قَسِّم حياتك
قَسِّم حياتك والوجع
تلقى البُدع
تلقى الألم محسوب فرح
تلقى الندم شجرُه طرح
تلقى الحبيب خان وأنشرح
بين كل ضلعة من ضلوعك اقترح
ساب وشم غاير من قرح
ساب ليك عذاب...ولايوم مرح
..
قَسِّم حياتك يا جدع
راجع دفاترك بالسجع
تلقى القبور
مدفونة جوا ف السطور
تلقى الحيطان متشققة
شاكية الفراق اللى أنزرع
على شط من بركان قلق
صبحت عرق
أنفاس وبتاعنى الغرق
صورة وباهتة ع الورق
كل اما يجى اسمها
تلقى الشَرَّق
وتحن تانى للى سابك تنْحَرَّق
..
قسم حياتك بالفصول
تلاقاك كسول
نايم ف احضان الخريف
ولا فيه ربيع
ولا شئ بديع
ولا فيه شِتاء
ولا صيف بيلسع جوا منك غربتك
ولا فيه حِكا
ف ليالى دايرة بوحدتك
وسط الوجع
اصحى وفوق يادى الجدع
الموجة عالية ومركبك
من غير شراع
ولا دفّة عارفه سكتك
ومفيش متاع
وحدك وداير ف الفضا
بس الجراح..هى القضا
حكمت عليا بالرضى
والامر من يومها أبتدا
مسجون ف توب اسمة الحياة
شريط طويل
لا أعرف بدايتة ومنتهاه
قسمت فية ولا قولت اه
من يومها عايش بالرضى
عايش معاه
رغم الوجع
رغم الفراق
رغم التجبٌر والجناه
لسانى عايش بالامل
رافع ايديا للسما
وبقول يارب
يا الله
رد مع اقتباس
المشاركة الأصلية كتبت بواسطة إيمان نور
