بعد العمر

[الشرقاوى المصرى]

بعد العمر
بعد العمـر ما عـدى وراح .. بعد الجـرح ما طاب وارتاح
بعد ما جف الدمع فى عينى .. راجعة تقولى لقلبـى سماح
قلبى خلاص مبقاش يهواكى .. وفرى من ع الخـد بكاكـى
انا مش هقدر انسى الامى .. ولا يوم هنسى عذابى معاكى
انتى بقيتـى مجــرد مــاضى .. بعـدك عندى اصبح عــادى
وانا دلوقــت بقلبى الفاضى .. هقدر اهـرب من دنيــاكــى
...........................
فاكـرة زمان لما انتى مشيتى .. يوم ما سألتك ع الأسباب
اترجيتك يومهــا تقولى .. ليــه عايزانى أعيش فى عذاب
قولتى انسانى وأنسى زمـانى .. أنــا دلوقت لواحــد تانى
والأحــلام اللــى رسمنـــاها .. صفحة اتقلبت جــوة كتاب
.....................
يومها عـرفت انك انســانة .. قلبهــا معــدوم م الأحساس
علشان وهم وحب مزيف .. قـادرة تضحى بأغلى النــاس
غدرك عمره ما تاه عن بالى .. وأحلف ليكى بحبى الغالى
زى مـا دقــت المر ليــالى .. لازم تشـربى نفــس الكـــاس
......................
انتى حكايـة فى عمــرى وعــدت .. قلبى اتعلــم منها كتير
كنت معاكى بكل مشاعرى .. وانتى مفيش جواكى ضميــر
ياما سامحت وكنتى بتقسى .. ياما زرعتــى بايدك يأســى
لكن بعد ما فوقت لنفسـى .. قلبى ارتـــاح من هــم كبيـــر
............................
..................
.........

[هشام عزاس]

الجميل / الشرقاوي المصري

نص جميل و عذب لكنه ينتمي إلى أدب العامية و هناك ستجد من يتفاعل معه من شعراء العامية الأفاضل و كذلك ستجد التقويم و التوجيه المناسبين بحول الله .

مرحبا بك أخي الكريم و سأنقل النص إلى حيث ينتمي ...

إكليل من الزهر يغلف قلبك
هشـام

[أحمد موسي]

فاكـره زمان لما انتى مشيتى=يوم ما سألتك ع الأسباب
إترجيتك يومهــا تقولى=ليــه عايزانى أعيش فى عذاب
قولتى انساني وانسى زمـاني=أنــا دلوقت لواحــد تاني
والأحــلام اللــى رسمنـــاها=صفحه اتقلبت جــوه كتاب

انت طبعا عارف رأيي
بس ياريت تخلي بالك من همزات الوصل والقطع
والألف الليّنه " المقصورة " والياء ..

انت شاعر ملوش حلّ يا شرقاوي
أتمنالك كل الخير يا صحبي
تقديري

[الطنطاوي الحسيني]

السلام عليكم ورحمة الله وبركاته
صراحة ايها الشرقاوي احترت معاك
ياللا للتثبيت بعدين نتكلم
بس بص لأمتنا شوية ياعم

[الشرقاوى المصرى]

الاستاذ الجميل / هشام عزاس
اذا كانت كلماتى قد نقلت بطريقة الخطأ فى ملتقى النثر
فرب ضارة نافعة
لأن هذا الخطأ هو السبب فى ان ترى كلماتى رأيك الجميل الذى أسعدنى كثيرا
واتمنى منك ان تمدنى دائما بأرائك
وأشكر لك كثيرا اهتمامك فى نقل النص لموقعه الصحيح
تقبل احترامى الشديد

[الشرقاوى المصرى]

حبيب قلبى الموهوب الجميل / احمد موسى
ازاى بتسألنى أذا كنت عارف رأيك ولا لا
هو انا ينفع اصلا انسى رأيك
ده رأيك هو اللى بيضفى النور على كلامى
وفى المرات القادمة ان شاء الله هخلى بالى من الاخطاء النحوية
مشكور على المرور يا صديقى الغالى
ولك كل تحياتى

[الشرقاوى المصرى]

الشاعر الجميل الأستاذ / الطنطاوى الحسينى
والله انا اللى احترت فى ذوقك العالى ومرورك دايما اللى على قلبى غالى
انا اخدت بنصيحتك ونقلت النص كموضوع مستقل
وبشكرك على اهتمامك للتثبيت
وان شاء الله طول ما الأمة فيها رجال زيك
بيحاربوا بأقلامهم قبل كلامهم
وبقلوبهم وانتمائهم رغم ألامهم
اكيد حال الأمة هيجى يوم وينصلح
أضع قلبى مع قلبك ويدى مع يدك
تقبل خالص تقديرى لشخصك الحبيب

[الطنطاوي الحسيني]

الشاعر الجميل الأستاذ / الطنطاوى الحسينى
والله انا اللى احترت فى ذوقك العالى ومرورك دايما اللى على قلبى غالى
انا اخدت بنصيحتك ونقلت النص كموضوع مستقل
وبشكرك على اهتمامك للتثبيت
وان شاء الله طول ما الأمة فيها رجال زيك
بيحاربوا بأقلامهم قبل كلامهم
وبقلوبهم وانتمائهم رغم ألامهم
اكيد حال الأمة هيجى يوم وينصلح
أضع قلبى مع قلبك ويدى مع يدك
تقبل خالص تقديرى لشخصك الحبيب
السلام عليكم ورحمة الله وبركاته
أخي الشرقاوي ايا كان اسمك
اخجلت تواضع نفس تحبك
عدت لسامق أدبك وجميل خلقك وسمو ذوقك
ونسأل الله أن نكون عند حسن الظن اللهم أمين
تقديري اخي وحبي وانما نحن مرآة صافية تعكس ابدعاتكم
تحياتي ودم بقلب اخيك

[محاسن بيومي]

نص جميل جدا وأحييك على قدرتك كتابة رومانسية في هذا التوقيت والعصر الصعب حياتيا وسياسيا فهذا في حد ذاته إبداع ومشقة أحييك على تحملها فأنت فعلا مبدع عدت بنا إلى طعم المشاعر الجميل الذي افتقدناه