قصيدة (بليغ الحب) للشاعر سجاد سيد محسن
لأن حبك قصيدة ابلاية مطلــــــع
بس بالحيره صـدّكَ قانـــع اني
وانت فوكَ الاول مـــــوش اول
لــمن جاورك حســـــــبوه الثاني
يلن حسنك صبح رخصة للانفاس
يكتَــب عالهوه وصف الـــــــمعاني
بليغ الحب وصلت وعالم احباب
ومنقــّـب عالكَلب فاسه سـراني
كَمر فوكَ البحر وشما كصة الليل
ثابت والشمس ضيهه غركَ بيــــــــــه
اذا دهرك يراوي الناس اشكال
انت ادهور منسيــــــــــه تراويه
يلن ظلك الكحلة وجنك العين
وتتجمل العين اللي تصد لـــــــــيه
الدايس ترابك باس جــــــــــدمه
وصل قمه وبعد محد يحـــــــــــــاذيه
يلن شايل جمال ومشكلة وياك
مره اتشيله مره هوه اليــــــــــشيل
يلن اسمك مطعَم ورد مطحون
وابحسنك تغلّب عالهـــــوى الحيل
ميـــــدوزا صبح يعبد عيـــونك (1)
وبلا اسمك جمال يصير تأويــــــل
مو عرش الحِسن علوك عالتاج
مملكتك ذهب وانت أشذر الجيــل
انت شهريار مقلص أزمـــــان
الألف ليلة بشفاهك فرد همــــسه
يلن روحك تزكَزكَ بين الرموش
يلن وجهك اصل ولحسنه رســــه
يلن صوتك عذب ذكّر النسيان
لأن من يسمعك يغفه ومينســـــــه
يلن للحب حضارة احشاك اثار
منهو للحسن متحف ابنـــــــــفسه
سفوحك من عسل مزروعة بالتوت
يلن حاكم الليل بتهمه ســــــــهره
يلن شوفك يغطي الما يغطيــــــه
يلن حتى الورد بالندى اتسكـــــره
غيمه وسوده رمشك ندعي ميروح
يــمطر عاليشوفه ابهيده ســــــطره
صح نبجي لجن ما تدري بيـــنــه
بــــتراب الكحل ندفـــــــــن ألعبره
وتلجمنه وتسلم حتى نـنســـــــى
وألـــجمنه نكَــــــــــلك حتى ابره
و تضوي النه الدرب بالضيّ الأسود
وعيـــــــونك وسط الصباح كَمره
الشاعر سجاد سيد محسن
____________________________________________
(1) ميدوزا : - اله عند الأغريق كان أي شخص يراه يحجره بنظرة عينه كله.