تسجيل الدخول

مشاهدة النسخة كاملة : هديتي للإخوة الكرام : المسحراتي رائعة الشاعر الكبير فؤاد حداد


د. مصطفى عراقي
25-05-2008, 08:06 PM
الإخوة الكرام

يشرفني أن أهديكم هذه الهدية الرائعة

راجيا المولى أن تحوز رضاكم



http://www.sawari.com/group%2011/haddad1.htm

1
دواليب زمان
اصحى يا نايم
وحد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحد الرزاق
رمضان كريم
*
مسحراتي
منقراتي
منجراتي
دواليب زمان
ما تشتكوشي
دقة شكوشي
جت في الاوان
يا ناس حبايب
يا ناس جيران
انا قلبي دايب
على البيبان
عجوز شويه
لكن عيني
روحين حنان
لاظني سئ
ولا جبان
درويش واوسطي
وشيخ كمان
وفي عبي قطه
ازاي حتلعب
فيه الفيران
تسـألني بتعب
اقول صراحه
شقاي راحه
قوة حصان
لاجل وعشان
قبول عيالي
في الامتحان
وانا في بالي
حاجات جنان
من الطبالي
اعمل صيوان
وابني لخيالي
اربع حيطان
دا انا في انتقالي
من اولى ساقيه
لسد عالي
لقيت مكان
سيري يا موجه
بالتكنولوجه
لبر الامان
*
المشي طاب لي والدق على طبلي
ناس كانوا قبلي قالوا في الامثال
الرجل تدب مطرح ماتحب
وانا صنعتي مسحراتي في البلد جوال
حبيت ودبيت كما العاشق ليالي طوال
وكل شبر وحته من بلدي حته من كبدي حته من موال
*
لو ماشي في الصحراء شفت النور اقول انسان
دا انا كل شباك يقيد اشكر لايد انسان
واقول هدتني المناير سبحت للعرش
يا رب من رحمتك مكنت للانسان
يغير الضلمة اما النور ما يتغيرش
*
اصحى يانايم وحد الدايم
السعي للصوم خير من النوم
دي ليالي سمحه نجومها سبحه
اصحى يانايم يانايم اصحى
وحد الرزاق
د. مصطفى عراقي
25-05-2008, 08:07 PM
2


الاستماره


اصحى يا نايم

وحد الدايم

وقول نويت

بكره ان حييت

الشهر صايم

والفجر قايم

اصحى يا نايم

وحد الرزاق

رمضان كريم

*

مسحراتي منقراتي

ع الطبله ايدي

ريشه ف دوايتي

اسمع ياسيدي

اسمع حكايتي

مع استماره

راكبه حماره

اول ماراحت

راحت لحسني

قالت ياحوستي

هو انت فاطر

قال كنت فاكر

مش حانسى تاني

خليك مكاني

الاستماره راكبه الحماره

راحت لفكري قال تيجي باكر

وتروح لزكري

قال روح لشاكر

ولا لشكري

شكري في اجازه

راحت لبهجت

لا حط ماذا

ولا سألها

اشر نقلها

راحت لهاني

خليك مكاني

هاني الطاطوري

قال فيما يبدو

حتروح لعبده

لازم ضروري

ضروري لازم

راحت لحازم

منه لتيفه

شاغلاه لطيفه

منه لمكتب

راجل مؤدب

ببدله بني

قال لي اظني

في تاني اوده

عند الموظف

ابو بدله سودا

بدله رصاصي

قال لا مؤاخذه

مش اختصاصي

ياسيدي لاظوغلي

خلص لي شغلي

في تاني طرقه

على شمالي

لبدله زرقا

شرحت حالي

قال ثانيه واحده

والاستيماره

من يومها قاعده

راكبه الحماره

لو كنت راكب

ماكنتش اوصل

ولا أؤدي واجب

ولا احصل واطلع بلاشي

احسن لي افضل

على مهلي ماشي

*

المشي طاب لي والدق على طبلي

ناس كانوا قبلي قالوا في الامثال

الرجل تدب مطرح ماتحب

وانا صنعتي مسحراتي في البلد جوال

حبيت ودبيت كما العاشق ليالي طوال

وكل شبر وحته من بلدي حته من كبدي حته من موال

*

انا صايم الشهر طول الشهر ودا فاطـــــر

وانا ماشي في الشغل قلبي سخن ودا فاتر

ما يـنـتـقـل شـبـر الا بـحــبـر ودفــــاتـــــر

*

اصحى يانايم وحد الدايم

السعي للصوم خير من النوم

دي ليالي سمحه نجومها سبحه

اصحى يانايم يانايم اصحى

وحد الرزاق
د. مصطفى عراقي
25-05-2008, 08:09 PM
3

مع السلامه





اصحى يا نايم

وحد الدايم

وقول نويت

بكره ان حييت

الشهر صايم

والفجر قايم

اصحى يا نايم

وحد الرزاق

رمضان كريم

*

مسحراتي منقراتي

ليله في حياتي

ومع السلامه

بسمع بودني

حس يعاودني

وبنتي وابني

مع السلامه

مشيت اعرّج

عشان افرج

النجم رجرج

مع السلامه

انا اللي حارت

برجلي حاره

مع السلامه

مطرح ما ادور

الاقي منور

عمال يشور

مع السلامه

خالصين ياقافيه

خليك بعافيه

مع السلامه

انا عيني بكّت

وقلبي نكت

ناولني فكه

مع السلامه

انا جاي بكره

الاجر اجره

افطر بفطره

و مع السلامه

انا بكرى ارجع

اغني واسجع

تلايمني تسمع

مع السلامه

و مع السلامه

*

المشي طاب لي والدق على طبلي

ناس كانوا قبلي قالوا في الامثال

الرجل تدب مطرح ماتحب

وانا صنعتي مسحراتي في البلد جوال

حبيت ودبيت كما العاشق ليالي طوال

وكل شبر وحته من بلدي حته من كبدي حته من موال

*

رمضان مخلف هلال وهلال مخلف عيد

وكل يـوم من لـيـالـيـنا قــديـم وجــديـــد

خلـف بـنـيـه وصـبـي خـلف امـل وسعيد

وانا طـبـلتي تغـني غـنوه وتحكي حدوته

بالسمن ملتوته ونرجع نقول ونعيد

رمضان مخلف هلال وهلال مخلف عيد

*

اصحى يانايم وحد الدايم

السعي للصوم خير من النوم

دي ليالي سمحه نجومها سبحه

اصحى يانايم يانايم اصحى

وحد الرزاق
د. مصطفى عراقي
25-05-2008, 08:10 PM
4

الكعـك



اصحى يا نايم

وحد الدايم

وقول نويت

بكره ان حييت

الشهر صايم

والفجر قايم

اصحى يا نايم

وحد الرزاق

رمضان كريم

*

مسحراتي منقراتي

خالاتي عماتي سيداتي

على تل عجوه وعسل وسمن

ولا مجلس الامن سهرانين

لت وعجين

يبنوا الهرم

قالت حماه المحترم

ياكعك ياسيد الكرم

نبنطلك في المشمشي

يابنت قومي وفرفشي

لاتحوشي ولا تختشي

احمي الوابور واستحمشي

اشي واشي تلاقيه مشي

اشي نغبشي

واشي حبشي

واشي دندشي

واشي انقشي

واشي ينحشي

واشي رشرشي

سكر عليه

بركه ايديه

فرحه عنيه

قال ايه وايه

*

المشي طاب لي والدق على طبلي

ناس كانوا قبلي قالوا في الامثال

الرجل تدب مطرح ماتحب

وانا صنعتي مسحراتي في البلد جوال

حبيت ودبيت كما العاشق ليالي طوال

وكل شبر وحته من بلدي حته من كبدي حته من موال

*

قال واحد اتنين تلاته واللي كان في الجرن

كله انفتل وانقتل وانشال وراح الفرن

عيني على رصه راحت ولا رصه جات

عمال اسحر وانا ماشي ورا الصاجات

*

اصحى يانايم وحد الدايم

السعي للصوم خير من النوم

دي ليالي سمحه نجومها سبحه

اصحى يانايم يانايم اصحى

وحد الرزاق
د. مصطفى عراقي
25-05-2008, 08:12 PM
5

النسمه هـلت

اصحى يا نايم

وحد الدايم

وقول نويت

بكره ان حييت

الشهر صايم

والفجر قايم

اصحى يا نايم

وحد الرزاق

رمضان كريم

*

مسحراتي ومعدي

منقراتي ومين قدي

الطبلة عاليه في احضاني

زي البيان زي النشره

في ستة اكتوبر عشره

من الهلال الرمضاني

كان قلبي صخر الحنيه

في المعركه للحريه

وللسلام اللي هداني

*

والنسمة هلت بحريه

يا مصر يا شهد الشهدا

الجنة شمسك وترابك

اصوم واصلى في محرابك

واسمع الشط الثاني

الله اكبر وأداني

اه من هواي في اوطاني

اه من شقاي ومن طربني

الارض تتكلم عربي

والدنيا تسمع بوداني

نور الوجود من وجداني

زقاقي يفتح لي ميداني

حبيبي خدني وعداني

*

المشي طاب لي والدق على طبلي

ناس كانوا قبلي قالوا في الامثال

الرجل تدب مطرح ماتحب

وانا صنعتي مسحراتي في البلد جوال

حبيت ودبيت كما العاشق ليالي طوال

وكل شبر وحته من بلدي حته من كبدي حته من موال

*

دخلت دار بعد دار والكل بيحيي

انا اللي حي وشهيد في الجنه وفي حيي

الله اكبر كأن الشمس من ضيي

على ارض سينا في نار المعركه والصهد

وانا والتراب المنور انتصرنا لبعض

وكنت صايم ملكت من السماء للارض

وكنت عطشان ما حدش ارتوى زيي

*

اصحى يانايم وحد الدايم

السعي للصوم خير من النوم

دي ليالي سمحه نجومها سبحه

اصحى يانايم يانايم اصحى

وحد الرزاق
د. مصطفى عراقي
25-05-2008, 08:14 PM
6

والله زمان


اصحى يا نايم

وحد الدايم

وقول نويت

بكره ان حييت

الشهر صايم

والفجر قايم

اصحى يا نايم

وحد الرزاق

رمضان كريم

*

مسحراتي قولو والله زمان

منقراتي وادي نقره كمان

طوال السنه في حيكم هيمان

قولوا العوافي يللي قلبك وافي

من القوافي لما خدت الامان

قلدت بحر النيل بلا استئذان

بين الشواطئ امشي في الاحضان

واضاحك الفجريه واسقي الغيظان

واهدي الكباري نظره الولهان

واكسر خيالي في كل عود انسان

وفي نيتي اكبر من الفيضان

الضي بعد الري من اسوان

عبرة حياتي وصنعة الفنان

معنى المروءه وزرع الاطمئنان

في كل مطرح لما الاقي حنان

والاقي قعده تجمع الخلان

والاقي نسمه من هوى الاوطان

والاقي قمح جنب منه ريحان

والاقي طيب : افتكر رمضان

*

المشي طاب لي والدق على طبلي

ناس كانوا قبلي قالوا في الامثال

الرجل تدب مطرح ماتحب

وانا صنعتي مسحراتي في البلد جوال

حبيت ودبيت كما العاشق ليالي طوال

وكل شبر وحته من بلدي حته من كبدي حته من موال

*

رمضان حبيب الندى بالعوده ايامه

انا قلبي ياما نده على معنى ايامه

اذكر المؤمنين بالحق و صيامه

يا مصر يا جنه خضرا ويا رباط الخيل

وجب من الليل جهاد الفجر وقيامه

*

اصحى يانايم وحد الدايم

السعي للصوم خير من النوم

دي ليالي سمحه نجومها سبحه

اصحى يانايم يانايم اصحى

وحد الرزاق
د. مصطفى عراقي
25-05-2008, 08:15 PM
7

ياهادي

اصحى يا نايم

وحد الدايم

وقول نويت

بكره ان حييت

الشهر صايم

والفجر قايم

اصحى يا نايم

وحد الرزاق

رمضان كريم

*

مسحراتي

منقراتي

بعد الصلاة

علي نبينا

با قول يا هادي

العقل زينه

الله هادينا

ع الندهه جينا

علي ريح حجازي

سقنا الهجينه

الله يجازي

اللي يهاجينا

أنا قلت نخلي

أحسن مناخ لي

حط السفينه

دانخيل سباطه

قطع رباطه

خد تحت باطه

كل المدينه

حمام بلدنا

زغلول بلحنا

فرد جناحنا

علي وادينا

وكان فلاحنا

دنيا ودينا

بتنا وصبحنا

أحرار وادينا

ليلنا وصباحنا

عرسان عرايس

نقيم فرحنا

وولاد مدارس

يكمل نجاحنا

وعرب فوارس

تقول فتحنا

فتحاً مبينا

أنا قلت سجده

لله سجده

لعدوي سكته

الرؤية ثابته

*

المشي طاب لي والدق على طبلي

ناس كانوا قبلي قالوا في الامثال

الرجل تدب مطرح ماتحب

وانا صنعتي مسحراتي في البلد جوال

حبيت ودبيت كما العاشق ليالي طوال

وكل شبر وحته من بلدي حته من كبدي حته من موال

*

في عيني إنسان وفي عيون البلد إنسان

حلوه البلد بعدما داست علي الأوثان

حلوه البلد شهداءها قدموا العرسان

حلوه البلد يا أحن قلوب وأوفي لسان

غني الأمل يا حبيب والفتح ياحسان

ما سمعت الدنيا أمثال العرب شعرا

ولا رأت مثل فرسان العرب فرسان

*

اصحى يانايم وحد الدايم

السعي للصوم خير من النوم

دي ليالي سمحه نجومها سبحه

اصحى يانايم يانايم اصحى

وحد الرزاق
د. مصطفى عراقي
25-05-2008, 08:17 PM
8

بعلو حسي

اصحى يا نايم

وحد الدايم

وقول نويت

بكره ان حييت

الشهر صايم

والفجر قايم

اصحى يا نايم

وحد الرزاق

رمضان كريم

*

مسحراتي

منقراتي

وأنا بانادي

بعلو حسي

يادنيا حسي

الحق بين

ومصر أولي

حققنا ثروة

وقمنا صخرة

وعرقنا زين

أرض البطوله

إحنا اللي إيدنا

خلت حديدنا

حديد حنين

علي الطفولة

وصباح مندي

علي الولاد دي

طريقها هين

ما فيهش غوله

وأنا السنه دي

شقت سنابلي

في كل وادي

والليل خطب لي

قمر زبادي

بسحر بابلي

وضني هادي

فردت حبلي

بطول بلادي

*

المشي طاب لي والدق على طبلي

ناس كانوا قبلي قالوا في الامثال

الرجل تدب مطرح ماتحب

وانا صنعتي مسحراتي في البلد جوال

حبيت ودبيت كما العاشق ليالي طوال

وكل شبر وحته من بلدي حته من كبدي حته من موال

*

أنا بلدي حره بنيت علي غصنها عشي

ولقمة الحب بتفطرني وتعشي

أنا عاوز ابني يعيش والظلم ما يعيشي

يارب يا اللي خلقت لنا البصر واللمس

ولا ترسم الشمس إلا النور علي وشي

*

اصحى يانايم وحد الدايم

السعي للصوم خير من النوم

دي ليالي سمحه نجومها سبحه

اصحى يانايم يانايم اصحى

وحد الرزاق
د. مصطفى عراقي
25-05-2008, 08:19 PM
9
افتح يا سمسم

اصحى يا نايم

وحد الدايم

وقول نويت

بكره ان حييت

الشهر صايم

والفجر قايم

اصحى يا نايم

وحد الرزاق

رمضان كريم

*

مسحراتي

منقراتي

ومن سنين

يا مسلمين

علني كل عتبه

بافوت أسحر

والليل برقبه

وعمه وعدبه

في الحسن عجبه

عمال يفقر

وأنا بانقر

لا علمي غلبه

ولا فني مظهر

ولادي طلبه

في أول أزهر

وتانيه جيزة

فتره وجيزه

يطلع مهندس

والبنت نرجس

بدال ما تكنس

حتبقي قاضية

جيوبي فاضية

ونفسي راضية

يهديكي طبعى

يا دنيا طاوعى

ويا سكة طاولي

*

المشي طاب لي والدق على طبلي

ناس كانوا قبلي قالوا في الامثال

الرجل تدب مطرح ماتحب

وانا صنعتي مسحراتي في البلد جوال

حبيت ودبيت كما العاشق ليالي طوال

وكل شبر وحته من بلدي حته من كبدي حته من موال

*

يا حضرة الباشا فاكر ياما سحرتك

ودمعي تحت القمر بالليل مسح حارتك

وقلت لك خلي قطفه لك وقطفه لي

وربنا يخلي أطفالك وأطفالي

ولا كنت بتصلي يا باشا ولا بتصوم

غير كل حبه علي السبحه تقول مخصوم

وكنت يا باشا ما بتسمعش بالعربي

حضروا أطبا يردوا السمع والطاعه

حضروا أطبا يداووا نفس طماعه

إفتح يا سمسم جماعه

حضروا بسماعه تكشف قلب سحارتك

*

اصحى يانايم وحد الدايم

السعي للصوم خير من النوم

دي ليالي سمحه نجومها سبحه

اصحى يانايم يانايم اصحى

وحد الرزاق
د. مصطفى عراقي
25-05-2008, 08:20 PM
10

في الغيط نقاية


اصحى يا نايم

وحد الدايم

وقول نويت

بكره ان حييت

الشهر صايم

والفجر قايم

اصحى يا نايم

وحد الرزاق

رمضان كريم

*

مسحراتي

منقراتي

في غيط حراتي

طرح كلام

آه يا سلام

أنا قلت آيه

ورميت شقايا

في الغيط نقاية

طرح كلام

آه يا سلام

خلعت بابي

ورميت شبابي

في الغيط حبابي

طرح كلام

آه يا سلام

وادور مغمي

واسقي بدمي

الغيط يا عمي

طرح كلام

آه يا سلام

كدا القوافي

تقول أوافي

كدا طوافي

طرح كلام

آه يا سلام

كدا قلبي وافي

للي انكتب لي

ياليل عوافي

*

المشي طاب لي والدق على طبلي

ناس كانوا قبلي قالوا في الامثال

الرجل تدب مطرح ماتحب

وانا صنعتي مسحراتي في البلد جوال

حبيت ودبيت كما العاشق ليالي طوال

وكل شبر وحته من بلدي حته من كبدي حته من موال

*

حته من بلدي حته لأم أولادي

بنيت لها عش بعيدان الأمل ورموش

كان قلبي فاعل يغني في المقاوله دي

ويقول شكرت العواذل اللي ما بيرموش

ويقول شكرت العواذل اللي يرمونا

ما كنتش اضرب ضلوعي لولا آلمونا

ولا أضرب المونه أبني لأم أولادي

*

اصحى يانايم وحد الدايم

السعي للصوم خير من النوم

دي ليالي سمحه نجومها سبحه

اصحى يانايم يانايم اصحى

وحد الرزاق
علاء عيسى
25-05-2008, 09:55 PM
د مصطفى العراقى
هدية
غالية
من شخص غالى
تحياتى
وأعتزر على مقاطعة
تدفق
هديتك
ولكن أردت فقط تسجيل حبى وتقديرى
راضي الضميري
25-05-2008, 10:05 PM
بارك الله فيك أيها الشاعر الرائع

د. مصطفى عراقي

سلمت يداك

تقديري واحترامي
د. مصطفى عراقي
26-05-2008, 04:04 PM
د مصطفى العراقى
هدية
غالية
من شخص غالى
تحياتى
وأعتزر على مقاطعة
تدفق
هديتك
ولكن أردت فقط تسجيل حبى وتقديرى


أخي العزيز الشاعر الرائع الأستاذ علاء عيسى

بل شرفتني والله بجمال حضورك
وكرم قبولك للهدية

وهذا من سمات الكرام

فلك كل الشكر والتقدير

ودمت بكل الخير والسعادة والود

محبك: مصطفى
د. مصطفى عراقي
26-05-2008, 04:06 PM
بارك الله فيك أيها الشاعر الرائع
د. مصطفى عراقي
سلمت يداك
تقديري واحترامي


وسلمك الله يا أخي الغالي الأديب الحبيب الأستاذ راضي الضميري

وأسعدك الرحمن كما تسعد قلوبنا بحروفك المنيرة
وحضورك النضير


ودمت بكل الخير والسعادة والفضل

محبك: مصطفى
د. مصطفى عراقي
26-05-2008, 04:08 PM
-11-
عنتر

اصحى يا نايم
وحد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحد الرزاق
رمضان كريم
*
مسحراتي
منقراتي
بين الحارات
بافوت أسحر
وأقول واعبر
زحنا اللي زاحنا
ولفوق قزحنا
شوف قوس قزحنا
في الجو قنطر
تعاشوف يا عنتر
عنتر وعبله
عامل وعامله
أما المزامله
تهديهم أكتر
تشد قوسهم
وتزيده أسهم
ترفع رءوسهم
الله أكبر
أما الشهادة
جت تاتا تاتا
بتتهادي
وتتغندر
أما نوبتها
خدت نوبتها
بيبنوا بيتها
علي الشمندر
شكر فعالي
آبا ودعالي
بسد عالي
الخير يفجر
ويشق صحرا
علي يد سحرة
تلبس مشجر
والميه تجري
وتخف رجلى
من الوجع دا
أنا مالي قعده
*
المشي طاب لي والدق على طبلي
ناس كانوا قبلي قالوا في الامثال
الرجل تدب مطرح ماتحب
وانا صنعتي مسحراتي في البلد جوال
حبيت ودبيت كما العاشق ليالي طوال
وكل شبر وحته من بلدي حته من كبدي حته من موال
*
عنتر ملك في القوافي وغزلها
صرع سباع الفيافي ورق لغزالها
عشق حوريه اسمها الحريه وغزالها
ذبيان وطي وضرب في الحي بالحدين
السلم كان حلم ما اتلمت عليه يدين
إن عاد لعبه قطف قبله من الخدين
وجمع في توبها خيوط الشمس وغزلها
*
اصحى يانايم وحد الدايم
السعي للصوم خير من النوم
دي ليالي سمحه نجومها سبحه
اصحى يانايم يانايم اصحى
وحد الرزاق
د. مصطفى عراقي
26-05-2008, 04:11 PM
-12-
ألف باء
اصحى يا نايم
وحد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحد الرزاق
رمضان كريم
*
مسحراتي
منقراتي
محاضراتي
تجلي العقول
في عصر ذري
لازم نقري
شعر المعري
ولازم نقول
أولي ابتدائي
ألفي وبائي
أكرم آبائي
الناس أصول
كتب الأئمه
جبل وقمه
تطلع يا إما
تنزل نزول
عقلك في راسك
تعرف خلاصك
تحفظ تراثك
تصبر تنول
فرج قريب
وصبر طيب
وعود يشيب
عين العزول
شده تزول
لكن تعلم
ولا رجل تطلع
إلا بسلم
ولا نخل فرع
إلا المقلم
ولا علم ينفع
إن لم تسلم
علي الرسول
ختامها مسكي
وشجرها مكي
والفرع نابت
من أصل ثابت
وأنا نفسي طابت
*
المشي طاب لي والدق على طبلي
ناس كانوا قبلي قالوا في الامثال
الرجل تدب مطرح ماتحب
وانا صنعتي مسحراتي في البلد جوال
حبيت ودبيت كما العاشق ليالي طوال
وكل شبر وحته من بلدي حته من كبدي حته من موال
*
أقول لك الحق واضرب لك مثل ساير
وان كنت ما عرفشي لا اخبي ولا اساير
من صغر سني وأنا صاحب مزاج ثاير
واكمني ثاير لا يمكن يا ألف بائي
تلاقي زيي علي عهدك أليف باقي
واكمني ثاير باقول من فات قديمه تاه
لابد للحي يترحم علي موتاه
واللي أتي بالجديد لولا القديم ما أتاه
يا أمتاه
أنا إبنك ع الأثر ساير
*
اصحى يانايم وحد الدايم
السعي للصوم خير من النوم
دي ليالي سمحه نجومها سبحه
اصحى يانايم يانايم اصحى
وحد الرزاق
د. مصطفى عراقي
26-05-2008, 04:15 PM
-13-

هلال


اصحى يا نايم

وحد الدايم

وقول نويت

بكره ان حييت

الشهر صايم

والفجر قايم

اصحى يا نايم

وحد الرزاق

رمضان كريم

*

مسحراتي

منقراتي

أملك قيراطي

من الكليم

رمضان كريم

الله أكرم

دا غير قيراطى

من الحصير

إن زاد إيرادي

في الدائرة دي

يصبح اراضي

بساط حرير

زي الهليل

تلاقيه قليل

تفضل تليل

يصبح كبير

يفضل يناور

بين المناور

في جوز أساور

يقع أسير

يرجع يغازل

بين المنازل

مالوش عواذل

هلال أمير

هلال يقول لي

أنا حلو كلي

شوف عقد فلي

صنع القدير

هلال حمامه

تحت الغمامه

لبست عمامه

ما فيهاش تطير

هلال بيجري

في بحر هجري

قال ضي فكري

للمستنير

هلال بلدنا

علي الف مادنه

لله حمدنا

حسن المصير

*

المشي طاب لي والدق على طبلي

ناس كانوا قبلي قالوا في الامثال

الرجل تدب مطرح ماتحب

وانا صنعتي مسحراتي في البلد جوال

حبيت ودبيت كما العاشق ليالي طوال

وكل شبر وحته من بلدي حته من كبدي حته من موال

*

لو تسأل الليل يقول لك راضى بالمقسوم

والقله في الفجر حتقول لك عن الماء صوم

واحنا عرب كلنا أصحاب طرب مقسوم

حلوين على كل حال لكن سوا أحلى

يا سواحليه

ومن الصعيد للبحيرة للدقهلية

إحنا أهليه

تجمعنا ساعة السحور تجمعنا طبليه

قضينا ع الجاهلية نحمد الواحد

القلب واحد ولو كان الرغيف مقسوم

*

اصحى يانايم وحد الدايم

السعي للصوم خير من النوم

دي ليالي سمحه نجومها سبحه

اصحى يانايم يانايم اصحى

وحد الرزاق
د. مصطفى عراقي
26-05-2008, 04:16 PM
-14-

حرفه هوايه

ا
صحى يا نايم

وحد الدايم

وقول نويت

بكره ان حييت

الشهر صايم

والفجر قايم

اصحى يا نايم

وحد الرزاق

رمضان كريم

*

مسحراتي

منقراتي

باقول مرادي

أعيش وادادي

وأخدم ولادى

أخدم بلادي

وأنا المنادي

أول ملبي

كلامي ميه

من نور عينى

يشهد على

الله ربي

بالسر عالم

ولا كنت ظالم

ولا مستخبى

وعلى السلالم

وفرت دنبى

من غير زوايا

مشيت فى دربى

درت بهوايا

وهواي دار بى

وحسى لعلع

الحي ولع

أنا باب مخلع

الخير في ضبي

وان قلت عجبي

السد أعجب

عيونه سته

حيفوت يكهرب

في كل حته

والميه تركب

على بسكلته

من غيرها أركب

أنا نلت طلبى

حرفه هوايه

ودا سر طربى

طرت بهوايا

وهواى طاربى

عديت مطبى

*

المشي طاب لي والدق على طبلي

ناس كانوا قبلي قالوا في الامثال

الرجل تدب مطرح ماتحب

وانا صنعتي مسحراتي في البلد جوال

حبيت ودبيت كما العاشق ليالي طوال

وكل شبر وحته من بلدي حته من كبدي حته من موال

*

أنا لحبايبى حبابي القلب نادرها

ما هيش جواهر يا قوت باهر ونادرها

ولا مواهب ولا راهب بني ديرها

في كل يوم علي كل الناس أنا أديرها

حبابي قلبي غيطان وحيطان بمنادرها

وتراب حواري وشوارع في بنادرها

كما أجنحه للحمام متعوده ع السقف

رقصت دبيحه يا مين يظبط عليها السقف

قوم شوف على السقف بترفرف بنادرها

*

اصحى يانايم وحد الدايم

السعي للصوم خير من النوم

دي ليالي سمحه نجومها سبحه

اصحى يانايم يانايم اصحى

وحد الرزاق
د. مصطفى عراقي
26-05-2008, 04:18 PM
-15-
التبات والنبات

اصحى يا نايم
وحد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحد الرزاق
رمضان كريم
*
مسحراتي
منقراتي
صاحب مدايح
وموشحاتي
الله يسامح
زمن الشحاته
كان سيفي طايح
سيف خردواتي
دلوقتي فالح
في مناوشاتي
كسرت جانح
ابن الذوات
علقته سابح
خيال مقاته
وبقلب صالح
من غير شماته
على القوالح
سهران وشاتى
قلت الي رايح
غير اللي آتى
رمضانا صابح
صابح ليلاتى
قال أنت سارح
تشهد زيناتى
أنا بحر مالح
يحلى يوماتى
وأنا ليلى طارح
عنب بناتى
وهلالى فاتح
بلد الزناتى
أنا قلت واضح
يا شوق حياتى
كل الروايح
هلت جهاتى
والشر زايح
والخير مواتى
وله لوايح
ولقيت مطارح
لمت شتاتى
عيشى فى تباتي
وفى نباتى
يا أم إبنى
بحرى وقبلى
الخير تقابلى
*
المشي طاب لي والدق على طبلي
ناس كانوا قبلي قالوا في الامثال
الرجل تدب مطرح ماتحب
وانا صنعتي مسحراتي في البلد جوال
حبيت ودبيت كما العاشق ليالي طوال
وكل شبر وحته من بلدي حته من كبدي حته من موال
*
عشنا وشفنا الكواسر انكسر نابها
وخبرتنى بهيه أن الغيطان أبهى
وبنتها في المدارس أوله نابهه
وعيونى قابلت عيون من كل خير نابها
أنا قلت يوم المنى اليوم اللي كان منى جاه
وكان لبي بينى وبينك يا قمر مناجاه
الحمد لله عشت وقلبى غنى بها
*
اصحى يانايم وحد الدايم
السعي للصوم خير من النوم
دي ليالي سمحه نجومها سبحه
اصحى يانايم يانايم اصحى
وحد الرزاق
شريفة السيد
07-06-2008, 05:00 AM
طبعا شيء ساحر ... مذهل

أنت رائع يا دكتور مصطفى على هذه الاختيارات الموفقة

بارك الله فيك

المسحراتي وغيرها من أعمال أستاذ الأساتذة الشاعر الكبير فؤاد حداد

من روائع الأدب العربي

فلك الشكر والتقدير على تذكير العين والأذن بتاريخنا العربي العظيم

مودتي
وائل محمد القويسنى
10-06-2008, 03:54 AM
الحبيب د / مصطفى
كل ما تخطه هدية
ولن أرد على هديتك هذه المرة إلا بهدية
تقبلها منى
المسحراتى للشاعر أحمد فؤاد نجم
حبلت الأيام سنين
ولدت الأيام دهور
دامت الأيام لمين
وحدوا المولى الغفور
صلِّ ع اللى ف القيامة يشفعك
واصحى يا اللى نمت م اللى بيوجعك
واكشف اللى بيؤلمك وبيمنعك
وانده اللى لو ندهته يسمعك
قول يا جارة
قول يا جار
مهما طال الليل وجار
كل جرم وله مدار
والكواكب دوارين
وحدوه يا مؤمنين
صحى نومك يا اسطى فكرى يا اللى ناسى
هل يومك يا اسطى مرسى يا اللى ناسى
يا حبايب مصر يا أهلى يا ناسى
اللى يعشق بالسهر حتما يقاسى
إصحى يا نايم كفاية
وحد الإنسان معاية
طالت الليل الرحاية
والحدادى قلقانين
وحدوه يا مؤمنين
*****
يا اللى صاحيين فى البيوت
يا اللى كاشفين المكان
يا اللى سامعين السكوت
يا اللى واعيين للزمان
إستعدوا للقيام
إستعدوا للقيام
واقبلوا منى الكلام
مصر نايمة من سنين
وحدوه يا مؤمنين
كل الود والتقدير
وائل القويسنى