وليه راجع ؟

[الهام احمد سعد]

وليه راجع؟
ماكنا خلاص ما صدقنا
نزيح الهم م السكة
ونفتح لينا باب من نور
يبدل فينا عتمتنا
لقينا الخبط جاى ع الباب
فتحناله لقينا سواد
عمى عينا
سنين عمرك يا حزن كتير
وطالت بيك
ومش عارفين نلاقى مكان
نكون وسطيه ولا نقابلكش
رضينا بيك... وليه مرضيتش؟
حكمت علينا بالقسوة
وسيبت القلب للوحدة
ماكان فرحه مونس فيه
وايه ذنبه ؟
دا كان ذنبه الوحيد انه
نوى يفرح
نوى يحلم بحب كبير
يكون سنده ف ايامه
يكون وياه ... يكون زاده
ولما لقاه وحبه بجد
تصمم ليه تقيم الحد؟
تعيد من تانى ف عذابه
كرهنا القسوة ف ملامحك
يموت الفرح لو لمحك
حاولناكتير نزوغ منك
ونهرب للأمل والفجر
نزيح سجنك
ولكن برضه وسط الجرى
كلاب ليلك بتلمحنا
وتلحقنا فتنهشنا
تخربش فينا روح بكره
ف ينزف بكره وينازع
يموت بكره ... يموت بعده
ونلقى العمر عدى وفات
هتعمل فينا ايه اكتر
من اللى فات
كرابيجك بقت واخدة على ضهورنا
نطقت الحكم بالاعدام على ظهورنا
وناوى تمحى فى روحنا
لكن روحنا مهيش هتروح
ولا تسمح
يكونلك وسطنا مطرح
نوينا حربنا وياك
وراح تبقى أكيد مهزوم
وراح نكسب وراح نقوى
عشان نمحى سواد ليلك
ونرسم تانى فجر جديد
وحلم جديد
وقلب سعيد
بضحكة قلب بيحبه
وطرحة وفرحة تجمعهم
ومش هيسيبوا ليك فرصة
تفرق لحظة ما بينهم
7/6/2009

[أحمد موسي]

بسم الله ما شاء الله حقيقة هذه القصيده فاقت الوصف
وفاقت التعليق

إلهام أحمد سعد
رائعه رائعه رائعه

كرهنا القسوة ف ملامحك
يموت الفرح لو لَمَحَكْ
على حسب نطقي قرأتها هكذا


وليه راجع وليه رافض تودّعنا
ولو نمشي ف سكة فرح
ليه منها ترجّعنا
حرام دّ اللقمه بناكلها
وبنغمسها بدموعنا
وحتى العمر كارهينه
ودنيتنا بلا معنى
خلاص ياحزن فرّقنا
وشتتنا وجمّعنا
ونسينا ليالي الفرح
وقول يا حزن موّالك
وسمّعنا
وقول يا حزن موّالك
وسمّعنا


أعتقد أنني أول من يعانق هذا الإبداع
وأنا فرح بهذا

تقبلي هذا الإرتجال الصغير
من أخيكِ الصغير

تحيتي وإلى تقدم دائم بإذن الله


أحمد موسى

[احمد محمد جبر]

أحيي فيكي هذا النبع الذي لا ينضب والمعين الذي لا يجف مزيدا من التقدم والارتقاء
اخوكي احمد

[أحمد حاتم]

الأخت إلهام
جميل جدا ورائع خطابك لهذا الحزن
وكأنك ترصدين تحركاته الحثيثة ...
.........................................
حكمت علينا بالقسوة
وسيبت القلب للوحدة
ماكان فرحه مونس فيه
وايه ذنبه ؟
دا كان ذنبه الوحيد انه
نوى يفرح
نوى يحلم بحب كبير
يكون سنده ف ايامه
يكون وياه ... يكون زاده
ولما لقاه وحبه بجد
تصمم ليه تقيم الحد؟
.....................

رائعة يا إلهام
تحياتى

[علاء عيسى]

جميل الهام
عندك هنا تراكيب بكر
والفاظ جميلة
قاموس مفرداتك
زاخر وعامر ومتجدد
تحياتى
وامتحانات موفقة

[غازى كلخ]

أختي إلهام
وتبقى مصر ولاّدة.
الله يا شاعرة المنصورة والعامية المصرية المحببة للقلوب
من غزة لك كل الود مع باقة ورد جوري غزاوي بجمال شِعرك ياإلهام

[خالد الهواري]

انا جاي امس بس
كل الكلام الحلو اتقل قبل منا ادخل هنا
بس يا رب ما اكون قصرت
خالد الهواري

[الطنطاوي الحسيني]

اختنا الهام
الفاضلة المبدعة
قصيدة جميلة فيها ابداع وتجدد
ويسمح لي اخي علاء عيسى بالتثبيت للتشجيع والابداع الجميل
اغبطك على قوة العروض والبحر الصعب
تحياتي وتقديري

[شاهين أبوالفتوح]

من أجمل ما قرأت لك يا إلهام ، في القصيدة دي أمل بيعافر وقادر ينتصر ..و ما أحوجنا للانتصار !

احترامي

[محمد عبد القادر]

الشعر عندك يا شاعرة
ليه معنى و قيمة و هدف
النص جميل بفكرته و معانيه و تعبيراته
النهاية عجبتنى جداً
تحياتى
و
إلى لقاء

[أحمد محسن الحديدي]

جميل مستواك في الشعر الذي أراه يرتفع تارة بعد أخرى
لاحرمنا الله منه

[زياد موسى العمار]

الله الله يا إلهام
على شان انا بعرف شوية في المصري جيت هنا وشفت الحلاوة دي كلها ما شاء الله.
جميلة ورقيقة وعذبة الصور والمعاني بحق يا إلهام
تحيَّاتي لك زاخرة بالودّ والاحترام
زياد عمار
محبَّتي

[محمد نسيم السعدنى]

كعادتك رائعه
مررت فقط اسجل اعجابى
تحياتى

[الطنطاوي الحسيني]

الفاضلة المبدعة الاخت الهام سعد
سلام الله عليك ورحمته وبركاته
اين انت ايتها المبدعة اطلت علينا غيبة ابداعك
و ثراء فنك وموضوعاتك وجمال ترنمك وموسيقاك اختاه
يسر الله لكم كل عسير وردك الينا بكامل الابداع