دور على بنت الحلال

[زاهية]

رد على قصيدة الشاعر أحمد موسى(شاعر ميت)
:0014:
ياابني استنى شويه عليا
واسمع ماما هتقول إيه
ماما عندها خِبره كفايه
تخلي الواحد صاحيه عِنيه


الدنيا ياابني بتلعب بينا
ساعه يمينْ وساعه شمالْ
بتخلي العاقل حيرانْ
مابيعرفشِ هدوء البالْ


لكن أكبر صفعة لينا
الحب الْــ خلا عقول الناس
صايعة ومايعة ماتفرقشِ
بين الصالح والنخاسْ


مش بس الستات بتلعبْ
شروي غروي عل حبلين
برضه الرجاله عم تلعب
بتجْمَعْ قلبْ ويَّا اتنينْ



بص لجنبكْ ولقدامكْ
هتشوفْ حاجة غريبة بشكلْ
العشاق جابوا موضة جديدة
فيها غضب الله والأهلْ


عشق مصالحْ ف أي مطارحْ
مشْ مهم البيتْ والسترْ
مشْ مهم كتابْ مأذون ْ
قبلِ ماينشاع السرِّ


سوسو بتعرفْ إنو حمادهْ
عندو زوجة وجوز أولادْ
وبرضه بتعرف إنو مراتو
مش هتسيبو بشربة ميَّهْ
يروح من إيدها
ان كان لِسوسو أو لِسعادْ



شاهدْ واحكمْ بس بذمة
أوعى تحرفْ لما تعرفْ
انو الدنيا مش هتروقْ
إلا لما الإنسان فيها
هينام جوَّا في الصندوقْ


ان كنت عايز ياابني تعيشْ
مش داير منتوفِ الريشْ
دور على بنت الحلال
وان كانتْ بنتْ الدراويشْ


بقلم
زاهية بنت البحر
:001::0014::001:

[أحمد موسي]

ماما قالتلي وصدَق القول
علشان يبقى الحال معدول
بسّ يا ماما ابنك غلبان
مبيعرفش ازّاي هيفرّق
بين الصالح والخوّان
لسّه ما خدتش خبره يا أمي
بسّ أكيد هنساها وهمّي
بكره يزول ويفارق دمّي
هيا فـ عمري يدوب كات ذكرى
بسّ نسيتها
وانا مش هندم إني هويتها
أو حبيتها
بكره هترجع هيا بشوقها
تقولّي ياريتها
بس انا هسمع كلمة ماما
وأشوف بنت حلال اخطبها
تحلى حياتنا بذكر الله
ويامحلاها بجدّ حياه
واتعلّم مـِ الماضي لبكره
قولك يا امّه دَ حبل نجاه
وآهي دنيتنا لعبت بيّا
شمال ويمين
واتعذبت وشفت ودقت
مرار وأنين
بسّ خلاص الحال اتبدّل
يُسر ولين
وانا يا ماما أديني كبرت
ومن الدنيا آهو اتعلّمت
هختار إحدى ذوات الدين
نربط بعض بحبل متين
أصل يا ماما الدنيا نصيب
حتى خطانا فـ قلب الدنيا
مرّه تصيب والتانيه تخيب
بس يا ريتك قلتي نصيحتك
دي من الأوّل
كانت خطوة رجلي الضايعه
أكيد تتحوّل
بسّ انا بحمد ربّي كتير
إنّي صحيت من وهم كبير
فقت لروحي .. وحتّى جروحي
طابت يا امّه بفضل دعاكي
تسلمي ليّا يا أغلى حبيبه
مش هتخون
وانا من غير قلبها ورضاها
الدنيا تهون
بدعي إلهي تدومي يا زاهيه
لحد مـَ اموت
ورده وأم وأخت وناصحه
صحوة فجر يهدّ سكوت
لحن جميل فـِ القلب غناه
يعلى هواه ويعلّي الصوت





مداخلة سريعة يا أمي الحبيبة الناصحة
وأترك الواحة مهرولا لأداء صلاة الجمعة

ولكن أرجو توضيح أمر صغير

((شاعر ميّت )) .... نص وهمي غير واقعي

أشكرك أمي وأختي وأستاذتي ولي عودة بإذن الله

وأبشري بالتثبيت لما بها من نصح واعي

تقديري

أحمد .... ((ابن البحر))

[زاهية]

أوعى تقبل ياللي بيرجع بعد خيانهْ
الخاين يابني مابيحفظش الناس بدْيانهْ
الخاء خسارة تضيع عمرك
الياء بتقولك سيبك منها ومن أمثالها
بيتك عايز ست تصونك بالأمانهْ
النون بتقولك نوَّر دربك واحفظ ربك
واهدِ لبنتك ماما تعلمها الرزانهْ

ربي يتقبل صلاتك
ويستجيب لك في دعواتك
أختك
زاهية بنت البحر

[أحمد موسي]

حاضر يا امّه ووعد عليّا = أحفظ قولك جوّه عنيّا
عمري مـَ هرجع تاني لغادر = أصل انا يا امّه هوايا دَ نادر
قلبي كبير بالخير مليان = بس اكمنّه كان غلبان
حبّ بجد وضحى بروحه = وآديه عايش جوّه جروحه
يبقى ازّاي هيعود للماضي = هو الجرح خلاص شيء عادي!
يا امّه وعدتك مـَ ارجع ليها = هفرح بكره بدمع عنيها
لمّا هتيجي بشوقها ونارها = هدعي يدوب ربي يصبرها
مهما هتصعب هيّا عليّا = مش هتشوف منّي الحنيّه
أصل خلاص القلب كشفها = بسّ يريتني مكنت اعرفها
وآهو دا طبع الدنيا الاهيه = أحمد يغلط ... تنصح زاهيه

[زاهية]

لكن ياحمد دي غلبانة
مغروره بدنيا شيطانه
لازم يمسك حدِّ بإيدها
يغير أفكارها الهفتانهْ
لازم تصحى مل أوهام
الواخداها بكلام وغرام
هِيَّا أختك وأختِ الكلِّ
مادامت بنت الإسلام
مش هنسيبها للشيطانْ
يلعب بيها اشكال والوانْ
بدنا نرجعها من الضلمة
ونحميها بنورِ الإيمان
بقلم
زاهية بنت البحر

[أحمد موسي]

أمي يا ستّ الكلّ يا واعيه
إللي يبيع بيبيع على طول
وان كات هيا شطانها غلبها
فانا إيه ذنبي انا مش مسئول
أنا ضحيت بالعمر عشانها
عمر القلب فـ لحظه مـ خانها
كنت بطيّب يامه جراحها
ولا عمر فـ يوم قلبي جَرَحْها
كنت الحضن الدافي يا أمّي
فـ عزّ البردّ
كنت النسمه الزاهيه يا زاهيه
فـ عزّ الشردّ
كنت زرعت الدنيا عشانها
ورد فـ ورد
خدِّت الورد ومشيت هيّا
وفاتت شوك
واما شفتني ببكي لحالي
قالت ارجوك
انت يادوب كان يوم من عمري
مش هنساه
ذكرى جميله ونسمه رقيقه
تداوي الآه
يبقى ازّاي انا آخد بيدها ؟؟
وهيا بإيدها كسرت إيدي !!
د انا علشان كات ساكنه فـ دمّي
قطعت وريدي
هدعي يا أمّي الله يسامحها
لكن قلبي انا مش هيسامح
شاعر ميّت قلبي يا أمي
والميّت دَ ملهش ملامح

بقلم
أحمد موسى....
((عاشق البحر))

[زاهية]

خليك يامَّا شويه حنَيِّن
أوعى تسيبها للشيطان
كلِّم حَدِّ يلِمَّا بسرعة
قبل ماتغرق في الطوفان
الدنيا ياابني سَنَّه سنانها
وعايزة تلتهم الإنسان
بدينه بماله بعرضه حتى
ان كان متدين أو فلتان
الست الدنيا واخدا بالها
كويس جدا ومش بتنام
بتفكر بطريقة جديدة
تسقينا الموت الزوآم
يااحمد أكتب أوعى تأصَّرْ
خلي الناس توعى وتفكَّرْ
يربوا ولادهم عل إيمان
وماحدِّش منهم يتعثَّرْ
بقلم
زاهية بنت البحر

[الطنطاوي الحسيني]

السلام عليكم ورحمة الله وبركاته
الفاضلة اختنا زاهية
القصيدة للتثبيت استحقاقا وابداعا وتقديرا للشاعرة الفاضلة
ماشي ياعم حمادة
احرجني كتير وانا مش مشكلة عندي لو هاثبت كل القصايد
طبعا القصيدة تستاهل زي ما قلت انا استحقاقا
ولكن بعض الخفة حتى تحيا الروح والقلب
ولمداخلة اخينا احمد موسى اكتر من رائعة
رد جميل اخاذ

[أحمد موسي]

طبعا هكتب مش هتأخّر
أصل فراقها يا أمي خلاص
مش هيقدّم ولا هيأخّر
بسّ انا هدعي الله يهديها
يصلح حالها ويغفر ليها
وكمان هدعي الله يسعدها
ويريّحها وياخد بيدها
يبقى ماضيها يدوب كان خطْوه
خطِّت فيها طريق لهداها
يا امّه انا عمري مهنسى زمانها
نصّ حياتي قضيته معاها
عمري مَ هذكر عيب كان فيها
علشان كلّي عيوب قبليها
ربّنا يستر يا امّه علينا
قادر يهدينا .. ويهديها
بسّ رجوعي معاها محال
وانا مش عايز تعب البال
أمّا الدنيا فسيبِك منها
تعبي وهمّي كتير شاغلينها
عمري الجاي هعيشه بذكرى
وادعي إلهي انّ ارتاح بكره
كفايه عليّا سنيني الماضيه
جراح وألام
كفايه انا بحلم واحلم واحلم
والقى حطام
ادعي معايا يا بنت البحر
يغرق حزني فـ قلب البحر
وانسى الجرح وازرع فلّ
والقى الطرح جناين فرح

بقلم
أحمد موسى
((عاشق البحر))

[محمد عبد القادر]

أشكرك يا صاحيى
على انك نبهتنى للجمال و الروح الجميلة اللى أنا شفتها هنا دى
و الله سعيد جدا بالشاعرة الجميلة ( زاهية )
و بموهبتك الجميلة يا أحمد
أنت شاعر ليك مستقبل باهر بإذن الله
ربنا يبارك فيك و يبارك فى أمنا ( زاهية بنت البحر )
تحياتى لكما
و
إلى لقاء

[مازن لبابيدي]

أختي زاهية
ما أجمل هذا الحوار الشعري الرقيق ، بين أم وولدها ، والذي ينم عن نظرة خبيرة في الحياة ، ويدعو للتعفف ومكارم الأخلاق .
فعلاً قرأت هذا الصباح صفحة ممتعة بحق ، تستحق التقدير .
شكراً لك أختي والشكر لشاعرنا فتى الأفراح أحمد موسى على مشاركاته الجميلة كذلك .

[زاهية]

السلام عليكم ورحمة الله وبركاته
الفاضلة اختنا زاهية
القصيدة للتثبيت استحقاقا وابداعا وتقديرا للشاعرة الفاضلة
ماشي ياعم حمادة
احرجني كتير وانا مش مشكلة عندي لو هاثبت كل القصايد
طبعا القصيدة تستاهل زي ما قلت انا استحقاقا
ولكن بعض الخفة حتى تحيا الروح والقلب
ولمداخلة اخينا احمد موسى اكتر من رائعة
رد جميل اخاذ


الطنطاوي الحسيني أخي المكرم
أشكرك على الحضور والتثبيت
ثبتك الله بالقول الثابت
أختك
زاهية بنت البحر

[الطنطاوي الحسيني]

الله عل الفن اما بينضح
فكر وحب جناين تطرح
وتخلي ليالينا تنور
وتخلي احزانا تروح
مبدعنا احمد قال قوله
ردت امه الغالية د زاهية
و واتناقشت وياه بسلاسة
ف الاقناع دِ واعية و (داـــية)
و اتمتعنا بفكرة جديدة
اللي يشوف النور ليه يبخل
لازم يخلق دنيا سعيدة
لو همة الواحد فينا
تتحرك صدق واخلاص
راح ننشر اخلاقنا الغالية
راح نزرع للحق اساس
والتحرير خطوة ورا خطوة
قبل الحر م يوم ينداس
والشكر الموصول لخالقنا
ان يهديك تهديلو الناس

احببت ان اشارك هذا العطاء الجميل والبيان الثر للاخت الفاضلة زاهية والحبيب المبدع احمد موسى
والدعوة بعد اذن اختنا زاهية مفتوحة للجميع ان شاء الله
تقديري للابداع والرقي الفكري والجمال الروحي
طنطاوي

[أحمد موسي]

لما شافتها حروفَك .. عيني
قالت مين ؟؟ ... "طنطاوي حسيني" !!
مش معقول يا اسيادنا بجد
أكتب شعر ويعجب حد
أحمِد ربّنا إنه هداني
وانّي معاكوا اشتدّ بياني
أمّا حكايتي حكايه وماتت
وامّا النار فـِ القلب اتقادت
جاتلي حبيبة قلبي الغاليه
"زاهيه" إلهي يريّح بالها
طفِّت نار القلب فـْ ثانيه
قامت ضحكت ليّا الدنيا
نصحت يامه لإنّها أمي
شايله جراحي وزُلّي وهمّي
قُمت قبلت كلامها بشوق
مَهي غلبتني برقّه وذوق
قالت ((يا بني)) قُمت بكيت
ودعيت ربّي وقلت يا ريت
تفضل ليّا لحد مـ اموت
أُمِ وأخت وقوة صوت
وانا مستني تعود بنصايح
واجني عبير الورد الفايح
أما يصحبي فبشكر ليك
حلو الردّ الفُلّ الشيك
بس صراحه زعلت فـ قولك
"قبل الحُرّ م يوم ينداس"
أصل الحُرّ هيفضل دايما
غالي وعالي وفوق الناس


بقلم /
أحمد موسى
((عاشق البحر))

[زاهية]

قبلِ الفجر بنبضةْ قلبْ
كنتِ بقول في السِّر ياربْ
احفظْ بلدي وصُنْ أولادي
واملي قلوبنا بنور الحب
كنت بقول إهدي شُبَّانا
ووحدْ أمتنا وأوطانا
وماتقوي علينا أعداءنا
وانصرنا بجندكْ ياربْ
كنتِ بقولْ ودموع عنيَّا
عاخدودي بالإيمانْ جاريةْ
اعطي لأيامنا الحنيَّةْ
ترافقنا فــِ الزمن الصعبْ
الزمنِ الصعبِ الــْ فيهِ المحنةْ
بتقرَّب للنارْ، والجنةْ
الشاطر هوا الــ يمسكْ دِيْنَهْ
بصدق حقيقي مش بالكدْبْ


قبلِ الفجرِ بنبضةْ قلبْ
كنتِ بقولْ في السِّرِ ياربْ
احفظْ بلدي، وصُن أولادي
واملي قلوبنا بنورِ الحبْ
شعر
زاهية بنت البحر
غنوها دي حلوه

[أحمد موسي]

وقت الفجر .. الدنيا سكوت
قُمت دعيت وبعلو الصوت
قُلت يا رب .. اصلح لي الحال
ريّح قلبي من الترحال
رجّع لينا يا رب ضميرنا
قوّي إيمانّا وثبّت دينّا
فجأه لقيت السما بتنوّر
قلت بشوق سبحان ميْن صوّر
فدعيت قلت يا ربّ اهديني
ريّح بالي .. وقوّي يقيني
طيّب قلبي من الأوجاع
واغفر للي خدعني وباع
راجع ببكي يا ربّ إليك
عبدك تايب خاضع ليك
بحفظ واقرا كتير فـ كتابك
واطلب عفوك واخشى عذابك
إحفظ ليّا أهالي الواحه
أحلى زهور فـ الكون فوّاحه
إيد فـ الإيد هنزيل المحنه
أصلنا عربي .. والعرب احنا
فاغفر لينا يا ربّ ذنوبنا
وارضى علينا كتير وسامحنا

بقلم /
أحمد موسى
((عاشق البحر))

[لمياء سليمان]

الله واكبر
والعزة لله
والحمدلله عليكم يا لها من ثلاثية رائعة
معكم وهنا بالذات يحلو رشف القهوة
لا اسمع اغاني ولا اظنني جديرة بلحن ما رددتموه هنا
كل ما احسست به مع زاهية الدنيا بخير
ومع الطنطاوي الريح بتروح لستريح
ومع احمد الحياة بتحلى
الله يسلم الايادي

[الطنطاوي الحسيني]

الشاطر هوا الــ يمسكْ دِيْنَهْ
بصدق حقيقي مش بالكدْبْ
قالت زاهية قبل الفجر
وربي قريب مش عايز هجر
سحَر الكون دايما ف سكون
والدعوة من ليلة قدر
ينزل سبحانه بجلاله
لسمانا الدنيا يدعينا
مين صاحي ودا ياهنياله
يجري دموع يتقرب لينا
ابدا منخيبش ظنونه
نقبل كل الراجع لينا
والله دي قصيدة جميلة
غنيوة لقلوبنا عليلة
والهمة والحيلة قليلة
د كلامك راح يعدل شيلة
والاحمد دا اخونا البر
شرب اللحن عشان يسكر
بحنانه احنا عتادنا
ان ايديه معجونة ف شعر
مين رابع يشجينا غناه
راح نفرح ونقول الله
الفن الصادق د علاج
مخمخ ف النغاشيش محلاه
مين رابع يشجينا غناه
راح نفرح ونقول الله
صحبة ع الخير بتمتع
قسم العامي ومين يهواه
اختي الحبيب زاهية الخير قصيدتك قبل الفجر السابقة رائعة والواضح اننا سننتج بعض القصايد الجميلة في هذه المشاركات الجميلة الطيبة
اخي احمد احب حرفك ولكن قصيدتك الفائته ختامها امممممممممم عايزين غيرها

[أحمد موسي]

لو تسمحولي أنا هتوقف عن الارتجال الفترة دي
لسبب خارج عن إرادتي لإني لو كتبت
بأمانه هتكون النظرة تشاؤمية وحزينه جدا

فاعذروني ... وأسيب مكان لغيري

تقديري

[الطنطاوي الحسيني]

لو تسمحولي أنا هتوقف عن الارتجال الفترة دي
لسبب خارج عن إرادتي لإني لو كتبت
بأمانه هتكون النظرة تشاؤمية وحزينه جدا
فاعذروني ... وأسيب مكان لغيري
تقديري
فرج الله قلبك ايها الحبيب
وسترنا الله واياك دنيا واخرى
ننتظرك و همتك

[ابراهيم محمود الخضور]

أنا مبسوط كتير بجد

لما قريت إلي كتبتوه


وعاوز فعلا للحوارات

تمشي تملي مع اللي حكوه

[هانيال محمد]

وانا مبسوطه كتير وياكوا
نفسي أشارك بردو معاكوا
بس انا خايفه لإني جديده
معرفش اكتب جمله مفيده
أستاذه "زاهيه" الله يحميها
ويبارك فيها ويراعيها
"والطنطاوي" د عمّ الشيخ
"واحمد موسى"
شاعر جامعة كفر الشيخ
وانا غلبانه
جايّه أشارك
بس حروفي كتير تعبانه
لو هتوافقوا
ممكن افكّر ..أرجع تاني
وابقى معاكم ضيفه جديده
تقرا وتسكت ... تبقى سعيده


آسفه للمداخله يا جماعه بعد اذنكم
بس أنا شوفت الموضوع دا فعجبني جدا
فقلت أشارك بقى معاكم وابقى ضيفه تقيله
ونتعرف على الأستاذه "زاهيه" والأستاذ "طنطاوي"
أما الأخ "أحمد" فدا أستاذي و منّور الجامعه
بس بمواضيع غير اللي رافعها هنا ومواضيع بجد حلوه
معرفش ليه مداريها عن حبايبه هنا


مع السلامه

هانيال محمد

[أحمد موسي]

السلام عليكم ورحمة الله وبركاته

أضحكتني والله في وقت عزّ فيه الضحك
أختي الفاضلة " هانيال"

أراه نفس الأسلوب ونفس الطريقة

كل عام وأنتِ بخير " رمضان مبارك"

أشكرك للحضور هنا بعد إذن أمنا الفاضلة" زاهيه"

تقديري

[الطنطاوي الحسيني]

السلام عليكم ورحمة الله وبركاته
والله مداخلة جميلة ومش مكسور الا القليل جدا
الفاضلة هانيال محمد ما شاء الله عليك
اذن حلوة وموسيقية ليه متحاوليش كتير وانت تبقي شاعرة طيبة وجيدة
كل عام انت بكل خير ورحمة وبركة
رمضان كريم

[أحمد موسي]

لكم أفتقدكِ يا أمي
أ أعود للواحة ولا أجدك ؟؟
اللهم طمئني على زاهية

[زاهية]

ماما زاهية بخير ياأحمد والحمد لله
تمنياتي لك بالسعادة

[خليل حلاوجي]

مهمـا هتصعـب هيّـا عليّـا

مش هتشـوف منّـي الحنيّـه

أصل خـلاص القلـب كشفهـا

بسّ يريتنـي مكنـت اعرفهـا



وجدت الجمال ... هنا

[أحمد موسي]

عادت فعاد الفرح يحضن ريشتي=والسِّحر عانق من جديد قصيدي
واللحن غرَّد والحروف تزركشت=ماسا على وتر الهوى بنشيدي
أمي وقربك غايتي وحمايتي=وهواكِ يسري دائما بوريدي
وإذا بعدتِ فإنني مِلكُ الضيا=عَ وكلَّ يومٍ ألتقي بوعيدي
يا تاج رأسي أنتِ ينبوع الهنا=وأنا جواركِ أزدهي كورودِ


لا حرمني الله من وجودك يا أمي
قادم على امتحانت الجامعة فاذكري ابنك بالدعاء
عسى يتقبل الله منك

عدتِ والعود أحمد يا أم أحمد
ابنك .. أخوكِ

[ربيحة الرفاعي]

برغم اقتحام اللهجة السورية المحببة لبعض الأبيات هنا
فقد كانت القصيدة وما تبع من سجال جمال ونصحا وأمومة

دمت بألق غاليتي

[زاهية]

مهمـا هتصعـب هيّـا عليّـا

مش هتشـوف منّـي الحنيّـه

أصل خـلاص القلـب كشفهـا

بسّ يريتنـي مكنـت اعرفهـا



وجدت الجمال ... هنا


شكرا لك أخي المكرم خليل
سقى الله خيرا مامضى من زمن
أختك
زاهية بنت البحر

[ناديه محمد الجابي]

ما أجمل سهرتي معكما عزبزتي زاهية أنت والإبن / أحمد موسى
حوار شعري رائع بينكما ـ عذوبة إحساس ومشاعر راقية
تدعو إلى مكارم الأخلاق في قصائد محلقة بتصويرها ونسجها
وزادت جمالا بمداخلات شاعرنا الطنطاوي الحسيني
رحمة الله وغفرله وأدخله فسيح جناته
وبارك لنا فيك وفي شعرك الرائع
ودمت بروعتك دائما.
:v1::nj::0014:

[أسيل أحمد]

حوار شعري جميل عزيزتي زاهية بينك وبين الشاعر أحمد موسى
جعلنا نستمتع بهذا الإبداع المشترك الراقي فكرا وأدبا ، وزاده الشاعر الطنطاوي الحسيني روعة وجمالا رحمة الله عليه.
دمت بكل خير.