الجلد كرمش ع الضلوع
ذود لي همي
ريتك يادنيا
ترجعيني لبطن امي
او تولديني في دنيا تانيه من جديد
في عصر غير عصر العبيد
يكون لي حق الاختيار
طريق ومدخل للنهار
ينده باصوات الامل
النبت جي
الحب جي
مع هلت الصبح الندي
انسان يعيش بقلب حي
يختار لنا الزمن الجميل
وحمام يرفرف ع البيوت
عطشان هديل
تنعس علي صدور الصبايا غنوتي
والحب يغسل جنتي
والقاني شاعر
كلمته ساكنه القمر
بتوزع الحلم الجديد علي كل دار
دار المدار
يبقي الصغار
ازاي ح تقدر في الزمان ده
تتولد جوة المحار....