مجنونواحد مواطن – الله عليه – مجنون !!!!!!
ماشى بيضحك فى الشوارع على كل شكل و لون ..
لا همـّـه سوق مفترى و لا تاجر يغش زبون ..
و الثروة و اللى محتكرها واحد من المليون ..
مش مننا هُمـّـه .. دول من بلوتو هُمّـه أو نبتون .
هذا المواطن أنا قلت له يا عم :
إيه بيضحكك وسط هم و غم ؟ ..
" سيبنى يا خالى فى حالى خللى عندك دم !! ..
لو كنت عاقل تقوللى بذمتك إيه تم :
بعقولكو يا عاقل .. دا انا عندى الجنون أكرم .
تبص تلقى عندنا : إن البلاوى كتار ..
جنبك فى فلسطين تلقى الدما أنهار ..
أما العراق : وِلـْعت فى ربوعه النار ..
و الغرب طايح فى المسلمين : قتل و خراب و دمار..
و احنا – ياعينى – غرقانين فى الهيافة و الطبل و المزمار.
لا جوّه لاقى فى حياتى متعة ..
الدنيا لا بتنظر إلىّ , و لا للفقير سامعة ..
ييجى وزير – مفروض يولع فى الطريق شمعة - ..
يخلق مشكلة تشعلل فى النيران الوالعة ...
قال يعنى البلد ناقصة , نضيف للبدع بدعة ..
لو سبنا أرض العرب , و قصدنا العاصمة كابول ..
لا تسمع سوى صوت القنابل اللى نازلة تقول :
يا ويلكم .. دوقوا بأسنا يا للى آمنتم بأحمد نبى و رسول ..
وحوش الأمريكان اللى ولوا على رأسهم غول ..
الإسم بوش , لكين الصفات : أحمق غبى مخبول .
طب حوّد يا سيدى - قبل ما تيجى - على الشيشان ..
قتل الصقالبة من أهلها المسلمين .. قد إيه إنسان ؟ ..
شباب و بيحارب عشان حقه , و عرضه و الأوطان ..
و المسلمين طنشوهم و كأنهم مش أهل للإيمان ..
و الغرب واقف بيتفرج .. شامتانين فى أمة القرآن .
كل ده يا أيها العاقل وتستعجب ليه أنا مجنون ؟
طب دا انا اللى باستعجب : لسه فيه عاقل فى هذا الكون ؟
باين يا صاحبى إنى لوحدى العاقل .. سامحنى يا أخى .. باردون ..
سيبنى فى حالى و روح دوّرعلى مثلك :عاقل متزن و رزين ..
أما أنا .. فبطلب من المولى القوة و الصبر الجميل و العون ".
مصطفى سلام