لذاك الطهر الذي رحل
أهدي : قطار العمر ..
يا قطار العمر وقف لاتروح
طال مشواري وقلبي ينتظر
أحسب الخطوات بدروبي جروح
كل خطوة جرح ونيران وجمر
مل قلبي من البكا دايم ينوح
وإن نخيته زادني هم وقهر
أحفر الآمال وأبني لي صروح
كلها قوة مع عزوم وصبر
وأرجي شمسي مير ما إلها وضوح
طال ليلي طال واضناني السهر
ليه ياربي ابو وجهٍ سموح
غاب وخلاني بلا شمس وقمر
بعد ما عطره على كفي يفوح
راح ما سلم ولا حتى اعتذر
مالقيت بغيبته وجهٍ صبوح
مابقى لي غير انفاس العطر
انخرس صوتي ولا أقدر أبوح
يوم جسمه صار بأحضان القبر
وانتحر حلمي على ذيك السفوح
طاحت اجبالي وعودي انكسر
والفرح عقبه جفا دربي شحوح
لاسحابة ارتوي منها مطر
لا ولا حتى سراب لي يلوح
اسبره واملى عيوني بالنظر
يالله بعفوك كريم يا صفوح
اكفني يارب تصاريف القدر
واملى قلبي من رضاك وصبر نوح
واكفني من شر ضيمات الدهر
تحيتي لكم ولعبق مروركم