دولة مؤسسات
(رد على مقالة سمير رجب فى جريدة الجمهورية القاهرية بتاريخ 24/6/2004 بعنوان ...حقاً نحن دولة مؤسسات...)

حقاً نحن دولة مؤسسات
كل شىء فيها ماشى
بالأصول والقانون
والتشريعات
حتى بص شوف جيرانّا بيحسدونا
ع النعيم اللى احنا فيه
واللى جاى واللى فات
حقاً نحن دولة مؤسسات

كل واحد فينا عارف
كل حاجه عن حقوقه....
وعن حقيقة واجباته
والمسيرة ماشية فعلاً بانتظام
مش مهم مين بيحكم
او مهم مين ح ييجى بعده يحكم
طول ما فيه موجود نظام
حقاً نحن دولة مؤسسات

والصحافه هىّ أكبر مؤسساتنا
بتحاسبنا وتراقبنا
وتواجهنا بالحقايق
هىّ فعلاً سلطه رابعه
تلقى فيها الكلمه حره
واضحه صادقه
بص شوف معايا
قلِّب ف الجرايد

إقتصادنا كل يوم ف نمو زايد
مفيش خلاص ديون علينا أو فوايد
الجنيه بتاعنا طالع ف العلالى
والدولار ليل نهار عمّال يلالى
سيادته أصدر توجيهاته
والوزاره ماشيه بس بتعليماته
سيادته قام, سيادته نام
سيادته ماشى بينا دايماً للأمام
سيادته قال، سيادته عاد
وف كل صفحه....
بدون مناسبه
أو ميعاد
تلقى دايماً
صوره ليه
أو كلام عن لسان المدام
أو عباره قالها واحد م الولاد
حقاً نحن دولة مؤسسات

والغريب والعجيب
واللى أعجب م العجب
بعد ما كان زمان
العقل يسبق العينين
ويطير ويوصل للسحاب
ويشوف معانى الصدق
واضحه ف كلمتين من بهاء
أو روايه للحكيم
أو قصيده من جاهين
دلوقتى قال مكتوب علينا
ندوق مرارة الكدب واضحه
ف كبسولات سمير رجب
حقاً نحن دولة مؤسسات
إسكندرانى

28/6/2004