بصوا يا أهل العشق وشوفوا
شاعر مَيّت جٌوّه حروفه
شاعر حب ولما اتخان
قطع شعره وسَبّ كفوفه
هحكي حكايتي لإني الشاعر
إللي اتجرَّح واللي اتهان
لما عشقت ولما وفيت
قمت شربت الزُل الوان
............................
من بين كل الكون دَ بحاله
قلبي اختارها وسَلِّم ليها
طلبت روحي ... قلت: قُلَيّل
قلبي وروحي شْوَيّه عليها
قلت: ماضيكي ؟؟
قالتلي: نسيته
يومي وبكره هعيشه معاك
وانت ماضيك؟؟
قلت: مَلِيش
إنتي بدايتي يا أحلى ملاك
قالت: قبلك كان فيه ماضي
متخيلتش لحظه انساه
صوره فظيعه وواقفه قْصادي
فيها الجرح وفيها الآه
قلت: هداوي جراحك بايدي
وهخبيكي ف قلب وريدي
قالت : عمري مهنسى إديك
اللي اتمدتلي
ولّا إن انت وعدت تصونّي
وجَدّ .. وفيتلي
مكتوب ليا ان انت حبيبي
وانا فِ اللفه
وانا بحلفلك ..كله ف كفه
وإنت ف كفه
قالت : إنت حياتي وعمري
وكل ما ليّه
إنت الفرحه اللي اتمنيتها
وضَيّ عنيّه
وانها لو هتضحي بروحها
هيبقى شويه
قالت : إني أرَقّ حكايه
وان وجودها معايا كفايه
كنت بَصدَّق كل كلامها
كنت بخفف كل ألامها
قلت: هواها دَ حب حقيقي
نظره عين بتبللْ ريقي
أصلها راهنه حياتها عليّا
وانا راح اشيلها ف نن عنيا
وكمان هابني معاها حياه
حتى ماضيها كمان هنساه
بس ياريتني مكنت نسيته
علشان هيا كانت فاكراه
جه قدامها ف لحظه ناداها
سابت قلبي لوحده غريق
قالت عادي بكل بساطه:
يَ احمد...إنت أعز صديق
شُق طريقك وانسى غرامي
إنت ملكش معايا طريق
قالت قالت ..بس يا ريتها
- مَ قالت شيء -
.........................
ما اتخيلتش إنها لحظه
هتغدر بيا
كنت بصدق دمع عنيها
وخوفها عليا
بندم إني ناديتها ملاكي
دخلت قلبي وناويه هلاكي
بعد ما كانت سر حياتي
خلّت قلبي المغرم باكي
بندم إني كتبت قصايدي
إللي تعدي الألف ديوان
غدرها خلّى الكون ف عنيا
إسود ف اسود مش ألوان
وانت يا قلبي ازاي هتفرّق
إللي بيوفي من الخوّان
إللي بيصدق لما بيحلف
م اللي بيحلف بالبهتان
........................
كنت الشاعر وآدي حكايتي
شُفْتوا يا أهل العشق نهايتي
آدي جزاتي لَإني وَفِيت
واني بصدق عشقت هَوِيت
هكتب تاني قصايدي لمين
واكتب لي وانا قلبي حزين
آخر مرّه هقولكوا فيها
أغلب ناس هما ولاد آدم
وبنات حوا - مهما هيوفوا -
أكيد خاينين
وبنات حوا - مهما هيوفوا -
أكيد خاينين
الشاعر / أحمد سعيد موسى
5 / 6 / 2009
دمتم مبدعين
رد مع اقتباس
المشاركة الأصلية كتبت بواسطة نادية بوغرارة
