حسرة براءة ... وحسرة غرق

[الهام احمد سعد]

ياللى بتجيبوا الحقوق
حقى ضايع مش لاقيه
مين يجبلى
حق ابنى
اللى لما كان ف حضنى
شده موج الغدر منى
مين يحاسب
اللى قصر واللى كسر
واللى بهرب
لما حس الخوف مقرب
مين يواسى مين يطبطب
مين ومين ؟!!
ملقيناش غير اللى يضرب
ع الوجع اللى ف قلبونا
والحقيقة .......
كل واحد جاله حقه
هم ليهم واحنا لينا
احنا لينا ألف حسرة
هم ليهم ألف فرحة
والبراءة ....
اللى كان دافع تمنها
اللى ماتوا من زمان
اللى راحوا عشان عيالهم
لجل حتى يسدوا جوعهم
والامل كان فى رجوعهم
رجعوا بس بألف صرخة
يا بلدنا
ياللى حبك هو قوتنا
ليه حكمتى انتى بموتنا
موتنا فيكى الف مرة
ميتين م الجوع نكابر
ميتين م الخوف نعافر
ميتين م الغربة لكن
خوفنا نرجع
تبقى حفرالنا المقابر
يابلدنا
رغم انى لسة خايف برضه منك
بس لازم انى اقولك
عمر ما اقدر انى احبك
مش هكونلك قلب صافى
مش هشيلك وقت جرحك
أصل ضايع فيكى حقى
رجعى من تانى حقى
تاخدى حقك
**************
براءة قضية العبارة سجن لنا

[علاء عيسى]

ليه حكمتى انتى بموتنا
موتنا فيكى الف مرة
ميتين م الجوع نكابر
ميتين م الخوف نعافر
ميتين م الغربة لكن
خوفنا نرجع
تبقى حفرالنا المقابر
يابلدنا

" جميل هذا التشكيل بالكلمات
وجميل ان تذكرينا بما لم ننساه يوماً "
والجمال هنا أن العمل مستمر دائم
ولذا كنت أتمنى أن لا تكتبى التوضيح تحت العمل
لأن مأساة الجوع مستمرة والاهمال مستمر
ان كانت تلك هى عبارة " السلام "
فاليوم أشبه بالبارحة وكان ماحدث هو نفسه ماحدث بعبارة 98
والقطارت ، .............الخ
المهم العمل فوق الرائع
ولكن
" ابنتى الهام "
يبدو ان الحماس وشدة الحب جعلكى تكتبين كلمات هنا
أوقعت العمل فى فخ غير مريح
بس لازم انى اقولك
عمر ما اقدر انى احبك
مش هكونلك قلب صافى
مش هشيلك وقت جرحك

الوطن وطن
الوطن ارض وسماء وانتماء
البلد بلد
وليس ما يفعله افراد من أخطاء يقدر على أن يمحو من داخلنا حب الوطن
حتى وإن أتيتى بتلك المبررات
أصل ضايع فيكى حقى
رجعى من تانى حقى
تاخدى حقك
هذا
ومع كل
فعملك
استمتعت به جيداً
صباحك
سكر
الهام

[جوتيار تمر]

الهــــــــــــام...
توظيف الحدث بحد ذاته عمل مميز ، فكيف وهو بهذا الاحساس المرهف وهذه اللغة الانسانية الراقية.

محبتي
جوتيار

[مصطفى الجزار]

الشاعرة المبدعة/ إلهام أحمد سعد

رائعة هذه القصيدة التي تنزف ألماً مما رأيناه ونراه كل يوم من ظلم وكيل بمكيالين وفساد في حياتنا.

وأنا مع المبدع علاء في عدم ذكر ما تحت القصيدة، وكان يكفي أن تضعي سطراً واحداً معناه (إلى غرقى عبارة السلام بعد صدور الحكم ببراءة القتلة) وفقط.

شكراً لك وفي انتظار المزيد من إبداعاتك يا إلهام.

تحياتي وتقديري

[إسلام شعله]

يابلدنا
رغم انى لسة خايف برضه منك
بس لازم انى اقولك
عمر ما اقدر انى احبك
مش هكونلك قلب صافى
مش هشيلك وقت جرحك
أصل ضايع فيكى حقى
رجعى من تانى حقى
تاخدى حقك

شعر جميل جداً يا إلهام
بس انا مش معاكى فى الكلام الاخير دا
مصر أدتنا حجات كتير
نيل صافى و احنا الى لوثنا سماء جميله و أحنا الى شخبطنا فيها
أرض نمشى عليها و احنا مليناه عفره و تراب , دنيا جميله , دنيا واسعه
و احنا ألى ضيقناها و خربناها

..

مصر
ترابك فوق راسى
تاج

عايش فى بيت
مهجور
أجمل من كل
القصور
علشان فى مصر
أم الدنيا
ام النور

مصر
ترابك ف عنيه
نور
و حبك فى قلبى
محفور

هفضل أقول
بحبك يا مصر
و أغنى و أطول
و أعيد فى الغنوه من الأول
مش مهم
أجوع
هبيع هدومى و اتغدى رومى
و أمشى شويه جمب نيلك
هحط همومى
على همومك
هعيش
هموت
هفضل أقول
بحبك

__________

تقبلى مرورى و تحياتى لك

[شيماء وفا]

مين غيرنا يجيب حقوقنا لينا
مين غيرنا يقول كفايه ليهم
اتظلمنا كتير وقاسينا كتير منهم وبيهم
لكن بلدنا لها حق علينا
حق لازم احنا نجيبه ليها
لازم نقول للظلم لأ
لازم نقول ألف لأ لكل فاسد وكل مرتشي
كل ال همه ازاى يغتنى بموتنا
ليه البراءه ياخدها ال تاجروا بدمنا
ليه يكون تعويض ولادنا عن يتمهم
مجرد فلوس ولا تكفي حتى يوم أكلهم
منين تجيب أمهم لجل ما تربيهم
وازاى تفهمهم معنى الوطن
لازم احنا ال نحميهم من كرههم لنفسهم ولوطن كل ذنبه
ان ولادوا طلعوا جاحدين ناكرين الجميل
ظلموا نفسهم قبل ما يظلموه
لازم احنا نقول كفايه
نرفع ايدينا بحق الفيتو ف وش كل خسيس جبان
ونقول خلاص كفايه
كفايه لحكم ظالم
كفايه لحكومه كارهانا
كفايه ال عملتوه فينا
لازم يكون ليكوا نهايه وبايدينا احنا هنكتب النهايه


الهام

كلماتك رائعه حماسيه ليتهم يسمعون ويبصرون

لكن لا تياسي فالوطن هو لنا وليس حكرا عليهم

فليفرحوا قليلا ولنصبر قليلا

وان غدا لشاهد عليهم وعلينا

تقبلي خالص تحياتى

[جولييت بدر]

الشاعرة المرهفة إلهام

قصيدة جميلة جدا

تحكي الوجع الحقيقي

من يوصل إحساس الناس غير الشعراء ؟؟

أبدعت ياعزيزتي .. لابد أن يصل الصوت لابد

أحب قراءة شعرك ومشاعرك الراقية


دمت متألقة

[أحمد عبد المنعم سرساوى]

المتجددة دائماً / إلهام
لن أتحدث عن الفكرة أو فنيات القصيدة
على قدر الإعجاب بالمبادرة
وهذا يعبر عن روح الشاعر الحية في كل وقت ومكان
شكراً لك بحجم إسهامك - نيابة عن الأدباء - في تشكيل الوعي القومي
ومواجهة أية محاولة لعزل نفوس الأمة الواحدة
ومن حديثنا عن الموضوع، لابد من الإشارة أيضاً لقصيدة الشاعر أشرف توفيق " كله قابض"
والتي كتبها إثر غرق العبارة، وأهنئه على صدور كتابه الجديد في الأدب الساخر
ويمكن أن نجمع ما كتبه الشعراء حول هذا الموضوع وندعو أيضاً للمشاركة
ليكون موقفاً للأدباء كسنة حسنة تطبق في كل ما يهم الأمة
طبعاً صيغة هذا التجميع أو إعداداته تعرفها الإدارة أكثر مني
تحيتي الخاصة لك شاعرتنا الحكيمة
وتحيتى للجميع
أحمد السرساوي

[وائل محمد القويسنى]

إلهام
هو الوطن....
نغضب عليه؛ نثور عليه؛ نهرب منه؛ لكنا نرجع إليه
شعرنا بالغربة على أرضنا كثيرا
لكنها فئة ندعو الله أن يهديها
أما مصر فهى وطننا
ومهما غضبنا نعود إلى ترابه
نحبه برغم عيوبه لأنه لا عيب فيه
إنما العيب فينا
نسأل الله أن يهدى كل ضال
قصيدة موفقة يا إلهام
لكنها لم تنتهى بعد
تقديرى
وائل القويسنى

[محمد نسيم السعدنى]

الى من اثارت احزانى \الهام
اعذرينى فليس لدى القدره على ان اضيف الى من سبقونى لذا ساعبر بكلمات بسيطه
واقول ان ليه ننتده على اللى بيجيو الحقوق ليه منمدش ايدينا وناخد احنا حقوقنا فلا يغير الله حتى بغبرون ما بانفسهم
بس اسف يالهام انا مش معاكى فى الموقف اللى اخدتيهخ ضد امك فمهما قست عليكحى هى امك مش بايدنا نحب غيرها ده مصيرنا مهما قسيت مهما ظلمت هى ام لازم نشيلها فده واجبنا
ومين عارف ممكن بكره؟
صح كده
الموضوع صياغته جميله جدا ولهذا وصل سريعا للقلب لكن بطريقه مؤلمه
بارك الله فيكى
ارجو تقبل مرورى

[محمد زغلول]

المرهفه الاخت الغاليه ,,,,إلهام

عهدنا فيك دائما الاحساس العالى
والكلمه الجميله


تقبلى تحياتى وإعجابى بحرفك


محمد زغلول

[الهام احمد سعد]

ليه حكمتى انتى بموتنا
موتنا فيكى الف مرة
ميتين م الجوع نكابر
ميتين م الخوف نعافر
ميتين م الغربة لكن
خوفنا نرجع
تبقى حفرالنا المقابر
يابلدنا
" جميل هذا التشكيل بالكلمات
وجميل ان تذكرينا بما لم ننساه يوماً "
والجمال هنا أن العمل مستمر دائم
ولذا كنت أتمنى أن لا تكتبى التوضيح تحت العمل
لأن مأساة الجوع مستمرة والاهمال مستمر
ان كانت تلك هى عبارة " السلام "
فاليوم أشبه بالبارحة وكان ماحدث هو نفسه ماحدث بعبارة 98
والقطارت ، .............الخ
المهم العمل فوق الرائع
ولكن
" ابنتى الهام "
يبدو ان الحماس وشدة الحب جعلكى تكتبين كلمات هنا
أوقعت العمل فى فخ غير مريح
بس لازم انى اقولك
عمر ما اقدر انى احبك
مش هكونلك قلب صافى
مش هشيلك وقت جرحك
الوطن وطن
الوطن ارض وسماء وانتماء
البلد بلد
وليس ما يفعله افراد من أخطاء يقدر على أن يمحو من داخلنا حب الوطن
حتى وإن أتيتى بتلك المبررات
أصل ضايع فيكى حقى
رجعى من تانى حقى
تاخدى حقك
هذا
ومع كل
فعملك
استمتعت به جيداً
صباحك
سكر
الهام


ابى الغالى المبدع / علاء عيسى
صباحك ورد وفل
اولا بشكرك على مرورك الكريم وهمساتك الحكيمة وكلماتك الرقيقة
ثانيا انت تعلم ان وقت الغضب عندما يمتلك القلم
فلا اى شيء يستطيع ايقافه ولا اطفاء تلك النار غير الكتابة
اعلم انى طغت عاطفتى على النص
ولكن انما لم اقصد الوطن الذى عشت فى خيره احبه واشرف به كما يشرف اننا ابنائه
انما قصدت فقط الظلم
فانا اكره الظلم كما تكرهونه كلنا نكره الظلم
سيدى ....
احترم رايك وافهم وجهة نظرك
فشكرا جزيلا على تلك الكلمات
لك خالص التقدير والاحترام
ابنتك
الهام احمد سعد

[قلب الشمس ام حبيبة]

لأ يا بنتي
لو بإيدي اديكي حقك
مش هخالف
مش هعين الظلم فوقك
مش هوافق
وانتي عارفة
عارفة ان الضعف....قادر
وانًي عامله
زي بنت بريئة طاهره
جم كلاب الليل أذوني
شوهوا ف العتمة صورتي
واما نور الصبح شقشق
ركبوا الحق ضهري
عارفة دولا يبقوا مين؟؟
يبقوا منكم
بس نار الحقد ساكنة
جوه منهم
وف نهايتي من كلامي
راح أقولك
إوعي مرة تسيبي حقك
م اللي سارقك
وان حقك
هوه حقي
وان مهما الظلم يعلى
مصر ...أمك
وان أولادها بحقيقي ؟؟
زيك انتي
إلـــــــــــهــــــــــا ااااااااااام
مجرد مداخلة بسيطة على نص اكبر من رائع
تحياتي لنصك البريء

[علي عطية]

رائع هذا الإلهام
ومبدعة تلك الصورة الجميلة

حب للوطن مهما كان منها بلدنا ستبقة في قلوبنا

وسنظل نقول
بنحبك يامصر بنحبك يامصر


مشكورة بعطاء النيل الخالد

وملهة دائما بجميل الإلهام

ابوعباد

[ايمان عبد الله]

أختى الغالية الهام
قصيدتك تفجر طاقات دهشة و اعجاب و حزن ايضا كيف جمعت هذه المتناقضات بداخلى ؟
لله درك أختى الشاعرة الملهمة
أختك

[الهام احمد سعد]

الهــــــــــــام...





توظيف الحدث بحد ذاته عمل مميز ، فكيف وهو بهذا الاحساس المرهف وهذه اللغة الانسانية الراقية.


محبتي
جوتيار




المبدع العزيز الغائب / جوتيار تمر...متى اكتب ... أنتظر منك دائما التحليل والرد...دمت مبدعا متواصلا شكرا لرقة حرفك ومرورك الكريم...تقبل خالص تحياتى وتقديرى...إلهام أحمد سعد

[أحمد موسي]

رجعى من تانى حقى
تاخدى حقك
كتمتي يامه الصوت ف بقي
إكتميه جوه بقك

بس رغم الغدر فيكي
لسه ساكن فيا حبك
لسه بشتاق للخضار
ييجي تاني ويملا أرضك

الطمعجيه يا بلدنا فيكي ناموا وأنتخوا
وإللي شافوكي حزينه بردو يامه سكتوا وتنحوا
وسكتنا عن سرقه حقوقنا
رغم الكلاب لو شافوا يوم واحد حرامي بينبحوا
وإحنا اقل من الكلاب علشان رضينا بالعذاب
ورفضنا لو نتلحلحوا


إلهام إنتي والله ممتازه
أسجل إعجابي بقلبك وقلمك
تقبلي المرور

أخوكي / أحمد موسي

[ولاء غنيم]

صديقتى العزيزه \الهام احمد سعد
لا تسعفنى الكلمات للتعبير عما أكنه لك من اعجاب وتقدير
اعجاب بكلماتك المعبره الوافيه
وتقدير لادبك واخلاقك وفكرك الرائع
تقبلى اهدائى
ودعائى لكى بدوام الصحه والعافيه وأتمنى لكى السعاده
وأتمنى من الله أن تظلى تكتبى أروع وأروع وتتحفينا بكتاباتك الرائعه
مع حبى

والسلام عليكم ورحمة الله وبركاته
من أختك وصديقتك\ولاء غنيم