إيه رأيكو يا جماعة الشعبي لما نساجل زي بتوع الفصحى تمام

[أحمد حسن محمد]

إيه رأيك يا جماعة الشعبي
لما نساجل..
زي جماعة الفصحى هناك

أنا رحت لْهم
وأنا في شوقي
أكتب إلْهم
زي الباقي
بس الحرج الطاغي عليّه
ما سمحش لْقلمي أنه يحدث
قال اختش دا جماعة الفصحى
فاستأذنت بكلمة وعديت
كانت بردة بالعامية
أيه رأيكو يا أهالي الشعبي
أنا مش غاوي، لكن حبي
ليكو بيغمس روحه ف قلبي
وأهي إْضافة لأهل الواحة
أم الكل الغالية النعمة اللي بعتها ربك من عنده كالوردة الفواحة
قلتم إيه ؟
نبدأ امتى وفين وبإيه؟
ولوبيرضى الفصحى نضم الصوت والصوت
تبقى إضافة أكتر وأكتر ضد الموووووووووووووووووووووو ووووت
والموت مكتوب
لكنه يا دوب
ع البنآدمين
ويارب هتفضل واحة الخير الغالية لكل المشتركين

[أحمد حسن محمد]

يا جماعة الصفحة بتتشكى
مفيهاش غيري أي مشاركة

[علاء عيسى]

أنا ويَّك يابو سالم قول
إكتب وابدأ قول على طول
تلقى القلم الصاحى معاك
كل ماتطلب تلقى النول
&&&
بس اسمحلى نحدد حاجة
يعنى انعنون أيها حاجة
حدد للموضوع اياه
يعنى مساجلة تكون بديباجة
&&&
أظن كلامى وصل يابو سالم
يبقى كلامنا يكون له معالم
مش لمجرد اننا قولنا ؟!
لازم نجذب كل العالم

[أحمد حسن محمد]

بص يا عم علاء أنا فاهم
لكن مش عاوز تقييد
احنا هانكتب فيها قصايد
ونعلق بقصايد برده
يعني مفيش في الصفحة دي حاجة
ممكن تتسمى بـ "ردود"
اكتب على وزن واحد سبقك
اكتب ولافيشي هنا حدود
لاجل نشوف الأنفاس توصل
بينا لحدّت فين يا صديقي
ليك أنفاسك وكمان ليه
بس طريقك جنب طريقي
ادخل علشان تعرف أكتر
في صفحات الشعر الفصحى
تحت العنوان دوّا "مساجلة"
للدكتور الغالي جمال
والحمد لربك يا عزيزي دي قصيدة فْ وضع التثبيت
راح تلاقيها بدون ما دّوّر أول ما هتدخل م البيت
وعشان نبقى يا صاحبي كمان
على نور أكتر ..
طبعاً قدّ ما في الإمكان
آدي الرابط
https://www.rabitat-alwaha.net/showthread.php?t=10699
ياالله بقى ورينا الهمة
إبدأ واكتب أول كلمة
بس الأول
هات الناس وكمان عرفهم
أن احنا بنبني يساعدونا
أوفي أقله يجيوا معانا
وبكلمة حلوة يشاركونا

[حسنية تدركيت]

بحق رائعة رغم انني لا احسن الابداع بالعامية احيكم على جمال ابداعكم
تحية من اختكم ندى الصبار

[علاء عيسى]

ياكل من فى القاعة
اسمعوا وعوأ
فتحنا المساجلة
ياريتكو تتجمعوا
نشارك بعض فى مساجلة
يالله ادخلو حالاُ
ياريتكو تتشجعوا

[صابرين الصباغ]

انا ممكن اشارك ياجماعة

بقلمي ساعات وكمان

مايك مع سماعة

بكتب عاميه من نار

مش بقلم

لا دى بولاعة

واحب حروفكم

ترويني

معلشي مش بشبع منها

انا اصلي

بطبعي طماعة

اقعدوا بالعافية مش

بمزاجكم

وراح اشارك من

دي الساعة

[علاء عيسى]

ولنبدأ إذن
" أغراب فى أوطاننا "
والشكر لصاحبة العنوان الكاتبة دخون
نفسى فى يوم ياوطن
مرة تنادينى
تضمنى ف حضنك
بردان ياوطن جداَ
خدنى ودفينى
وما تسيبنيش
ولو لحظة
فى حضن غريب
يكسّر عضمى جوايا
يتوه منُّى مرسايا
يكسَّر كل مجاديفى
وسايبنى كده لخوفى ؟
باخاف منَّك وانا جنبك
برغم انُّى بخاف جدا
لكن باحتاج
تصاحبنى
تخاوينى
أمانة عليك
تخبينى عن عيونهم
عشان ماضعفشى قدامهم
وروح ليهم
وفى الآخر هاضيع منَّك
تضيع منُّى
وانا محتاج أكون جنبك
عشان وانت قريب منَّى
هاكون قادر على كل اللى
عايزينك تخاصمنى
أمانة عليك تكلمنى
بلاش تسمع ندا غيرى
بلاش غيرى .
عشان غيرى
عايزنى أكون بعيد عنّك
وييجى وقت ويساومك
بلاش أرجوك
تعالى وجمّع اولادك
تعالى نرجع امجادك
عشان خاطرى
أنا عايزك ومحتاج لك
أنا واقف على بابك
ومستنى تنادينى
ولما اسمع صدى صوتك
هاحس انى هنا جانبك
واحس انك هنا جانبى
وصوتك ناى هايشجينى
وحضنك قوة تحمينى
تقوينى
أمانة عليك
تقوينى

[أحمد حسن محمد]

وانا رايح أقول بعدك
جميلة كلمتك جدا
وعاجباني
خدت عقلي يا شاعرنا
ولا سابت لي وجداني

وآدي دقتي التانية
على وترك
في حب بلدنا دي الغالية
ولا يحرمنا رب الكون
يا غالي علينا من شعرك

"
خدي إيدي
وميلي زرعة في عنيه
يا غالية..
يا ابتسامة جسمي لما بينتشي جسمي
وضحكة قلبي..
والعطر اللي بترشه قزازة العطر في إيديه
..
يا روح روحي
يا مصر..
الطير في قلبي كله بيحبك
واذا طارت حمامة منه يا بلادي بعيد عنك
بتجرحها غناوي القرب في بعدك
وبيغني بياض لونها
مواويل الأسى المزروعة في إبنك
يا أحلى بلاد ..
طيوري للجمال قصاد
وقاصداكي
وفين ما تروحي يا روحي أنا معاكي
ولكن لي عليك عتاب


أنا من صغري يا بلدي وأنا واقف هنا ع الباب
بانادي أهلك الناسيين
ولا يردوش
واقول: "حاجة؛ دا انا مسكين
ونفسي أعيش
ومن صغري..
وأنا ع الباب
ولا عمري دخلت الباب




عشان أهلك ما بيردوش
وفي دورهم هناك قاعدين
وأنا واقف هنا مسكين

يا روح شمس النهار
......................... تعبان
ونفسي ألقى في حضنك
ولو لقمة وانام في مكان


أنا إبنك..
ودمي كله من صدرك
وفي عنيه أساميكي
وترنيمك
وأشجانك
وفوق دا ودا سنين عمرك
ومهما رحنا أو جينا
هتبقى مني والله وانا منك

أنا يا مصر يا روحي
ومهما كتمت أو
فجأة لقيتك مرة بتبوحي
باحبك موووووووووووووت
ولكن لي عليك عتاب
أنا من صغري يا بلدي..
وأنا واقف هنا ع الباب

[صابرين الصباغ]

بحس الغربة ليه يامه

ف عز الهيصة

واللمه

البرد ينهش ف عضامى

مابين ايديكي

ف الضمة

ولما أسال يقولولي

خلاص ماعدتش

دي أمك

نسيت أنك ابنها

ماعدتش تحمل همك

الغريب عايش فيها

على لحمك على دمك

يسحلوك لو قلت كلمة

توجعهم

ماهى كلمة حق

تولعهم

وكل ماتملكه ليهم رضى

بالغصب تدفعهم

احساسك بأنك ميت وتنتنفس

احساس جميل

يشبعهم

[أحمد حسن محمد]

وقدامي..
بيزعق في سمار عيني
(كطفل عراقي) كراسي
وانا أخرس
مفيش في قبضتي حاجة
ولا كلمة على لساني..

وانا فِيّه
بحور العجز شلالة
ويصرخ فيّ إحساسي
وكل الناس حواليه
ما بين نايم وبين ناسي


ومش ناسي
زعيق قلمي وكراسي
وقدامهم أنا قاعد
بافكر في أدب تلميذ
كأن مدرسي بيكتب على السبورة
جملة صعبة قال ليّه: هتعربها
وأعرب إيه!!..
وكيف أعرب!!
؟
وأنا مش شايف الجملة
سمار سبورة الأستاذ مدارية على الكلمة
أنا سامع
كتير باسمع
هناك في مشية الطباشير
قنابل نازلة وعفار الطريق بيطير
وصوت تجريف
بينفخ في الودان: "حسي"
ويزرع في بلاد حسي
جبال تخويف
..................................
- يا أستاذي!!
- .. .. ..
- هناك غازي
- .. .. ..
- أنا شايفه!!
- .. .. ..
- أنا حاسسه
.................................
............
.....................
............................
وباخرس تاني.. يتحيّر
على الكراس
قلم عادي، وإسمه رصاص
..
!!
- رصاص تاني؟!

يا أهل الحتة يا ناسي
أنا خايف وكراسي
كمان خايفه
لا انا شايف –وانا باكتب على سطورها،
ولا هي كمان من دمعتي شايفة

[علاء عيسى]

أنا واخد على خاطرى كتير منك –
مانا منك
ومهما ابعد فى يوم عنك ..
باتوه فى السكه واشتاق لك
بحس بحاجه جوايا بتندهلى
وباسمع لك
وبارجع لك ..
واقول منك
وبحلم إنى بين حضنك
كأنى حته من حضنك
ولّما احزن ..!
بلاقى الحزن جاى ...
...مِّنك
ولّما افرح ..!
بلاقى الفرح دا ...
...مِّنك
خلاصة كل شئ ...
... مِّنك
مَّنا مِّنك ،
وغصبٍ عنى أو عنك
أنا منك
رضيتى ما رضيتيش ..
منك
رضيت ما رضيتشى انا
... منك
عموماً ...
كل شئ قسمه
وقسمة قلبى إنى اشعر
وانا فْ حضنك
ببرد شديد
وتدى حضنك الدافى ....
لقلب الغير
وانا اللى قلبى كان مخلص ماليه الخير
أنا الطيب يا ست الناس
مش الشرير !
أنا الشمعه اللى قادتلك طريقك نور .
وانا اللى وعدى كان ليكى صريح جداً
وكان على نور
وفى الآخر ..
أنا الغلطان !
عشان باوعد وكان وعدى على أدى
أكون غلطان ؟
عشان الصدق كان ردى

أكون غلطان ؟
عشان ما قدرتش ازرعلك جناين كدب
مرويه بأحلى كلام
عشان ما عرفتش ابنيلك قصورجدرانها
م الأوهام
عشان ما رضيتشى أتجمل
ولا اتحمِّل
أشوف الحب متعزب
خيوطه دايبه
فى الأحلام
أكون غلطان ؟
عموماً ... كل شئ قسمه
وانا القسمه ..
أكون عايش قصاد مِّنك أنا الظالم
واكون عايش وحيد واغرق
فى بحر هموم
وانا المظلوم
رفضت انى أشوف الورده دبلانه ...
فْ جناين شوك .
محبتشى تعيش النسمه بردانه
فى ليل ضلمه ونهار مخنوق .
بحق الله أنا المظلوم
بحق الملك والملكوت
أنا المظلوم !
باكون عايش على أرضك ..
واشوف خيرك ...
... واموت محروم !

[أحمد حسن محمد]

إيه رأيكو
لو أننا ندعي بتوع الفصحى في الصفحة هنا من فضلكو
جايز يكون مشروع كبير
والاسم فن
دي حتى أدعى للجمال المستخبي أنه يبان
أستاذ علاء ماتقول لنا
يا ست صابرين اسمعي ونادي علينا من هنا
وكمان ندى
إيه رأيكو
من فضلكوا
ندعي أهالي الفصحى لو حتى يزوروا شغلكو

[علاء عيسى]

يا أهل الفصحى
ياريت تيجو هنا
بندعيكم
عشان تشوفو شغلنا

[ينابيع السبيعي]

أنا اعرف ان المساجلة نبدأها بالحرفين الاخيرين
أو الحرف الاخير مثال اخواني اخواتي


ياللي تعاتب دايم لوم=ليه؟. ارحم مهضوم الحال
انتهت باللام ثم نبدأ بالحرف الذي انتهى به البيت
ويكون البدء سواء بيت أو اكثر أو بخاطرة أو بشعر تفعيلة
وهكذا .....


ليه تشغلني وقلبي خالي=وتصحيني بعز النوم

انتهى بالميم


مالي ومال الناس=تاعبني من صدك
سببت لي وسواس=لا ترخص بودك

انتهت بالكاف
كفٍ يناولك الورود=وكفٍ يودعك السلام
ودمعات من فوق الخدود=يمكن تعبر عن كلام

وهكذا
مع العلم ان ما كتبته هنا من ابياتي
الشعرية الخاصة
ولكم كل التقدير
لنستمر وبالشعبي
اختكم
ينابيع السبيعي

[أحمد حسن محمد]

ما اقدر شي اقول حاجة
من بعد قول ينابيع
شعري مالوش حاجة
وإن نطقت هضيع

فينك يا ابو دنيا
وانت يا عم علاء
مزنوق، ودي الدنيا
قربت اقول واء واء

اسعفني يا صاحبي
أختك ينابيع جت
هذا وشوف قلبي
مهزوز وعقلي شت

[علاء عيسى]

أخى أحمد حسن
قراءة لما أتت به أختنا الفاضلة ينابيع
بدأت بالتاء حيث انتهيت أنت
تابع واقرا معايا الشرط
علشان نبدأ جد صحيح
تبقى مساجلة ماشية بخط
مش هاتكون فى مهب الريح

[أحمد حسن محمد]

تاء يا صديقي إيه؟ مش فاهم..

ينابيع ختمت آخر قولها بحرف الميم
وأنا بْدايتي كانت حرفي الميم وكتبته
وانت ختمت بحرف التاء وأنا بادئ
بيه يا أخونا وْهاختم برده بحرف التاء..
يعني هتبدأ ردك بيه..
يالله يا سيدي رد لْنا أنت

[علاء عيسى]

تاء يا صديقي إيه؟ مش فاهم..

ينابيع ختمت آخر قولها بحرف الميم
وأنا بْدايتي كانت حرفي الميم وكتبته
وانت ختمت بحرف التاء وأنا بادئ
بيه يا أخونا وْهاختم برده بحرف التاء..
يعني هتبدأ ردك بيه..
يالله يا سيدي رد لْنا أنت
" تاء" أنا قصدى تاءك انت
مش كان قصدى تاء ينابيع
أنا كان قصدى حاجة اما انت
قلمك جاهز رده سريع

[أحمد حسن محمد]

عذرا عذرا..
يبدو أن السهر امبارح أثر فيّه
يالله ياسيدي
يبقى علينا المرةْ ديّه

وعشان أبقى صريح وياك
أنا ما أخدتش بالي يا صاحبي
ماللي كتبته أنت هناك
إتهيأ لي دا توقيعك
آسف جدا
جدا
جدا
قول يا شاعرنا وقلمي وراك

[علاء عيسى]

كلك زوق يااحمد ياحبيبى
طيب طابعك هاستناك
دَ ا .انا محظوظ جداً بنصيبى
إن السهرة تكون وياك

[زاهية]

كنا قوايا بس شـوراح قـول=خلي الغطا مستورعالى طـول
البصلة صارت مثل قرن الفول=خلصنا حكي وراح سكِّر كتابي

[علاء عيسى]

باكتب اسمك جوة ميدان
لوحة كبيرة للأحزان
راسمة النعى على الأوطان
يكفى دموع الله يخليكى

[عبلة محمد زقزوق]

يا إخواني انا ليّه فالشعر العامي
من صغر سنّي لمّا كنت كده بحبي
على مهلكم وأستنـّوا كدا خطـوي
تاته تاته حسابق الريح وأجيلكم
أكتب عن أمّي وعن وطني
كلام فالمليان أتمنّى يعجبكم

[الشربينى خطاب]

أنا بحب المساجلة وخاصة اللَّي ترسم
بسمة وعشان جديد هاقدم لكم نفسي
D: D: D: D: D:
طول عمري من صغري
مافي مرة يوم بوِّزت
مهما لاموا الأحباب
ولا ف زماني عبت
ولا قلت كلمة عتاب
لحظة غضب ولعنت
ولا اشتكيت من قدري
لو حتى مال بي البخت
هاتفيد بإية شكوتي
مهما بكيت أو ثورت
****
أوعي يا صاحبي تظن
إني ماليش احساس
مخلوق وزي البشر
كلمة جفا تجرحني
أضحك في وش الناس
وادارس المي وحزني
بضحكة رايقة وصافية
تغسل هموم جوايا
وذنوب كتير وخطايا
ع القلب كانت نايمة
اصل اللِّي رامية خلاصي
فشِّتها كانت عامية 00!!

[أحمد حسن محمد]

تَ تَّ تْ تَ تَّ تْ
تَ تَّ تْ تَ تَّ تْ
واقف في حلقى الكلام
واقف ومش راضي
حتى يقول السلام
يا أهل دا الوادي

وعلى العموم: "يا رب
يجمعنا دايما حب

يطرح لنا ضلة
بضيا الرضا هالة

[الشربينى خطاب]

الصديقة العزيزة / صابرين الصباغ
:0014: :0014: :0014: :0014:
يا بنت وادي النيل
يا شاربه م الفيضان
يا وردة عبيرها سرح
نسمة هوي ف الغيطان
صحصح قلوب غفلانة
والشوق اللي كان نعسان
معقول وانت في حضننا
يا صحبة فل وريحان
تحسي إنك غريبة00؟
****
يا أخت الهرم والتاريخ
ناس قبلنا قالوا من زمان
لو الصحاب اتجمعوا
وجمعوا الأهل والخلان
علي رنين دقة جرس
وعلي صوت الاذان
تحضنا مصر امنا
مهد الحضارة والآيمان
تلقي الغريب مش مننا
لو حتي عايش وسطنا
همه يفرق جمعنا
يصدق عليه مثل حكيم
ما غريب إلا الشيطان

[الشربينى خطاب]

يا أخوانَّا موش بالألم
نشكي وجايع الوطن
ولاَّ حتي بالهتاف
ولا صرخة تضيع
في العدم
ولايافتة ورفَّة علم
ولا خطبة بكلام رنان
ولا كلمة زيفه بقلم
****
لجل الوطن ينصان
أنا أبيع دمي رخيص
من غير شروط تعجيز
أبيع الغالي والنفيس
أبيع وأنا الكسبان
يحصد من بعدي ولدي
ثمرة تعبي وجهدي
ورد و حب و أمان

[حمدى ليلة]

ممكن أشارك؟؟
بس ياريت حد يطمنى
أصلى ضعيف فى الشعر
ويمكن
أكسر بيت أووزن يخنى
يعنى أنا عاوز وعد صريح
أن ماحدش منكو يهنى
ولايجرحنى بكلمة نقد
ولايتريق يوم على فنى
غموا عنيكم!!
سدوا ودانكم!!
وأسكتوا خالص!!
أنا راح أغنى

[خشان محمد خشان]

أخي أحمد حسن محمد

إيه رأيك يا جماعة الشعبي
لما نساجل..
زي جماعة الفصحى هناك

إهـ - راْ (يكُ) (يجَ) معْ تش شعْ بي = 2 2 (2) (2) 2 2 2 2
لمْ منْ سا جلْ = 2 2 2 2
زي (يجَ) معْ تلْ فُصْ (حَهِ ) نا كْ = 2 (2) 2 2 2 (2) 2 ه

قصيدة شعبية خببية بامتياز

[محمود سامي]

ممكن أشارك؟؟
بس ياريت حد يطمنى
أصلى ضعيف فى الشعر
ويمكن
أكسر بيت أووزن يخنى
يعنى أنا عاوز وعد صريح
أن ماحدش منكو يهنى
ولايجرحنى بكلمة نقد
ولايتريق يوم على فنى
غموا عنيكم!!
سدوا ودانكم!!
وأسكتوا خالص!!
أنا راح أغنى
لو مش عاوز حد يشوفك
أو يسمع كلمة
من شعرك
غني ف سرك
و ساعتها ما حدش حيجاملك
و يقولك هايل ....ممتاز
أو حد بنقده حيهينك
و لا حيجيلك حد يناقضك في المضمون
بس ملاحظة
أقوى الخلق ف أرض الله
هو اللي بيعلن عن ضعفه
لكن برضه
اللي يخاف من نقد الناس
يبقى جبان
و اضعف من أضعف مخلوق
ولا يستاهل إنه ف يوم يتقال على قلبه
أقوي الخلق ف أرض الله
و حيفضل واقف ف مكانه
و الشعر الجاري على لسانه
يضعف و يسلم أنفاسه
يمووووت...
..............مخنوق

[الشربينى خطاب]

الشاعر الجميل / حمدي ليلة
:0014: :0014: :noc: :0014: :0014:
عصفور زقزق
غني ورفرفر
لمَّا لمحني
زي الصبح
طالع ومشقشق
***
قول ما تخافش
غني واصدح بالألحان
نغمة صوتك
لمَّا تغني بكره تبان
أما سلامك زي كلامك
ريحةوطعم حلو جنان

[أحمد موسي]

نيجي نشارك ويّا الشُعَرا
نعلى بصوتنا يروح للأوبرا
كنت بقول على نفسي انا شاعر
بمشي بشعري ف ليلي الواعر
بس انا جيت أرفع دي الصفحه
لجل نكمل أحلى مساجله

[خالد الهواري]

انا راح اتابع بس قراية
اصل الشعر دا لسة هواية
وكف الوزن ضعيف ويايا
ممكن اشرك يا محترمين
شفلي كراس المستمعين
انا مستني تقلي الرد
انفع اشارك يوم الجد
ولا خلاص الشعر اعد


خالد الهواري

[فتحى نجم]

اتجمعوا اتجمعوا
طول ما الكفوف جنب الكفوف
نقدر نغير ف الظروف
نركن همومنا ع الرفوف
ونشوف فرحنا ونسمعوا
اتجمعوا

[الطنطاوي الحسيني]

اتجمعوا
ع الخير وع الحلم الجميل
واتوحدوا
النور هيغلب كل ليل
ايه رأيكو
لما القصيدة نقولها ممنهجة
والشيئ بيحلى
لما القصايد تيجي مدمجة
اللي هيبدأ
يبدأ من أخر حروف اللي سبق
واللي يقول
مش شرط يكون بوزن اللي سبق
بصراحة
يا أحباب هنمشي مشوارنا الطويل
في توب واحد ولو حتى حرير
فين الجمال نلقاه وحبات الشعور
ودا رجائي لو نختلف شعرا
ونخلف وزننا وقصدنا
يحلى المسير
تحياتي لكم ولو اخذت شكل جميل ومنسق ان شاء الله نثبتها وتكون كركن نقوي فيه موسيقانا وشاعريتنا

[أحمد حاتم]

رأيك ماشى ياشيخ طنطاوى
أدخل يلا ومد إديك
إنده عيسى الله يخليك
ليه مش عارف باعد عنا
عيسى الشاعر ليه مخاصمنا
هوه مهاجر وللا مسافر
والله بحق ملهوش حق
لازم يرجع ويكلمنا
..........
رن الجرس
وقف الطابور جابو الحرس
وسيادته تمم عالجموع
وبطرف عين وبمنظره
قادوا الشموع والدنيا ضهر
معفره
قال كلمتين
وبطرف عين وهيه نفس المنظره
قاسو الجدع عالمسطره
من القمر شدوا له سلك كهربه
عملوا الفرح
وادى العريس قاعد ف قلب المندرة
والمندره ، حبة كلام وبنأوره
مش مندرتنا اللى نسيناها من زمان
بقت ورا !!
وكله ماشى للأمام وبفضل حكمة الهمام
عشنا السنين مدهوره
أصل الحصان من غير لجام
من غير عنين
راسه لورا
وان مره بصيت للعريس
أو قلت عينك حمره ليه ومورمه
مع انها دايما فى وشه معمصه
هتروح بلاش
هيجيبولك مصطبه
ويجوزوك عروسه زينه مخشبه
مأتبه ويوصلوها بكهربا