البدايه
عارف ياصاحبى هيه إيه .. !!
.................................
البدايه نطفه قذره
والسكن إيه فى النهايه !!
جيفه ملفوفه ف ملايه
رمه نتنه
والحدود
كل سنتى يشغى دود
والصديد مالى الفراغ
بص شوف بين الخدود
واللسان اخرس جبان
ياما زيّف ياما خان
ياما غالط ف البيان
قوللى إنته تسوى إيه ...
وللا أصلا كنت إيه ؟
كنت هابط م الفضاء ...
كنت شعره ف ريش ملاك !!!
عاوز اقولك وانته عارف
انك انته كنت نطفه
كات ف لحظة فكره طايشه
يعنى حشره ف شكل دوده
راكبه من يومها الهلاك
يللا قوم ابرى اللسان
قوم وقول رتّب كلام
من غير كسوف هات الوصوف
إغلط فى حقى ...
قول كمان
عيش الغرور والكبرياء
عيش العته
إغرق جنان
مهو إنته فوق
أنا بانصحك ...
يمكن تفوق
ولأنى ذوق
مش هاضربك
ولا هاجرحك
غير بس ساعة ما المحك
هانده بشوق
على بنت حره
مهره أصيله طيبه
شاربه الجمال
من قبل منه انهارأدب
جايبه الدلال وباليمين
وفى الشمال
شايله لقلبى ألف كيلو م الحنين
د انا عمرها من ألف عام
على الدوام طول السنين
مكتوب لها
ويوم ما اموت ...
راح اندفن ف قلبها
خليك صريح
يابو اللسان عامل فصيح
طهّر صراخك م الرديح
لو كنت نابغ وبصحيح
تعالى نقراها سوا
وانده لحكّام الهوى
خللى الكبار ويا الصغار يتفرجوا
ويحللوا
وينظّروها كلمتك
همه أكيد راح يشهدوا
وانا ضمنهم
إن انته أصلا موهبه
راقٍ البيان
وبمعلمه تُحْسد عليها
إنما
جوه سطورك معضله
متلونه متزخرفه
بس اللى يقرا من جديد
يلقى المعانى من صديد
النيه بيه متغلفه
بلفظ ساحر أبّهه
يدخل القلب السليم
بنيه صافيه يمدحه
والنص حكمه فى الصميم
مولود دميم
لافف أساسه بعنصريه
بدون مبرر ، مفرطه
مقززه
ميِّزت نفسك ياكليم
ميِّز كمان
إشبع كلام
إيه الأماره ؟
بأى دين ما تقولنا...
إيه العباره ؟
إرجع ووحد ربنا
رب الخلايق كلها
رب القلم
رب المعانى والبيان
رب الآداب رب الحِكَمْ
خد من رسولك قدوه ليك
يمكن بسيرته يحيى فيك
حبة قيم
عرفت إيه هيه الروايه
ياسيدى هيه فى البدايه
نطفه قذره
والسكن إيه فى النهايه
جيفه ملفوفه ف ملايه
رمه نتنه
................
من كل قلبى أنا أشكرك
أحمد حاتم