حوار مع قلم شارد

[سعيد شكري]

ياقلمى الصريح إكسر قوام كفى
لانا قدك
ولاقد الكلام المُر فى عتابك
وياتوب الفرح خليك
على رفك وف دولابك
وياتوب الحداد أهلا ومرحبتين
بعار الصمت ف رحابك
أنا راجع
وقلبى م اللى صار طافح
مرارة وهم ومواجع
وصبر الدنيا مايكفى ولايوفى
حمول الدنيا فوق كتفى
وانا شايف على الجنبين
لون الدم بيغطى حصيد القمح والغله
وناس بتسمى بسم الله
ف وقت فطار
وشنطة مدرسة وكتاب
وجثة طفل كان ماشى قصاد الدار
وسبحة فوق مصليه
وكام صفحة من المصحف
وجامع كان قصاد البيت وقع وإنهار
بكام غارة وكام تمشيط
يا قلمى الصريح ياعبيط
خذلنا البادى وعملها
وكان أظلم
ومن يومها مافيش تفريق
مابين جامع وبين ملهى
ومين يعلم
هيجي الدور كده على مين؟
ومن يومها ومجلس أمن متجمّع ومتلمّع
لاهو بينطق ولابيسمع
لكن ضرباته بتسمّع
وضوء أخضر وضوء أحمر وإذن مرور
ياقلمى الصريح ياعبيط
يجوز بيتك عليه الدور
بلاش تنطيط
ياقلمى الصريح ياعبيط
هتكتب إيه وليه ولمين؟
لكام كرسى وناس نايمين
وناس غرقانة فى الديسكو
وناس تايهين
وناس عن وعيهم غايبين
وناس تانين
ف دوامة حياة بتدور
مابين العيشة والعايشين
ياقلمى الصريح ياجرئ
أنا عارفك
لو تسمع كلامى توه
ولو تسكت ولو أسكت
ضميرك حر مايسكت
ولو تنطق تصير معتوه
بجرة من قلم بايع
خلاص الليل فرد جناحات
وبات الحق فيه ضايع
وانا زيو كمان ضايع
مابين الرغبة والرهبة
وبين أحلامى وإنكسارات
على فرشة حصير العمر والتوقيت
وحسبة برما واللغابيط
ياموازنة ياقوت البيت
ياهدمة وعلم ودكاترة
ومستقبل كأنه مافيش
ومهما نقول بنتهمش
ياقلمى الشريف ياريت
نلاقى الناس بتسمعنا
ساعتها العمر مايهمش

[غازى كلخ]

أخي الكربم سعيد شكري
قلمك مش شارد ..قلمك مارد وفارد وواعد
....
قلم ماضي ..بسن مسنون
على صخرة ف الماضي
وماضي في دروب ودروب
دروب وعرة
يشوف بكرة..بعين حرة
ويجلي نفوس
ويغوص ف عقول والامعقول
نور كاشف
يحاور نيتشه ويناكف إبن خلدون
قلم عاقل..قلم وجنون
يكتب ولا يحسب لحد حساب
مدام الحق ع لسانو
يطخ يصيب كل ظالم وكل جبان
...
..
.
بارك الله فيك أخي وفي كل صاحب قلم حر شريف

[جوتيار تمر]

العزيز سعيد..
هي ناداءات ليتها تسمع عن قريب...
ليتنا نجد من يتفهما...

ليتنا نلامس من يدركها...
ليتنا نعي ما ترشدنا هي اليه...

ليت..ليت ليت...

لكن الى متى نعيد ليت ليت..

هنا تكمن المعضلة

محبتي لك
جوتيار