*بلادنا الجميلة . واخده الصدارة .
للدنيا بحالها .كانت منارة .
تعالوا نشوفها . أمّ الحضارة .
*مدينة كبيرة . ووسط المساكن .
سمكرى بريمو . يدقدق يوماتى .
وسمّاك فى جنبه . وورشة نجارة .
*وليلى هانم . مراة فوزي باشا .
رئيس المدينة .تبعت سنية .
ترمي الزبالة . تحت العمارة .
*فرح قريبي . حفلة حبيبي .
جايب له فرقة . للصبح ترقص .
تغنّي تهيّص . ويدوش فى جاره .
*واحد مخنفس . راكب لى بودرة .
يضرب كلاكس .ينادي فى صحبه .
ريكوردر ويقلق . كام شارع وحارة .
*مطرب يقولك . حبيبي كامنا .
تعالى ياويكا .فيين مصر التى .
وقف الخلق . والسمر العذارى .
*عربية وطايرة . آخر موديل .
شباكها يفتح .تلقى فى وشك .
قشر السودانى . عقب السيجارة .
*أطفالنا بتهرب . م المدرسة وتلعب .
يدخّن سجاير .يفكّر وحاير .
إمتى يغير . من طفل الحجارة .
*فى الجامعة شابة . لابسة وقالعة .
ماشية بترقص .تغنّي تصفّر .
ياناس فهّموها . دا مش بيت دعارة .
*سوّاق أتوبيس . ماشي وطاير .
لاهمو محطة . ولاأعمى يشاور .
هيغرق فى ترعة .سايقين سكارى .
*مصنع كبير . ينتج حرير .
سجّاد الأمير . وربحه كتير .
ويصرف ف النيل . فاكرها شطارة .
*عيش ع الرصيف . خد لك رغيف .
تاكل وتشبع .يوماتى هترجع .
تاخد كمان . وهتشيل المرارة .
*موظف بسيط . زي حالاتى .
قاعد فى مكتب .مش لاقي كرسي .
يصبح ويمضي . وشد الستارة .
*ولو حظه حلو . وخبرة كبيرة .
يقابلك مكشّر .يقولك تعالى .
بكره ياسيّد . هاشوف العبارة .
*إن كنت فاهم . وجيبك يشخشخ .
قوام الابتسامة . اقعد ثوانى .
طلبك مجاب . من غير استشارة .
*وآدى مليونير . ومكتب خطير .
وحراسة جامدة . وبدلة شيك .
سكرتيرة حلوة .وكام نوع تجارة .
*فروعه كتيرة . زباينه أميرة .
وأغنى الأهالى . قروض م البنوك .
ويهرب مانعرف . ف أول طيارة .
*مهندس مباني . يخطط ويرسم .
بذمة وضمير .ويجى المقاول .
فى ثانية يغيّر . كلام الإدارة .
*مدارس حديثة . فيها ولادنا .
مبانى جميلة . وجامع ومدنة .
وفجأة فى ثواني . كومة حجارة .
*أسمنتو قليل . وغشّوا الحديد .
عشان دا ياخد .ويِدّي فلان .
دا كرشه واسع . ونايمة الوزارة .
*إعلان يقولك . دي لحمة طازة .
ودا بسكويت .تاكل وتشبع .
وتكسب كمان . فلوس بالشيكارة .
*أجري بسرعة . أشتري لي علبة .
وشبسي وسمنة .وأم العيال .
تقولي ياراجل . كفاية خسارة .
*هنكسب ياهبلة . فلوس بالألوف .
وشقة كمان . ويمكن فى مرة .
نلقى المفاجأة . ونبني العمارة .
*ع القهوة قاعد . يزعق يقول .
هنبني مدارس . نوظّف ولادكم .
مفيش بعد كده . ذمّة وطهارة .
*ناجح يبارك . فلاح يبوسه .
عيّان يزوره. مايسبش ميتم .
يوصل عشانك . ليله بنهاره .
*وبعد النتيجة .لاعدنا نشوفه .
غير وسط جلسة . يانايم يشخّر .
ياقاعد يسقّف . بهمّة ومهارة .
*إمتى ياأهلي . ننسى الزمالك .
وناخد فى أهلي .ويّا عيالك .
نزرع أراضي . نعمر صحارى .
*وسط الظلام . شمعة تقيد .
تمد لك إيد .قرّب ياأخويا .
شدّ عليها . بقوة وحرارة .
*توشكى تنادي . عليك يابلادي .
وفاتحة دراعها . للي سامعها .
الجو اللطيف . والخير النظيف . مستني الإشارة .
كلمــــــــــات : عصــام ميـــــره