( بتفكرنى بعربية إسعاف ) قصيدة لأشرف الشافعى

[أشرف الشافعى]

بتفكرنى بعربية إسعاف
بينى وبينـــك حلــــم يستاهــل
نرويـــــه لآخــــــــر نبضتين فـينا
يمكن يكون تحقيقه مش ساهل
لكـــن وصولنا لشطـــــــه يكفينا
....................................
....................................
آ

آسف لو كنت قاطعتك
أصل انا من اكتر من أسبوع
شايفك قاعد ومموت نفسك
ف كتابة غنوة جديدة
عن حلم مابينكم يستاهل
ترويه وياها بآخر نبضة ف مشاعركم
لامم كل بنات افكارك حواليك
علشان تصطادلك ف معانى ماحدش قبلك
إتجرا وكتبها ف غنوة !!
طب بالذمة...
مش مكسوف على دمك
عارف ..
بالصدفة وبرضه من أسبوع أو أكتر
لبنان عمالة تقيس النبض وقلقانه
على حلم كمان يستاهل
متشعلق ننى عنيها على الباب
مستنية اللى ح ييجى وياخد بخاطرها
لا جيرانها اتفزعوا ودخلو عليها...
بقمصان النوم
على صوت انبوبه بوتجاز بتهد حيطان البيت
ولاحد اتجرأ من شنبات العيلة ..
وفكر يستاء
عارف ف اللحظة دى افتكرت مين ؟!!
لبنان افتكرت ف اللحظة دى ( سناء )
أنا آسف يعنى ان كنت ضايقتك
طب عارف ..
( لبنان ) دلوقتى بتفكرنى بإيه ؟
لأ .. مش بس بغنوة حزينة بصوت فيروز !!
بتفكرنى بــــــــــــــ ..!!
مش فاكر ..
أو يمكن بتفكرنى بحاجة تغيظ !!
عربية إسعاف مثلاًً من غير تجهيز
عارفة مكان الحادثة كويس
لكن كل السكك اللى حتوصل ليها
اتقفلت بزيارة وفد سياحى
والوفد اتضايق جداً
من صوت سارينتها المزعج
مع إن صريخها اللى مزلزل أركان الملكوت
مش فارق خالص مع صوت العربيات
والعربيات قدامها مش عايزة توسع
ولا تدى إشارة يمين !!
معذورة العربيات !!
ماهو صوت الكاسيت العالى
المقفولة عليه الشبابيك
وبيرقص على صوت التكييف الناعم
مش سايب فرصة لحس منير
يتوضى بصهد جنوبها المجروح
وياذن ف الناس !!
( أتحــدى لياليك ياغروب
واتوضى بصهدك ياجنوب
وأصلى الفرض لحطينى
واكتبلك عمرى المكتوب )
أنا آسف يعنى ان كنت خنقتك
طب عارف بتفكرنى بمين ؟
لأ مش لبنان
ولا حتى العربيات
إنت ..
بتفكرنى بواحد مش عايز أفتكره
إخييه !!!
بقى مش مكسوف على دمك
عارف لو كنت مكانك كنت اعمل إيه ؟
كنت أدور ..
على أقرب حيطة بكا متعلق فيها مرايه ...
واتسمر قدامها
لأ مش علشان أبكى
ما انا عارف طبعاً إنك واحد منهم
أنا قصدى تقف قدامها
علشان وبآخر عزم ف روحك
تسحب ف حبال الريق الممدود
من أغمق بقعة ف جوفك
وتكومها ف حلقك
وتسلمها لطرف لسانك
علشان يحدفها ف وشك
وساعتها لما ح ابص عليك ح افتكرك
وأكيد حاتعرف
على شكل ملامحى الحقيقية !!

[د. فوزى أبو دنيا]

:nj: :nj: :nj:
كان لازم قبل ماكتب اسقف
لان العمل جميل
يشدك تقراء بجد
ويقول انك ماشى سكة مزروعة بورود
مرسومة على ضفاف الكلمة
وان المعنى بيسبق فيك
ويصارع جواك يملك حتة ف قلبك
ينبض نبضك
ويقول انك عايش نفس الاحساس والحالة
.. وحوار الحدوتة بيجرى ف دمك
ويشدك تطلع ف سما الابداع
هو انا عايز اكتبلك قصيدة ..يمكن من جمال العمل والتناول
سبق انى قولتلك اننا هنستمتع كتيرا بشاعر قدير
تحياتى ومودتى

[ينابيع السبيعي]

كلمات جميلة
باللهجة المصريه اللي بحبها
وليّه أصحاب منّها
ومن كم سنه انا زرتها
يا سلام عليك رائع
وحدوته
جميلة وكأني عشتها
مشاعر رائعة اخي
انت رائع

تقديري
اختك
ينابيع السبيعي

[أشرف الشافعى]

كلمات جميلة
باللهجة المصريه اللي بحبها
وليّه أصحاب منّها
ومن كم سنه انا زرتها
يا سلام عليك رائع
وحدوته
جميلة وكأني عشتها
مشاعر رائعة اخي
انت رائع
تقديري
اختك
ينابيع السبيعي

الاخت الجميلة كإسمها / ينابيع
شكرا لمرورك الكريم
ومزيد من التواصل المحترم بيننا إن شاء الله
أخوك / أشرف الشافعى

[د.جمال مرسي]

أخي الشاعر الرائع أشرف الشافعي
بالفعل قصيدة جميلة نكأت بها جراح غائرة .
أتذكر أني واكبت أحداث لبنان و غيرها من الأحداث العظيمة التي مرت بأمتنا بقصائد سريعة و كنت اختلفت في أصدقاء شعراء في طائل الشعر إن لم يكن سريع التجاوب مع الحدث . كانوا يكتبون عن أشياء بعيدة كل البعد عن الواقع المر الذي يعانيه لبنان و غيره و يقولون حين تختمر الفكرة سنكتب ما تيسر من شعر عن لبنان و غيرها .
و هنا أراك عزفت على نفس الوتر مما جعلني أعيد نفس السؤال و لنجعلة مادة للحوار
هل يجب على الشاعر أن يواكب الحدث طالما أن عنده ما يؤهله لذلك أم ينتظر حتى تهدأ الأمور و يكتب فتكون فاتت المناسبة .

قصيدتك جميلة بارك الله بك
و لك الود

د. جمال

[عبلة محمد زقزوق]

إخيييييييييه على كل واحد يتهرب من ساعة إمتحانه
بكلمة حق لنصرة دين وإغاثة الملهوف وقت إحتياجه
إخييه إخييه عليه إخييه
رغم إن كلمة الحق من أضعف الإيمان
إلا انها جزء من أنسانية الإنسان ذاته
:))
كلماتك أخي الشاعر ـ أشرف الشافعي
لاقت إستحسان من نفسي ؛ فوجدتك وكأنك تتكلم بلسان كل عربي مسلم ... حر وأصيل .
إحترامي