مبروك نجاحك يا قمر
يا اللي القمر من كُتر حُسنك
خاف يبان
نظرة عيونك فيها فجر
و بين رموشك يترسم بحر الحنان
لو ادق بابك .. إفتحى .. لجل النبي
دا انا قلبى ليكى على أحاسيسه حِبي
و البسمة منك مطلبى
ما تردنيش خايب قصاد كل البشر
ان جيت اقول
مبروك نجاحك يا قمر
حضنك أمل
و الفجر بيكى بيكتمل
يا ضي .. إحساسه البرئ
خلانى اكون أجرأ جرئ
و امسك إيديكى واضمها
سامحينى ..
يا من كنتى حلمى و منتهاه
دا هواكى عندى بلغ مداه
و انا كل قصدى يا روحى اقول
مبروك نجاحك يا قمر
الورد قالها للنسيم
خلاه يهيم
و يسيب طريقه المستقيم
و يقول عشانك ..
راضى اموت
أو حتى يدبحنى السكوت
لكنى لا يمكن أفوت
فى طريق عبيرك مرّ فيه
و ما اضمهوش
ما اقدرش احوش .. نفسي ..
وانا اللى قصاد جمالك بانكسر
مبروك نجاحك يا قمر
يا حنيّنه
هوا الحنان للخلق دول .. إلا أنا
بافرد أحاسيسى على وش السما
و اكتب بحبات النجوم اسمك ..
يا أجمل ملهمه
لكن برق البعد بيبعتر حروفك ..
فانمحى
بس انتى لو يوم تسمحى
أفضل معاكى ..
بدون يا عمرى .. ما تجرحى
قلبى اللى بالحسن انسحر
هافضل على طول السنين
انشد و اقول
مبروك نجاحك يا قمر
كان ليا قلب
فى قسوته ملهوش مثال
عمره ما حب
و كان تملى يقول: محال
إنه فـ بحور العشق يسبح أو يخوض
لكنه يا خسارته اما شافك
انتهت كل السدود
و انكوى بنار الدلال
و كتير يحاول الاحتمال
لكنه دايماً ينهزم
و برغم انه كتير صبر
لكن خلاص اليوم فشل
و انتى اللى تستاهلى النجاح
و انتى اللى قلبك انتصر
مبروك نجاحك يا قمر
شعر:
حسن صلاح حسن
( هذه القصيدة من قديم ما كتبت، فهي مكتوبة في يوم الإثنين الموافق 8 من شهر أبريل عام 2002، فعذراً إن وجدتم تفاوتاً في المستوى بين القديم والحديث)