عفواً

[حلمى عمر]

عفواً
------
انى دخلت بدون تقديم
وانّى فتحت النار على قلبى
فجرحت حبايبى
البوتيكات بهرتنى
والفتيات فى الشارع
حلّت ضفايرها وشنقتنى
لما دخلت الجامع
والشبان الشهدا فى بلد الامن
عرفوا ازاى يعترضوا ... فماتوا
-----------
عفواً
انى بتكلم وانك سامع
احنا فى بلد الامن العام
والامن المتمركز
وملاجئ امن الدولة
حيجينا منين الخوف أُمال؟ !
واحنا فى بلد الحزب الحاكم
والمتحكم فى نزول المطر الخير
ف..على الفقرا الف سلام
------------
عفواً
بأتكلم ببساطة شديدة لانى بسيط
الناس فى شارعنا .ومدينتنا
الناس الفقرا جوه فى بيتنا
قلقانة
بردانة فى دواير دهشة مالهاش حد
وبتتسائل
هيه دهيه حقيقى بلادنا
وبيحصل فيها وفينا ده كله بجد
الناس فى بلدنا
اسئله حيرانة ومالهاش رد
والشعر ماعدش بيطلع
زى خطاب الريس
متفائل جداً وغريب
وكأنه بيتكلم من كوكب تانى
ولناس تانيين
والواحد فينا بيسأل نفسه
امتى يحكم مصر بلادنا
واحد مالمصريين

----------
عفواً
انا شعرى حزين
وانا عمر شفايف شعرى
ماعرفت طعم البسمه
ماعدتش اشعارى بتصبر حد فى بيتنا
ماعدتش بترمى
حفنة ضى فى امسياتنا
ماعدتش بتقنع امى
الفهمانه الدنيا حقيقى
من غير ما سواد مطابعنا الاميرية
يترك اى علامة فى ايدها
اويتراكم
امى الفهمانة الدنيا حقيقى
لمّا بتسمع اى كلام فى النشرة
بتضحك
وبتدعى عالحزب الحاكم
---------------
عفواً
لما نبينا يوسف
أفتى بسبعه عجاف
نط أبينا حورس من تابوته وقال نطمن
احنا فراعنة
وان كان موسى ادانا السلم
كنا طلعنا لحد السما وفتحنا الكون
لازم تفخر انك مصرى
أصلك مالاول فرعون
-------------
عفواً
من يوم ماأنتفض الطوب
فى ايدين الاطفال
فى الارض المحتلة
حسيت وكأن ذنوب العمر دا كله
بخضوعه وقهره
ودموعه وذله
بتتحول جبلايه بتخبطنى فى راسى
فخلعت مداسى .. واتوضيت
وركنت اسآيا عالحيط ..
وبكيت !!!
---------------
عفواً
العجز فظيع
وتاريخنا العربى
اتغير كل ملامحه من كتر الترقيع
والحرمان بيعلم انك تكدب
انك تسكت ... او هتضيع
الحكام فى بلادنا
صورة فى برواز
محتاج تلميع
واحنا شعوب سمّيعه .. ولمّيعه
وهتيفه ....... وحريفة تطبيع
احنا لو شالونّا الحَلمة
حيطب الواحد فينا صريع
عفواً
------------
حلمى عمر

[نبيل مصيلحى]

الجميل / حلمي عمر

يشرفني حقيقة أن أكون أول من يقرأ لك ..
بداية قوية بقوة أدواتك وملكاتك التي سخرتها لكتابة هذه القصيدة الهادفة ..
ويبدو أنك متابع لحركة شعر العامية , ولأحداث الواقع ,
كما اتحسس ثقافة واعية في مضمون قصيدتك .
أهلاً بك أخي الشاعر الجميل حلمي عمر
نبيل مصيلحي

[حسام القاضي]

الأخ الشاعر الجميل / حلمي عمر
السلام عليكم ورجمة الله وبركاته

أولا مرحبا بك في واحة الأدب والفنون

قرات قصيدتك الجميلة المشحونة بالمشاعر الصادقة
والمهمومة بهموم الوطن .. وطن الناس
قدرة عالية على التعبير عن الفكرة
أسلوب راق متميز ، ولغة فريدة

العمل بأكمله أكثر من رائع

ولكن دعني أقتبس منه ..

ما عدتش أشعاري بتصبر حد في بيتنا
ما عدتش بترمي
حفنة ضي في أمسياتنا
ما عدتش بتقنع أمي
الفهمانة الدنيا حقيقي
من غير ما سواد مطابعنا الأميرية
يترك أي علامة في ايدها
أو يتراكم
أمي الفهمانة الدنيا حقيقي
لما بتسمع أي كلام في النشرة
بتضحك
وبتدعي ع الحزب الحاكم

مقطوعة عالية جدا تكتمل فيها كل عناصر النجاح كباقي القصيدة
كلمات ذات دلالات عميقة للغاية لا يكتبها إلا شاعر قدير

أشكرك يا صديقي على هذا الإبداع وننتظر المزيد.
دمت بكل الخير.

[علاء مسلم]

جميله تلك الكلمات وما كان من لدنك هنا
ثمة ألم يعتري كلماتك يجسد صوره للواقع
صلبه كالصخر تلك الاسطر
تنقلت بنا من ضفة الى اخرى لترسم لنا لوحه تحكاي
احرفها الورق
سعيد بما كان هنا من لدنك
في انتظار كل جديد لك
سجل مروري من هنا
كنت بالجوار من احرفك ونعمت بلوحة من نكهه مختلفه
لك الود

[د. فوزى أبو دنيا]

عفوا
كان لازم اقعد وانتظر
واقرا الكلام
واجيب معايا م الريفو بريال
اصل الكلام عدل الدماغ
ومخدناش ان دماغنا ينعدل
ولو انعدل يبقى انبدل

:NJ: :NJ: :NJ: :NJ:
تحياتى المعطرة باريج الورد :hat:
دمت بالق :014:

:noc:

[حلمى عمر]

الاخ العزيز نبيل مصيلحى
كلمات بحجم القصيدة واكبر ورأى محل احترام وتقدير كبير . مرورك اسعدنى
وارجو ان اكون دوما عند حسن الظن .
تحياتى وتقديرى لشخصك الكريم ،،
حلمى عمر

[حلمى عمر]

الاخ الكريم الجميل / حسام القاضى
كلماتك تحية ود وصدق فتحت أمامى ابواب خير ورفقة محبة ارجو ان تدوم ..
حاولت ان ابدأ دخولى الى منتداكم العامر بالمبدعين بتحية سلام فكانت قصيدة ..عفواً ارجو ان تجمعنا التذكارات الصعبة واللحظات الشائكة وتوحد بيننا
حين نفكر ،،، وحين نغنى .
مع خالص تقديرى لكلماتك المخلصة وقلبك الكبير .
حلمى عمر

[حلمى عمر]

الصديق المبدع / علاء مسلم
اشكرمرورك الجميل واتمنى ان استحق بعضا من فيض كلماتك العذبة .
تحياتى وتقديرى لشخصك الكريم .
حلمى عمر

[حلمى عمر]

الشاعر الجميل ... د. فوزى أبو دنيا
سلامتك من الصداع وتسلم من كل الاوجاع .. كلماتك الحلوه مثل اشعارك
المغردة فى رحابة المنتديات واتابعها بكل التقدير والاحترام ، أتمنى لو يدوم الوصل والحوار دونما خوف من الاشرار .. وربك هو الستّار.
تحياتى وتقديرى ،،
حلمى عمـــر

[أحمد حسن محمد]

حلمي عمر
وطي يا شيخ صوتك..
ولا انت ناويها
تكتب عليك موتك
وساعتها مش هاقدر
من غير عيون شعرك
أكتب هنا شعري
يا حلمي يا صاحبي
قول "الجمال صاحبي"
قول "الهنا صاحْ بي"
قول أي حاجة يا صديقي
عشان تمر
زي النسيم على قلب زوار الفجِر
فاهمني يا حلمي عمر
خايف عليك يا صاحبي والله
قتلوا الفكاهة والهنا الواهي
وانا جيبي اهو فاضي
من ضحكته العاليه
أحولنا هي عاجباك؟؟
منها دا ولاّ دي

ولا يا صاحبي قول
ووراك أنا عايد
مهما الطريق هيطول
قلبي بروح قولك
يفضل هنا قايد

[حلمى عمر]

الاخ الجميل / على سالم الصالحى
سمعناها زمان من عمنا الشاعر د. يسرى العزب بيقول ايه:
اذا خوفت .. ماتقولشى
واذا قلت .. اوعى تخاف
الخوف اذا حط حمله علكتاف
زيحه بأيديك ..
لاتخاف ولاتختشى منه
لاتبتعد عنه ولاتخليه
اقف محلك محله .. واديه
بعزم مافيك من الخوف القديم
اديه .. خلّص عليه ... خلّص عليه !!
-------------
عزيزى على سالم الصالحى .. أو أحمد حسن محمد، مهما يكن .
اشكرك على التصريح بالوجع .. ايوه كده انت الجدع !
حلمى عمر