملات
لآخر الاساطير
مكوي بنارها اليوم
عشان سكتنا كتير
ارهاب بيقتل ناس
لا دم لا احساس
مكتوبه عالابرياء
شاربين مرار الكاس
وقت الصلاة كانوا
ولا ف بيت كانوا
ولا ف غيط هانوا
وقت القدر يختار
في لحظة يبقى فطيس
وينبسط ابليس
مفيش تمن يا اصحاب
يا براءة بعد غياب
ياصفحة نطويها
ماهو الكبار قالوا
ابليس مالهش حساب
الحق عندالله
واللي اتملا أحزان
واللي اتملا بالآه
نهر العيون يجري
ونودعه لمثواه
لكن حساب الآخرة
ف انتظار مولاه