(1)
انا فاكر..
كلمة أبويا
ف أول يوم مدرستي
خد بالك يابني..
من مسمار ف التخته
يقطع مريلتك
فتكمّل طول السنه.
بالرقعــــة
(2)
كان فرحان جدا بيه
علشان مسألتوش
عن درس خصوصي
أو رحله ..
ح تعكّر صفو الميزانيه
(3)
الظاهر..
إنك كبرت خلاص
و ماعنتش محتاج مصروف
كل اللي أنا عايزه منك..
انك تنجح
(4)
مبروك ..
ولله ركبت حصان الميري
و بقيت بتعكز على روحك
ف الدنيا المعجونه ف هوجه
اهو أديني بعافر ..
ف الموجه
(5)
يا ابني..
ما تصرفشي فلوسك ..
ع الشعر.
يا مطن اليوم ..
اللي عرفت بحوره.
يا أبويا ..
أنا ح اعرف أعوم
(6)
شوف يابا
كسبت كتير
ف مسابقة عمري
روح يا ابني
ربنا يغنيك
(7)
كان ماسك جدا
ف ايديا
و متبت ف العقل الباطن
و ف قلبي
شايل تحويشة عمره..
و مسافر داخل تكويني
و برغم إنه ..
كان شبهي تمام
ما قدرتش ..
افهم روحه كويس
غريبه..
انه عاش معايا
و مااااااااات
معايــــا