ماتبصيليش وانا متكتف
النظرة حيرة
والدمع سيل يحدف
ايدى اللى فكوها
لا قدرت……….
ولاعرفت……..
وحدها تسقف
*************
متبصيليش وانا مجروح
القلب دامى
ورافض البوح
كل الغناوى فرح ومحبة
وانا اللى غنايا
كله دمع ونوح
****************
انا نوح زمانى ياما
وبنذرك طوفان
طوفان كلامى
لن يوقفه سجان
مهما ان كتر حواليا
ديابه وسور قضبان
طوفان كلامى يفتح
ف كل ركن بيبان
******************
ايوب ياصابر
صبرت م السنين كام
انا امى جوه الزنازن
و ابنها السجان
عدت سنين الوفات
ماقلتش عدت كام
الدمعة ع الخد
واللهفة ع الوليد بركان
هزت جبال الصبر
لاعمرها تدعى عليه
ولاراضيه يوم ينهان
قلب الحجر رق
وقلبه هو ما لان
الفين ندامة ياصبر ايوب
ع اللى باع الاوطان
********
بياع اوطان
مين يشترى وطن
وتشتريه بكام
وطن مزروع حضارة
ف كل شبر تلتقى
تمثال حجارة
وطن مزروع صفصاف
وطن كله خضار
عصافير مع ازهار
وطن فيه نيل بيجرى
لكن هزيل تعبان
ياللى عايزلك وطن
قولى هتدفع كام
وطن منهوب وخيره
مقسوم لولاد غيره
وطن منهوب بنوكه
وحاكميه يحموكو
لو كنتو م الهلاليب
وطن ف قلبه لهيب
محتاج لحضن حبيب
محتاج لقلب قريب
محتاج تبصله وتتنهد
تنهيد من قلب الوريد
زمان ياوطن
كانو يرسمو المجد
على جدارك نقوش
النهاردة…………….
بيرسمو اجساد ولادك
على جدارك نعوش
الحب مات ف ارضك
وسكنوك الوحش
وانت عاجز
لم قدرت تحوش
والوحوش مابيرحموش
ياوطن ومين يحوش
ياوطن ومين يحوش
*****************
من كام سنة ياوطن
لم عيدت
من كام سنة
لم شفت .........
و لم فرحت بعيد
الفرحة مالها بعيد
من كام سنة ياوطن
لم لبسنا جديد
من كام سنة ياوطن
وانت قلب جليد
من كام سنة ياوطن
وانت قلب حديد
قلبى اللى رق وحنلك
بايدك شهيد