"بلاش تظلم وتتجنى" من الدكتور جمال .. وإليه

[أحمد حسن محمد]

دا كان يظلم ويتجنى
عليك ولا كنت تتمنى
وطيب ليه تقول له ليه
ما يتجنى
واهو انت يا بيه
حرمت الواحة من لطفك
ومن وشك
ومن لمسة إديك في صفحة الفصحى
ومن سحبتها في العامي ومهما كنا نتمنى
لقينا ف وسط دي الجنة
جمال مرسي بيتجنى
- ويتجنى على مين؟
- على اولاده
- وطيب هو رايح فين؟
- أكيد برده على اولاده
- ويمكن كتر أولاده.. يسهّل عنده توديعهم
ولا حتى عشان يمسح دموع عينهم بيستنى

بتطلب ليه ما تتجنى
وف عنينا حرقت الحسن والرحمة بلا هدنة
يا دكتور كان
قلوبنا معاك
وكان الفرح يدخل بيتنا لما تبتدي تكتب ونتهنى
ونتمنى يطول عمرك
ونتمنى
يزيد الشعر في اولادك
ومن حب القلوب في روحنا تتحنى
ورب الكون هنا بيتك
بيستناك
ولون الضحكة في صوتك
أنا سامعه هنا وهناك

ولو تسألنا يا دكتور
ما تسألناش
عن الجنة
ولكن عن دموع القلب والنار اللي ما تهداشي إسألنا
أنا عارف
أنا باكتب وعارف أن عين قلبك بتتمنى
تشوف لحن الوفا معزوف
بقلب يطوف
ف ليل محدوف عليه نار البعاد عنك
وصبحك في البعاد عنا
وكام مرة بنصحى الصبح نتمنى
ما تتجنى
علينا وسيبنا يا دكتر
عشان بوجودك السكر
نعيش أفضل ونتهنى
ما تتجناش
ولادك في الحشا جواك
انا فيهم
وانا قاعد باصبرهم
واقول راجع
ونستنى
يا دكتر مهما نستنى
ومهما يطول فراق مجهول
باشوف فيه الأمل محلول
ما بينامشي
ومهما كان قرارك أننا من دنيتك نمشي
مافكرتش في صوت الأب ولا ابنه
في حب الأبّ في إبنه
في قرب الأب ويّا ابنه
في بعد الأب عن إبنه
وهل نقدر عداك نمشي
طريقنا وحدنا رايحين إذا قررت ترمينا
في صمت كبير ماهوش جنة

اقولك كنا نتمنى ..
تراعينا ولا تسيبنا
بلاش تبعد بكل القسوة دي عنا
بلاش تظلم و تتجنى

[إيمان حسن]

كلنا في
انتظارك يا دكتور
ايمان حسن
تحياتي:hat:

[حسام القاضي]

لا تقلق فـ دكتور جمال عائد إن شاء الله

بأقرب مما تتخيل ، وكلنا بإنتظاره

دمت بكل الخير .

[أحمد حسن محمد]

يا رب يعود
أملنا في الكريم معقود

[أحمد حسن محمد]

كلنا في
انتظارك يا دكتور
ايمان حسن
تحياتي:hat:

الأخت إيمان حسن شكرا لهذه المشاركة الطيبة رغم أني لم أقرأ اسمك في المنتدى إلا قريبا.. لعل هذا "يحنن" قلب الدكتور جمال علينا ويرجع

[محمد عبد الحميد الصعيدي]

أنتظر عودتك يا دكتور جمال بفارغ الصــــــبر
وأحسب أننا كلـــــــــنا هذا الرجل

[محمد إبراهيم الحريري]

الأخ علي سالم الصالحي
تحية
وهل يعرف أهل الفضل إلا ألو الفضل
قرأت صداح فجر على ناي الألق فكانت حمائم الدوح تردد صدى الوجدان حرفا
وبكيت من صدق الفؤاد على ندى
كف اليدين يجود برا بهدى
الشكر يا ولدي صنيع من نثير
رددا
تحيا وفيا للأحبة
ما سمت جمل الفدا
ـــــــــــ
أشكرك أخي وحبيبي علي
وللأخ جمال المرسي الف تحية
ستبقى في القلوب

[أحمد حسن محمد]

يا أيها الدكتور سامع؟!
الناس بتنده لك
من الواحة وتعزف لك على القلب الحنين
دمعة حايرة وع المدامع
ارجع يا سيدنا
مرفوعة إيدنا
تدعي لرب الكون
أن احنا نصحى يوم
نلقاك هنا موجود

[د.جمال مرسي]

على سالم
أنا ما كنت يوم ظالم
و قلبي للجميع مشروح
كتاب مفتوح
و حبي فاق حدود الكون
بيرسم خارطةْ العالم
أنا منكم
أنا بيكم
و مهما ابعد في يوم عنكم أو اتغرب
هيفضل كل أحبابي في قلب القلب و النني
و مين يقدر في يوم يهرب
من المكتوب
ملكت القلب يا غالي بأشعارك
و سيلت الدموع تجري
و سايب قلبي في دارك
أرد ازاي جِميل شاعر غمرني بحبه و حنانه
و زي ما عاش في وجداني أكيد عايش في وجدانه
لكن أيامنا بتجيبنا
تودينا
ما ليش حيلة
و بُعدي كان كتير يصعب على روحي
يزيد نوحي
و تكبر م. النوى جروحي
و شعرك كان علاج شافي
و نبعك بالحنان صافي
و أرد ازاي نداك اللي يجوب الكون
يقوللي أرجع لأحبابك
و لاولادك
و انا عمري لا كنت أظلم في يوم انسان أو أتجنى
و لكن هي دي الدنيا
تقربنا و تبعدنا
و تفضل في القلوب عايشة محبتكم
تنور ضلمة السكه
تزيل الدوخه و الربكه
و رايح أرجع
برغم القلب كله جروح
عشان أحبابي و اصحابي
مساكنهم في روح الروح
مساكنهم في روح الروح


أخي الحبيب على سالم الصالحي
أسعد الله صباح
لا تتخيل مدى تأثير كلمات الجميلة على نفسي
فلم أستطع معها و مع ما أمر به من أن أجاري و لو قطرة من حبك الذي غمرتني به
شكرا لك يا صديقي
و تمنى لك دوام التوفيق
أخوكم د. جمال مرسي

[أحمد حسن محمد]

إذا اعتبرته جميلاً واعتبرت له اعتباراً..
فأنا لا أختار رداً منك إلا أن تبقى هنا..
ابق وحسب بين محمد إبراهيم الحريري. والبحتري د/ سمير العمري
ابق أيها الأب الطيب

[أحمد حسن محمد]

على باب الفؤاد واقف
خيال بيدق باب قلبي
فتحت الباب وانا خايف
يكون فيهْ حزني متخبي

لقيت النور
حمام وطيور
وحب كبير
بدون تفكير
يحيّيني
وبيقول لي: أنا جيت لكْ
صحيح القلب فيه غابات من الأحزان
وروح الروح
منين ما تروح
باحس النوح
كطير بيبوح
وكان قلبي
كتير حيران
تقول خايف.. يجوز
ممكن تقول بردان
تقول حران
ولكن لما قال جيت لك
كأن بْيِصْحَى من موته صديق مات لك

أنا عارف جمال مرسي
وعارف أن قلبه حاجة لا توصف
ولكن جرحي كان أكبر
ودمي لسه في الدفتر
كطير مدبوح وكيف اصبر
وحبري من يومين ما سبتنا بينزف

ماكانشي هروب
يا دكتور لا دا كان تعذيب
ويا ما القلب بعدك كان بيتعذب
بجد يا سيدنا ما كانشي
ولا استجري
أقول هربان
أنا -مهما أكون- تلميذ ولا أقدرشي
ولكن كان عتاب قلبي عليك يسري
في قلب الليل ووياه الدموع تجري
تركت لْنا هنا صورة من الأحلام رسمها كفك الغالي
لا كنا يوم ببنساها..
ولا تشغلني -عن لونها ولونك فيها- أشغالي

جمال روحك مسح دمعي
عشان صوتك لمس سمعي
ف يوم ما قلت: أنا جيت لكْ
ودا أغلى جميل عمري ماهانساهْ لكْ

"لكن أيامنا بتجيبنا
تودينا
ماليش حيلة"

يا قلب كبير
خسارة أنه يصبح يوم من الأيام
يكون زعلان
وينطق قلبه صوت الآه
هنا دارك
وجوّا الدار هنا عيالك
تصلي الصبح داعية لك
وتتمنى الهنا جايلك..
وتتمنى السعادة تبقى جايه لك
يا ألف سلامة واللهِ
وخمسة يا رب وخميسة على لون الوشوش لما
غمرها صوتك الزاهي

أخيراً
ما لي يا سيدنا سوى أمنيّة مسكينة
ودا بعد ابتسام قلبي
بلمسة ْ كفك الغالية بتطبع روحها ف إْدينا
أنا أمنيتي صعبة
إذا فكرت تنسانا في يوم تاني
وتنساهم وتنساني
ورحت بعيد عن الصحبة
ماتنساشي
تسمي الله
عشان تبقى سكاكين الفراق هادية على الرقبة

[أحمد حسن محمد]

صعيدي يا صاحبي يا محمد
جدع طيب ووقت الشدة في جاري
فلك شكري
وقبل الشكر أشعاري