مين اللي باني الهرم
وانا جوا قسم الهرم
في الحجز عند البيه
شوفت الألم من قلم على وش واحد ....ليه؟؟؟؟؟؟
مسكوه بيفتح أوي على أرض مصر عنيه
بيدوس تراب الهرم عادي كده برجليه؟
بس السؤال كان عجب...........
- فين ياغبي الكارنيه؟؟؟!!!
- أنا كنت جايبه ووقع آسف سعادة البيه
كان لازم اعرف بقه ..أصل القلم كان ليه
*****
جه دوري في المشرحة
- أأمر سعادة البيه
- قولى الإجابة وبس
- هوا السؤال كان إيييييه!!!؟؟؟
- مين اللي باني الهرم؟؟؟؟؟؟؟؟؟؟؟؟
- إديني فرصة يابيه
أنا شكلي مش محترم؟؟؟؟
ولا عملت انا ايييييييييه؟؟؟
أنا قولت اشوف الهرم
مش ذنبي مي الللي بانيه
عمري ما شوفت الهرم
غير بس في الافلام
وف درس في التاريخ
والنت والإعلام
هوا اللي باني الهرم ... زعل سعادة البيه؟؟؟؟؟
ولا الهرم مش هرم ...... واحنا دحكنا عليه؟؟؟؟
- بطل لماضة وقوووول؟
- والله لو اعرف اقول
ما انا قولت مش معقول
بيقى اللي باني الهرم واحد غبي ومهبول
انا عارف اللي عرف ...لكن حلف مايقوووول
- قولى على اسمه اوام ؟؟؟؟
- اسمه أبونا الهول
هوا اللي شاف الهرم مين اللي حطه هناك
هوا اللي قاعد حرس يحرس صخور أملاك
هوا اللي عامل أسد خلا الديابه هناك
- خده تاني يا عسكري عالحجز لما يخف
شكل السؤال لخبطه خلى عروقه تجف
بكرة هجيله اسأله اياه يدور ويلف
خدني معاه عسكري رابط فئيدي كلبش
كلبش معاه الأمل خلاني زي الكبش
مستني يوم ما اندبح أصلي هنا ماعرفش
ماعرفش إيه السبب اني بقيت ف كلبش
*****
عدا عليا الليل
بحلم بلون النيل
هوا اللي عارف بقه
مين اللي باني الهرم
مصري أكيد يا نيل؟؟
ولا دا دور تمثيل؟؟
عايزين يبيعوا الهرم؟؟؟؟؟
ما الغاز لإسرائيل!!!!!
لو قولنا كان فرعون
هيقولوا كنا عبيد
شغلنا نبني الهرم
وانتوا بتسقوا النيل
هنقول بناه عملاق
عمل الجبل أنفاق
خلا الهرم للزمن يشهد على العملاق
هطلع عميل للعرب
كله نفاق في نفاق
*****
يا اللي بنيت الهرم مالي انا ومالك؟؟
عايز في أرضك أعيش خليك بقه ف حالك
قولى بنيته ليه ؟؟
طب قولى ذنبي إيه؟؟
ساكن في أرض الهرم كل الأجانب ليه؟؟
صارت حرام ع الوطن يلمح صخورك ليه؟؟
لما بنيت الهرم ما بنيتش اسمك ليه؟؟؟
لما بنيت الهرم ما بنيتش اسمك ليه؟؟؟
******
الفجر جه يا وطن
قوم رجع الاهرام
انت اللي باني الهرم
مش باقي غيره حرام
هيخصخصوه يا وطن
من غير سلام وكلام
شكرا يا مصر الهرم
عاللي جرى أو كان
السجن أصبح وطن
وحيطانه ليها ودان
عشماوي شال الشنب
بقى كله زوق وحنان
والحبل مش مشنقة
مرجيحة للزعلان
لما هييجي البيه
هكدب واقول انني
آني اللي باني الهرم
رافع صخوره عليه
آني الي جدني انقتل
لما التراب جه عليه
آني اللي سيدي اتعمى
لما دخل في عنيه
أسمي ايجيبت يا بلد
اسمي ايجيبت يا بيه
يا مصر نيلك سأل
وآني جوبت عليه
آني اللي باني الهرم
مش حد تاني يا بيه
آني اللي باني الهرم
مش حد تاني يا بيه
رد مع اقتباس
المشاركة الأصلية كتبت بواسطة رنيم مصطفى
