إخواني..
تسمحولي بثورة؟
الحكاية مش حكاية السد
حكاية المقلب اللي شربناه على قفا السد
حكايتنا إحنا
حكاية شعب
**
شعب للفخّ المقنَّع قام وثار
شعب زاحف.. بس ماعرفش المسار
شعب كافح.. بس خد م السلطة عار
لما ضاعت منه سينا .. والسودان
واتهرس بين الحيتان
شعب كان عايز يصلّي الفجر حاضر
ثم يصْحَى
أو يشاور للشموس المصراوية
بس من دوشتكو طبعا
نام وماسْمعش الأدان
شعب مش ممكن يآمن
للي من ستين سنة بيأمّموا الصوت في اللجان!
شعب بيشوف نفسه دايمًا
بعد توجيهات سيادتك
أدنى من كل الجيران
شعب ممكن يشرب المقلب ده مرة
بس واعدينك خلاص.. ده .. كان زمان
شعب لو فكرت تاني انك تساومه
بين كرامته.. والأمان
مستحيل يشربها تاني
بعد ما اتربى .. في ذلك
تنُّه شارب م الكيعان
انسى تكرار المقاولة
مهما حاول بينّا جندك
لو يكونوا ف جلْدنا من لون ولهجة
ولا حتى أمريكان
اتقضى في الشعب أمرك
واتحفر بإديك لوحدك عندي قبرك
انتهى صدّقني عصرك
وبْإيدينا الحلوة "عصْرك"
والزمن شاهد عيان
#مع_الاعتذار_للأغنية