صباحات فلسطينيّة

صَباحِ الثّلْجِ بالرّامِة

بَياضو عالأَرِضْ رامي

مِتِلْ مَزْيونِةٍ تُنْطُر

عَريسا والقَلِبْ ظامي

صباحِ الحبّ من شيخي

ولِحْيِة وِشُّ هالبَيْضا

مِرابِطْ ليلِ وِيّا نْهار

ليُحْرُس شامِ هالخَضرا

صباحِك أبْيَض بْلادي

ثِلوجِكْ تِنْدَهِ تْنادي

لَهالفُرسانِ بالوادي

بَياضي إوْعِكُم يِصْبَحْ

مَداسِ لْخيلِ هالعادي

صباح الثلج في حرمون
يالفة شيخ لا بتذل وما بتهون
يا ذكرى قليبيَ المفتون
بطياتك تركت شجون
بتشرينٍ انا الي كنت خيالك
انا شريكٍ لجند الشام ورجالك
يا عالي والله ما انسى
وروحي الفدوى كرمالك

صَباحَكْ فُلِّ عيبالي

صَباحِ مْزَنّر بْعِطْرٍ

على سَفْحَكْ يَ هالعالي

صَباحِ مْضَمَّخٍ بالغار

على سْفوحَك جَبَلْ هالنّارْ

يَحاضِنْ روحِ هالشُّهَدا

وِصايِنْ صَرْخِةِ الثُوّارْ

عَلى طُهْرَك

رُسُل رَبّي خَطِتْ رِجْلُنْ

وِفوقِ زْنودَكِ الخَضْرا

حَضاراتِ الأرِضْ مَرّتْ

مِتِلْ لِتْيابِ بَدّلْتا

وِكَبّرْتا وِصَغّرْتا

عَلى قَدّكْ

وِهُمْ طارو

غُبارُن ما خَدَشْ خَدّك

فِضِلْتِ انْتا

بَطَلْ شامِخْ

عَلى أرْضِ الوَطَنْ راسِخْ

وِأهْلَك هاليِحِبّونَك

بِدَمّ أحْمَرْ يِحَنّونَكْ

يِقولو يا جَبَل هالحُب

قَسَمْ مِنّا

عَلى طولِ الزّمَنْ نِبْقى

رِجالَكْ هاليِصونونَكْ

صباح النصر في غزة
عغازي ايدو مهتزة
بطياره يشن غاره
على حاره
يهد بيوتا وحجارا
جنوده عالاض تفزع
تخاف تجابه المدفع
بيد مجاهدٍ يوضع
على كفوفه
دمَّه..على درب الوطن مصرع
يفادي بالوطن بسمه
على شفاف البحر نسمه
على وجه السما رسمه
وصاروخه
بيدَّه العقد والعصمة




يهالفاتن لشعرك يرهب المحتال

ما دام الشعر في قلبك به الموال

صَباحِ الخيرِ يا سِتّي

يَأحلا مْنِ الوَرِدْ إنتي

يَقَمْحِة عزّ غَرْسِتْنا

بتُرْبِ وْطانِنا إلْعالِقْ

على الغُرزاتِ في ثوبِا

سِنينٍ مَرِّتْ وْ إنتي

عَلى دَرْبِ النّبِع تِسري

تِعانِق طَرْحِتِكْ هالفَجْر

وِبَسْمِة وِشِّكِ الضّاوي

بِتِغْمِز مِن سَناها الزّهرْ

عَلى راسِك حَمَلْتي جْرار

نَضَح مِنْ طيبِكِ الفَخّار

أيا سِتّي

حَمَلْتي هالوَطَن ذِكْرى

بِسَلّة تين قَطْفِتها صَوابيعِكْ

بكوزِ الصّبْرِ هالخلاّ

وَخِز شوكاتُ (و) عَأْديكي

بِدايِر تَنْتَنا مْلَوّن

شَبَكْتيهِ بْمَناديلِكْ

بتوبِ مْطَرّزٍ بالوردِ تِحْكيلو

بإبْرِة وْخيطَة يا حِلوِة مَواويلِكْ

بِغُرْبالٍ فَصَلْ قَمحاتِكِ وحَبِّكْ

عَنِ حْجارٍ تِخافي تِكْسِرو سِنِّكْ

يَسِتِّ الكُلِّ يا سِتّي

أخافِ بْيومِ إن إحْنا فَقَدناكي

وِذا ما بْيومِ تِمِّ الموتِ واراكي

تِغيبِ البَسْمِة عَن أرضي اللّي تِهواكي

تِهاجِرْ مَيّتي نَبْعا

وِتِنسى هالسّما ثوبا

هَلِزْرَقْ يومِ تِنساكي

صباح مطرز بثوبٍ لفلاحه
على صدره تلاقي الشمس لوّاحه
سنابل قمح عالكمين ووشاحه
يا حلوة رايحة عالعين يالحرة
تميِّل خصرها انشين هالجرة
وتسحرني بطلة شعرها الغره
ما تقدر تقترب منها ولا مره
تلاقي عينها بالكون محمّره*
أصل هيَ
زريف الطول تستنى
لجل يرجع من الغربه ويتهنا
زريف الطول يشغل بالها هلحين
وطوّل غيبته المرة بقاله سنين
راجع..قالت الجده بشهر تشرين
راجع.. على حيفا كحيل العين
يبشر عودة اللاجئين


*الكون:الشجار او الحرب

صَباحِ الوَرْدِ والطيّونْ

وِفُلٍّ زَرْعِتو سِتّي

لَيَلّي لَلْوَطَنْ مَيْخونْ

لَفارِسْ شَكّلِ ضْلاعو

دِرِعْ يِحْمي بَوادينا

لَصَيّادٍ حِمِلْ بَحْرو

وِكَفّو صارَتِ المينا

لِفَلاّحٍ زَرَعْ أرْضو

وِنَبْضو تْخَلّطِ بْطينا

يَخَيّي مَهمَ خَطّو الناسْ

وِمَهْما زَوّرو لينا

وِمَهْما قالِتِ سْطورُنْ

عَنِ الحاضِرْ وِماضينا

هَتِفْضَل هالأرِضْ هِيي

دَفاتِرْنا اللي تِحْكينا

وِيِفْضَلْ تُرْبَها لَسْمَرْ

بِحِبْرِ الدَمِّ يِتْزَنّر

تَيِحْكي لَلْبَشَرْ كِلُّنْ

حَكاوي هالبَشَرْ يَلّي

رَووا هالأرْضِ بِدْماهُن

تَيُنْبُت فوقِ كَفّاتا

مِنِ رْواحُنْ يَسامينا

صباح السرو والزعرور
وريح الزعتر المنثور
ورسم شفافك ابّسمه
يطل من الجبين النور

صباح التين والصبار
برملة ولد وفي المغار
تشهي النفس حلو ثمار
لغايب في زمن غدار

صباح العوسج البرَّي
وبسمة زهرتو بتغري
على سفح الجبل صخري
يطل شباط تِحمرّي

صباح التوت والملول
وحلقة دبكه في حلحول
رجع والله حبيب القلب
رجع والله زريف الطول

صباح الجوز والصفصاف
تلاقي في السهل أصناف
على سفح القدِس ظِلّو
وزهرو في الربيع شناف

صباح الغارِ والحورِ
بحيفا وفي أرض غوري
يا قوس النصر جا دوري
يرفرف في السما الدوري

صباح الحب لفلسطين
لفاتن وختها نسرين
لوردة تزهر بتشرين
عطرف الواد في حطين

صباح الخير للغيُاب
ببسمة طلتو عالباب
بحضني القاه للغالي
ابن بطني حلو وجذاب
رجع منصور لبلادو
رجع غانم وزهرو طاب

صباح الخير للتلبس بطرحتها...
عريس الزين تستنى لجلوتها..
اهل وحباب بالدبكة وشبكتها..
وييجي الزين ودمّو غرق هدومو..
شهيد ويحملوه اصحابو وعمومو.
.بدت زفة بغُنا أمو لتكريمو...
عريس الزين يا غالي..,
يا راعي المهرة خيّالِي...
فلسطيني وعُرسك في السما عالي