فلوسك حلال..
يا عايش بقرشك
تقلّب ظروفك
على كل حال
يا عائل لأسْرة
وبيتك يا حسرة
يوماتي يهدد
بماتش اعتزال
ويرجع
على آخر الشوط
فيحسب
بدل وقت ضايع
وتِسْلَك يا خال
برغم ان قرشك
ده برّاوي جدا
ما يلحقش يدخل
على المحفظة اللي ف جيوبك
ويصْبح
ما بينهم وصال
كأن انت بتشيل
مَحافظ "تيفال"
فلوسك حلال
يا عايش حياتك
و يا حسرتاه
على كل مصري
إذا فـ مصر تاه
وحَمّلتُه دعوة
في صيفه وْشِتاه
واقول فوق لنفسك
واقول مِد يابا
وحاسب
على خطوتك
م الديابة!
واقول يا بلدنا
دلالك طبيعي؟
أكيد ولاّ
بتفكري انك تبيعي؟
طب اشمعنى إبنك
كسير الجناح؟
ويطلب رضاكِ
يقول غير مُتاح؟
ولو مرة أرفعلي
لو بس راية
يا اخش ابو زعبل
يا اخش السراية
بقولك تعبْنا
ولو عيبي صبري
أنا كرهت عيبنا
ومين اللي قالّك
سكوتك عجبنا؟
ده أصلا مطلَّع
عينين اللي جابنا
محسسنا ان احنا
عَندك رهينة
وهو انتِ فعلا
كده بتكْرهينا؟
ومهما اتسحلنا
ومهما اتمسَكْنا
أكيد بردو شايفك
كما الحرف ساكنة
وراكنانا جنبك
كده ف أي ركنة
وقدّامنا خطوة
في سكّة زوال
نشوف كل غلبان
برغم اللي فيكِ
مكمل وعال
برغم ان
كل اللي فيكِ ابتذال
فننظُرْ له
تغْلِبْنا عنده ابتسامة
نطبطب .. نقول له
فلوسك حلال!