كل الحواديت القديمة
اللى احنا قلناها سوى
ف ليل الشتا
واحنا قاعدين ع الحصير
وف دفا فرن الحضير
او ف ابعد قاعة ف الدار القديم
لساها ساكنه ف الخيال
مقدرش يفنيها المحال
لساها اودام المحن
مقدرش يهزمها الزمن
ولايخلع الريش م الجناح
لساها طيره ف السما
حضنه البراح
وف زقزقتها البسمله
لساها غنوه ف قلبنا
تنده على فجر الصلاح
وقت الصباح
الفجر يولد عزمنا
ويشدنا لحضن الدفا
لاحنا اللى بنخاف انجراف
ولا الليالى تهزنا
لسه مجاش فصل الخريف
اللى يسقط ضحكنا
ولا الشتا ببردة فيوم
قدر يكرمش حسنا
انت وانا
فيه لسه فينا
كل حواديتنا القديمة