قصيدة [ أيوب ] شعر / نبيل مصيلحي
***
شجر الصباح لمَّا افترق
تاه احترق جوه النفوس
نلبس في يوم مش قدنا
ونموت ونصحى .. نموت كلام
نصحى هياكل من رخام
ع السكه تتلون سكات
يا ليل جراح
ع الضفتين
شجر الدموع قضبان
بيحبي الصبح مكسور الجناح
والنخل مداح السراب
ومافيش في عبك يا زمن
غير بيضة الرخ اللي ساكن حمى
في عيون المدى
يا ليل شيطان
سايق عفاريت الخراب
أشباح وخوف بيقب في عيون الرؤى
ينفخ رياح الموت في تفاح المدن
يعلن شروق اللهفه فوق سدر البنات
شاهد ومشهود يوم انكسارك ع الطريق
يا صبح ماشي تحت جلد الليل في شوك الأورده
لابس نعال م الدم والألم الهموم
ما تموتش بين المفترق
الرحله ملهاش غير سبيل
الرحله ملهاش غير نبي
ليه يازمن مابقتش تولد أنبيا ..؟!
يا ليل صراخ
مفتول على بدن الأهات
تدخلني ترسم أجوبه
سايق عليك سيدنا الولي
يا ليلي تعلن ع الملأ
بكره ماهوش زي دابح إبنه قربان للسقوط
يا نيل مدد
بره المسافات اللي نامت
واندفن فيها الأمل
جوه تراتيل السكات
يا ناعسه نامت مددت كل العيون
وانا عيني ليه متكحله بدم السهاد
لو ينصهر عضمي في عضمك أمنيه
يا ناعسه نصبح أغنيه
أو حدوتايه
تشيلها أيام اللقا
قلب الحقيقه سوسنه ..
لمَّا هنخرج من سواقي الدم
والقول الحطب
لمَّا هنجحد بالغرام
جوه هوان الكلمه في بروج الخيال
لمَّا يهون زلزال خرافة وهمنا
وبينسلخ أتباعه في قلب الميادين / القصاص
نصلب سنين المر
فوق جذع الحقيقه
يموت علي ضفافي السكات
تبقي يا ناعسه للموات دم الحياه
تروي قناديل السكك روح القصيده
في قلب كل الأيوبين
***