رمضانيات

[سيد الموجى]

رمضانيات

سيد الموجى

الدنيا زايطة وفرحانة
رمضان جانا
مادد إيديه المليانة
بنِعَم الرحمن
******
الرحمة - ودا من فضل الله -
أول عطاياه
لكافة العايشين فى حماه
من إنس وجان
******
والمغفرة تانى عطية
للبشرية
الداخلة تالت ألفية
بميت ألف شيطان
*******
وأجلَّها العتق من النار
ربك غفار
وبابُه مفتوح ليل ونهار
لدُعَا الإنسان
******
وأما عن نعم الدنيا
زايلة وفانية
وبتنتهى منها ف ثانية
ألوف الأطنان !
******
لكن بتخلق جو بديع
جواه بتشيع
روح المودة ؛ وبحروسيع
بالخير مليان
*******
كنافة وقطايف وياميش
- تسلم وتعيش -
روايحها تدخل فى النخاشيش
تشفى العيان !
******
ومشمشية وقمر الدين
وقراصيا وتين
يجعل كلامى على السامعين
نادى وريان !
******
وأهم شئ فيه طبق الفول
هذا المسئول
عن أمن معدتنا المأمول
فقرا وأعيان !
******
وموائد الرحمن تعبير
عن فعل الخير
والكل فيها غنى وفقير
صحبة وإخوان
******
والمدنة تتعايق بالنور
داير ما يدور
على سدرها ألوان مبدور
فشر المانيكان
******
ولعب وفوانيس عصرية
إلكترونية
كوكتيل صناعة مصرية
وصينى وتيوان
****
رمضان تواصل وجدانى
وجو إيمانى
وف مصرشكله شىء تانى
غير أى مكان
******
فى كل بيت تلقى عزايم
وسمر دايم
وبتندبج نص بهايم
مصر ف رمضان !
******
والخلق ليل ونهار صاحيين
متهنيين
وتمُرّ أيامه التلاتين
وكأنه ما كان
******
رمضان معارف وثقافة
وروح شفافة
بعيدة عن أى هيافة
بقدر الإمكان !
******
ساعات بيبقى كلاسيكى
رومانتيكى
وساعات بيبقى شيكابيكى
حسب الألوان
******
وعلى جميع الفضائيات
رمضانيات
مصرية ؛ فيها دليل إثبات
لبلد فنان
******
رمضان بلدنا دنيا ودين
ذكر وتفانين
وناس بلدنا ناس واعيين
عاليين الشان
******
وكل مسجد فيه تسابيح
وصلاة تراويح
الشر كله بياخده الريح
والخير بيبان
******
قبل الفطار ( الشعراوى )
فكره يداوى
تباريح زمانّا المأساوى
بطب القرآن
******
بعد الفطار حبة تفكير
ويا الفوازير
بيقلدوا ( آمال فهمى ) كتير
لكن شتان !
******
وقت السحور من ( ابو الأسياد )
و( فؤاد حداد )
تسمع كلام كل ما ينعاد
يحلوَّ كمان !
******
من ( بابا شارو ) و ( ابو فاشا )
أحلى بغاشة
فى ألف ليلة بتتما شى
مع كل زمان
******
ولأن رمضان شهر كريم
و مقامه عظيم
وفيه - ودا أعظم تكريم -
نزل القرآن
******
فيه فتح مكة وغزوة بدر
وليلة القدر
رمضان كريم ورفيع القدر
مدى الأزمان
******
قراء كتاب الله ألوفات
لكن بالذات
بنحن كل ما تتلى آيات
أو يعلى أدان
******
للشيخ ( محمد رفعت ) صوت
عمره ما هيموت
ياخدك على جناحه لملكوت
جنة رضوان
******
و( النقشيندى ) و ( نصر الدين )
هما الساكنين
من بين جميع المبتهلين
جوه الوجدان
******
رمضان كريم خليك زيه
وامشى ف ضيّه
واسكن إذا سكنت ف حيّه
تعيش فى اطمئنان
******
وانوى الصيام عن كافة شىء
يؤذى المخاليق
تلقى الفرج فى ساعات الضيق
عند الديّان
******
وانسى الإساءة من اللى أساء
خليك سبّاق
بالخير ؛ تنول عفو الخلاق
وتعيش فى أمان
******
وان كنت من صاحبك مقموص
سافر مخصوص
وصالحه لو كان هو ف ( قوص)
وانت ف ( حلوان ) !
******
وافتح كتاب الله واقراه
وافهم معناه
تلقى ارتياح روحك فى حماه
وتدوب دوبان
******
وياريت إذا أحيانا الله
يمنحنا رضاه
بزيارة للأقصى وصلاة
فى أجلّ مكان !
******
وتحقق الأمة مُنَاها
وتحمى حماها
من شر كل اللى أتاها
بقصد العدوان
******
دى حاجات بنحلم بيها ساعات
لكن هيهات
إلا إذا انزاحت عصابات
( الإسرائيكان ) !!

للاستماع
http://mogiat.sitesled.com/sound/ramadan.ram

[محمد صادق .. اللورد]

رمضانيات موجية من القلب للقلب ياعمنا
كل سنة وانت بخير وسعادة

[محمودعبدالله سلامة]

الله عليك يا عمنا الموجي
ريحة رمضان اللي بشمها كل رمضان من قبل ما يبتدي لاخر يوم العيد مكلبشة في القصيدة
زجلية ممتازة من النوع الفاخر زي الياميش الفاخر
كل سنة وانت طيب
يا عمنا

[حمدى ليلة]

سيدى الموجى
هذا هو رمضان الثالث لى على التوالى فى الغربة
وانت حملت لى رمضان إلى هنا فى الكويت
وعشت معك كل لحظة واسترجعت ذكرياتى
هذا الصوت النقى جاء عابراً الحدود ليحرّك بداخلى الذكرى
كنت قد بدأت أنسى الطقوس وجو رمضان
شكرا أيها المبدع

[نادية حسين]

رائع ياشاعرنا

صح السانك اخوي سيد الموجي

الله الله

كل عام وانتم بخير
ومبارك عليك الشهر :)
ودمت بخير

[جوتيار تمر]

المبدع الموجي...

تكتب الشعر هنا وكانها تعاليم مصانة

رائع بحق

محبتي لك
رمضان كريم
جوتيار

[سيد الموجى]

رمضانيات موجية من القلب للقلب ياعمنا
كل سنة وانت بخير وسعادة

الشاعر الجميل / محمد صادق
كل عام وأنت والجميع بخير وسلام
وأشكر لك مرورك العاطر

[سيد الموجى]

الله عليك يا عمنا الموجي
ريحة رمضان اللي بشمها كل رمضان من قبل ما يبتدي لاخر يوم العيد مكلبشة في القصيدة
زجلية ممتازة من النوع الفاخر زي الياميش الفاخر
كل سنة وانت طيب
يا عمنا

الشاعر المبدع / محمود عبد الله
واحشنى كلامك الحلو
كل سنة وانت طيب ورمضان كريم
بس النوع الفاخر من الياميش غالى قوى يا عم محمود
واحنا مش قده

[سيد الموجى]

سيدى الموجى
هذا هو رمضان الثالث لى على التوالى فى الغربة
وانت حملت لى رمضان إلى هنا فى الكويت
وعشت معك كل لحظة واسترجعت ذكرياتى
هذا الصوت النقى جاء عابراً الحدود ليحرّك بداخلى الذكرى
كنت قد بدأت أنسى الطقوس وجو رمضان
شكرا أيها المبدع

الحبيب / حمدى ليلة
قلبى معك فى الاغتراب عن الوطن وخاصة فى رمضان
ولكن أرجوك لا تنس الطقوس الرمضانية التى تربينا عليها جميعا
فلم يبق لنا سواها
دمت بكل الخير

[سيد الموجى]

رائع ياشاعرنا
صح السانك اخوي سيد الموجي
الله الله
كل عام وانتم بخير
ومبارك عليك الشهر :)
ودمت بخير

عزيزتى / نادية حسين
أشكر لك مرورك الكريم
وكل عام وأنت بكل الخير

[سيد الموجى]

المبدع الموجي...
تكتب الشعر هنا وكانها تعاليم مصانة
رائع بحق
محبتي لك
رمضان كريم
جوتيار

الله أكرم يا عزيزى / جوتيار
وأشكر لك كلماتك الرقيقة

[الشربينى خطاب]

وقت السحور من ( ابو الأسياد )
و( فؤاد حداد )
تسمع كلام كل ما ينعاد
يحلوَّ كمان !
******
من ( بابا شارو ) و ( ابو فاشا )
أحلى بغاشة
فى ألف ليلة بتتما شى
مع كل زمان

يا سيد يا موجي د0 فوزي أبو دنيا فتش السر
وبيسلم عليك قال عنك : 00000

عاشق وقلبك
ذي البفته
أصلك فنان
أديب و شاعر
لمَّأ تغني
علي عودك
بتعزف الحان
*****
فما هوش بعيد
طول رمضان
يعزف قلبك
ألحان حبيبك
أبو ( الأسياد)
و ( فؤاد حداد )
بصوت رنان

[الشربينى خطاب]

وقت السحور من ( ابو الأسياد )
و( فؤاد حداد )
تسمع كلام كل ما ينعاد
يحلوَّ كمان !
******
من ( بابا شارو ) و ( ابو فاشا )
أحلى بغاشة
فى ألف ليلة بتتما شى
مع كل زمان

يا سيد يا موجي د0 فوزي أبو دنيا فتش السر
وبيسلم عليك قال عنك : 00000

عاشق وقلبك
ذي البفته
أصلك فنان
أديب و شاعر
لمَّأ تغني
علي عودك
بتعزف الحان
*****
فما هوش بعيد
طول رمضان
يعزف قلبك
ألحان حبيبك
أبو ( الأسياد)
و ( فؤاد حداد )
بصوت رنان

[سيد الموجى]

وقت السحور من ( ابو الأسياد )
و( فؤاد حداد )
تسمع كلام كل ما ينعاد
يحلوَّ كمان !
******
من ( بابا شارو ) و ( ابو فاشا )
أحلى بغاشة
فى ألف ليلة بتتما شى
مع كل زمان

يا سيد يا موجي د0 فوزي أبو دنيا فتش السر
وبيسلم عليك قال عنك : 00000

عاشق وقلبك
ذي البفته
أصلك فنان
أديب و شاعر
لمَّأ تغني
علي عودك
بتعزف الحان
*****
فما هوش بعيد
طول رمضان
يعزف قلبك
ألحان حبيبك
أبو ( الأسياد)
و ( فؤاد حداد )
بصوت رنان

تسلم يا شربينى ويسلم أبو دنيا كمان
وتدوموا بسعادة وصحة وتزدادوا إيمان
أما عن الغُنا والتلحين صاحبك هاوى
مش محترف وهتلقى ف ( موجيات ) ألحان
أتمنى تعجبكم ، ويا رب نكون صحبة
متجمعين فى الكعبة مع نهاية رمضان