انت أكيد من عالم تالت
******
لو عايش دايمًا صعلوك
دايمًا بين الناس مملوك
تتظاهر بالعكس وتنكر
والناس تضحك لو يشوفوك
لو جهلك دايمًا عنوان
تتلامض وبربع لسان
فالح بس ف كل كلامك
تتسَنّد على مجد زمان
تتمحك في الجد السابع
وانت يا إبني مجرد تابع
وبترسم أساطير لصحابك
ناقصك بس تلم طوابع
وبتاع مصلحتك وغاويها
بس ياريتك فالح فيها
لو بإديا قصاد فهلوتك
كنت هسمّيك "سعد نبيهة"
أسهل حاجة تبات منصور
تصبح -بعد غباء- مكسور
تستعجل ياما خراب عشك
بعد ما طال زَنّ الدبور
لو تغضب من كلمة اتقالت
وانت يا فسل لسانك فالت
تتاخد بالصوت وتنخنخ
تبقى أكيد من عالم تالت