حاجي تتبكبك

حاجي تتبكبك

كان الجرح يوسع ...
والدمع بيزيد ...
والنار عم تلسع ...
ضو الحلم البعيد ...
ما شكى همو ...
إلا للقمر الجديد ...
فتح كل قلبو ...
وشد الايد بالايد ...

كان الجرح ...
والجرح بيطول ...
والاسى يكثر ...
والفرح بيزول ...
الشغل عما امارو
والهم دفن دارو
والناس كلها بتعلى
وهو بنزول ...
كان الجرح ...
والجرح بيطول ...

جالو بشي يوم ...
يبكي دمع اللوم ...
شهر صرلو ...
ما ذاق طعم النوم ...

وهو عم يحكي
وقع من احمالو ...
التعب هدو ...
والفرح صدوا ...
كل هموم الدنيا
تلة من جبالو
يا حيف العمر مر
وراح زهرة جيالو ...

وبين الحياة والموت ...
راح ليشكي همو ...
سمع شي صوت ...
حرق باقي دمو ...

" حاجي تتبكبك ...
بكفينا اللي فينا ...
بهمومك تشربك ...
احنا ما يعنينا
حاجي تتبكبك " ...

لملم كلماتو ...
وجمع دمعاتو ...
وقال بصوت ...
أعلى من الموت

" ما عاد رح اتبكبك ...
وقسم بالدم ...
ياللي علي الارض سال ...
قسم بالقلب ان بعد فيو حمال ...
لحرق دموع الدني واعمل منها حبال ...
وأشنق اللي جرحني ...
وأعمل من شراينو سنسال ...
وأحفر قصص ما بتنقال ...
وأحكي عن وطن حبو ما زال ...
وأحكي عن السنا بنص المنا اغتال
عمري اللي انقضى و ما طال ...
قسم بالدم
ياللي ع الارض سال ...
قسم بالقلب ان بعد فيو حمال ...
لحرق دموع الدني واعمل منها حبال...
وأشنق اللي جرحني ...
وأعمل من شراينو سنسال ...
وأحفر قصص ما بتنقال ...
وأحكي عن وطن حبو ما زال ...
وأحكي عن السنا بنص المنا اغتال
عمري اللي انقضى و ما طال ...
قسم بالدم لكتب معلقتي ...
معلقة تنحكى ع مر الجيال ... "

ثوري...

الله عليك أخي ثوري

ما هذا الجمال!!!

كلمات جميلة احاسيس روعة

ابدعت أخي بكل معنى الكلمة

أسجل اعجابي بما نثرت هنا من جمال

لك خالص الودي واحترامي مع باقة من زهرة السوسن

أختي سحر الليالي
أشكر لك هذه الكلمات
وأشكر مرورك بين حروفي

حينما يقرأ حروفي أي شخص ...
أشعر بأني ما زلت حياً
وان للأدب مهما هان رصيده في الوطن العربي ( وطن )

ما دامت الاقلام تذرف جراحنا
وما دام الفقراء يفترشون التراب
ويلتحفون السماء
ويقضمون كسرات القهر على مهل
ويقضمون أظافرهم بارتكاب موجه ، متسكعون في أروقة احتضارنا
وما دام الوطن المحزون ينزف
فلن يعانق الحبر غمده

للذين يمنحوننا شرف الكتابة ويلهموننا بمآسيهم نصوصنا

أرفع رأسي قدر المستطاع
لأطبع قبلة

لك من أعماق الفؤاد المسيج ألف وردة

ثوري...