من غير لسان ولالغلوغ

[زاهية]

أبوس إيدك


أبوس رجلك هوي الحبل على رجلي و لو حبة


و أخرتها معاك يا با


عشا ن خاطري أبوس إيدك


و ليه يا با مكلبشني و بيني و بين ولاد اخويا


مفيش بينا الا بوابة


سامع صوتهم و مش قادر بقى اتحمل


مكتفني و البوابة مفاتيحها معاك يا با


سامع صوتهم و أنا إيدي على خدي


بتنهشهم قرود خنازير كلاب سعرانة و ديابة


و طول الليل سامع صوتهم و متسلسل


و آآآآآآآه يا با ....


ما فيش بينا الا بوابة


و فات كام يوم و سايبنهم ف عز الرعب


وحديهم في قلب الضلمة في الغابة


لا عاد فيه سقف يداريهم من ولاد الكلب


و برق و رعد طول الليل مهانة و ذل و كآبة


و لما الصبح بينور ألاقي كومة م الأشلاء


و نوافير دم تتفجر من لحم يتامى و غلابة


عشان خاطري أبوس إيدك أبوس رجلك


ماعدتش قادر اتحمل خلاص يا با


ولاد أخويا مفيش بينا الا بوابة


سامع صوتهم و حاطط إيدي على خدي


بأدندن و ابكي أطفالنا بمزمار حزن و ربابة


و الاقي صوت ولاد الكلب بيشوش على صوتي


قرود خنازير ولاد خنازير كلاب سعرانة و ديابة


بتدندن و ترقص غصب بالجزمة و فوق راسنا


بصوت طيارة أو مدفع و دبابة
نزف: محمد سنجر
:nj:
:001:
رد: زاهية بنت البجر


لما ياابني تشوفني مانعك
من مساعدة ولاد عمك
خليك حمش كده زي جدك
وجد أبوك، وجدود اللي خلفوك
وطوالي قووم وناولني بالجزمة
واتبرى مني لأني خنت الأمانة لما خنت الأمة
لازم ياابني تفهم إني أنا مش بني آدم
أنا وحش باكل الجيف
وبشرب دم الضحايا
وبمشي على أربعة،
أنا ياابني مش يمامة سلامْ
ولاحتى لي هديل زي الحمام ْ
أنا صوتي زمور خطر
وعشان تفهم أكترْ،وانت لسه زغير
لازم تعرف إنو أبوك مالوهش بالسياسةْ
ولا حتى بالكياسةْ
وعملها بقى كده أونطة زعامةْ
عشان الناس العامة
تبقى ساكتة ومتحاولش تزعج أسيادنا
ياابني القصة واضحة زي الشمس
ومش عايزة كلام
بكره لما تكبر
وتطول رقبتك لتحت ياحبيبي
هيصبح عندك بعد نظر ْ
ولسانك الطويل ده هيقصر
وان ماقبلتش ياواد تقصرو
هيجي مين يقصه من لغلوغه
وتعيش بقية حياتك من غير لسان ولالغلوغ
معليش ياابني أنا مش عايز لغلوغي يتقص
وزي ماهم عايزين هيكون ونص
قوم دلوقت ياابن بهية
شوف نانسي وهيفا واللي هيَّا
وبعدين ياحبيبي طوالي على السرير
وبكده ياضناي هتفضل زي أبوك خادم الأمير المطيع
ولكل أوامره سمِّييع
ودقي يامزيكا
شعر
زاهية بنت البحر

[الطنطاوي الحسيني]

السلام عليكم ورحمة الله وبركاته
على فكرة القصيدة الاولى خطيرة وجميلة جدا
لولا ان القصيدة كلها ماشية على بحر الكامل متفاعلن متفاعلن متفاعلن مع تسكين احيانا والتحريك احيانا
اما في البداية فاضطربت الموسيقى
ولكنها رائعة على كل حال
اما الرد ايتها الفاضلة زاهية من حيث الانطلاق والانفعال والتركيز والاغراق في العامية المصرية عالي جدا
اما الموسيقى مش هقولك ايتها المبدعة كنت اتمنى انك تركزي موسيقاها شوية وكنا ثبتنا هاتين البهيتين حتى نأخذ عليها
اراء الشعراء الاحباب
تحياتي اختي زاهية والحمد لله اننا بدأنا نجدك باستمرار
تقديري للابداع ولكما

[أحمد موسي]

جَيّ الأوّل برمي سلامي
وامسك قلمي واقول فـ كلامي
أصل القصّه فـ سطر ونُصّ
ولا فيهْ إخرص ولا فيهْ هُسّ
دَقّوا العضم صَبَح دغاديغ
قطعوا اللّسُن واللغاليغ
يبقى لا عمّ ولا عيال عمّ
يبقى أسف ومراره وهمّ
ولا في لزوم حتّى لبوابه
ولا عدت اصرخ ولا اقول يابا
هكْتِم جوّه القلب الآه
ولا عدت اسمع تاني غناه
واستأذن منكم يا سيادنا
وارمي عليكو سلام الله

سلام عليكم


بقلم /
أحمد موسى
((عاشق البحر))

[ناديه محمد الجابي]

القصيدة الأولى : رائعة
معان عميقة ونص متقن وإحساس مفعم بالصدق.
ورد زاهية: شعر جميل من العيار الثقيل
قوية في حرفك وشاعرية في إحساسك
عواطف إنسانية تتدفق مع حرف معبر ورقيق.
بورك القلم والمداد.
:vio::0014::0014: