انا عاشق
ــــــــــــــ
رغم الليالى المره
والاه والانين
رغم البعاد اللى مابنا
من سنين
لسايا شايفك
لسايا شايفك جوه ف عيون البنات
لما بتضحك
يضحك القلب اللى حاير
لما بتغزل شعرها
وتعمل ضفاير
لسايا برسم لك دواير
ع الطريق
علشان تعودى
ونسيت عشانك غنوتى
وكسرت عودى
وحلفت لابدء من جديد
والحلم خدنى بعيد بعيد
وصحيت لقيتك مش معايا
لسايا
لسايا شايفك واحنا لسه صغيرين
والفرحه بتسرسب دموع
فوق الخدود
ساعه مانضحك
والسما حاضنه النجوم
ساعه مانبكى
لو ساعات غاب القمر
بين الغيوم
ساعه ماتنسانا الهموم
لسايا شايفك
لسايا شايفك رغم دا
والخوف ملينى
عمال بشوفك
وانتى ليه رافضه تشوفينى
انتى ايه ماتفهمينى
انتى حلم بيتولد مع كل نور
انتى ورده منبته والارض بور
مين بس هيردك
ولحد فين حدك
ولحد امتى هصوم ومش هسمع ادان
ما انتى اللى قلبك شدنى
ورهنت بيكى على الزمان
وخسرت فى الاخر رهانى
وبرغم ده
لسايا شايفك
ومهما برضه هتبعدى
هفضل اشوفك
علشان هواكى قسمتى
وحروفى مخلوطه بحروفك
هفضل اشوفك
ولو مكتوب لى اشرب م الاهات
ولو قطرك عدى عليا وفات
هكتب على جبين القدر سطرين
وهمشى من سكات
انا عاشق وعشقى مات
انا عاشق وعشقى مات