شـوف يا راجل ......!

[رشا عبد الرازق]

انت ايه او هو ايه؟
كل واحد فيكو راجل
كل واحد فيكو اسمه
أي اسم
بردو راجل
في البطاقه خانه فاضيه
أيوه فاضيه
اتملت بالكلمه عافيه
مش دليل الكلمه يعني
انك انت تملا عيني
اني أسلملك سنيني
واحلف اني عايشه فعلا
حد قدي ؟
في ضل راجل...!

شوف هيتنرفز عليه
طيب افهم
واعقل انت
وانت فسرلي القضيه
لما أسهل حاجه عندك
تبقى ديما هيه جرحي
لما تستخسر في قلبي
كلمه حلوه
بيها تتشكل ملامحي
بيها أوهبلك حياتي
تبقى كل شيء في عمري
اللي عدا واللي فاضل
واللا فاكر الكلام دا عيب تقوله
وانت راجل ...!

طب بلاش دي
لما تلعب بالمشاعر
مره بالغنوه الجريئه
ومره تعمل فيها شاعر
وأما أصدق
وانت تبقى في عيني أصدق
نبتدي المشوار وأشوفه
بين ايديه خلاص هيكمل
وتدي كل اللي بنيته
لواحده تانيه
طب وانا والحلم لأخضر؟
كل ده هيروح ف ثانيه...؟؟!
تبتسم وتقولي شوفي
انت قلبك كان مناضل
بس قلبي حب غيرك
يبقى حقي
وانتي بكره يجيكي راجل.......!

واما تعمل فيها انك
شهريار فارس زمانك
واحده ع الشات بتقابلها
وواحده ع المحمول
وواحده
أخت صاحب من جيرانك
وانت فرحان بالرجوله
والاسامي لما تكتر
هيه دي تبقى البطوله
لأ واختك تبقى عبده
وامك المسكينه تتعب
من زعيقك والمناهده
وأما حد ييجي جمبك
اللسان يطول وتعلن
ان جوه البيت ده راجل..!

شوف يا راجل
قبل ما تبرق وتحلف
اني مجنونه بجانبك
واني مش طايقاك حقيقي
بس ديما محتجالك
لأأّ مش محتاجه بدله
وكرافته
وصوت جهوري يجيب زغطه
قلتلك يا سيدنا افهم
أصلي مش هقدر اجامل
محتاجالك لما تبقى
في الكلام والفعل راجل
مستحيل هفضل لوحدي
مستحيل مقبلش انك تبقى أخويه
اللي يستر هو ضهري
اللي ياخد هو يدي
مستحيل مقبلش انك
تبقى لما القاك حبيبي
تبقى ضلاية لهيبي
وأبقى حوا
واللي مبتنكرش عنك
انها كات حته منك
بس لما كنت راجل

[الهـ عبدالله سيف ـدب]

ثورة جارفة

و حمم بركانية محرقة

و هب لاطبع علة فئة معينة مستهترة بالمشاعر و الأحاسيس

أيوه راجل بالفعايل

سدِّ شامخ

نار بتحرق كلِّ باغي

موج و عالي يا حياتي

يشهد التاريخ إنِّي

ركن شامخ في الهوايل

بسِّ بين إيدك حياتي

تبتدي و فيها مماتي

بين أقدامك نجاتي

أيوه إنتي و ليه أجامل

إنتي أمي و حضن دافي

إنتي أختي و شهد صافي

إنتي عمَّه و إنتي خاله

إنتي زوجة و ركن شايل

أيوه إنتي و ليه أجامل

تمسحي دمعي و همِّي

في الشدايد واقفه جنبي

مش يقولوا الناس يا عمري

خلف راجل يا هنايا

بنت راجل في المحافل

تشدِّ أزره و تمحي همّو

تطفي ناره و زيِّ أمه

إنتي نصِّ الدنيا ديَّه

----

أختي رشا

مجرد محاولة لمجارات قلمك الرائع و سامحي تطفلِّي

تحياتي القلبية

أخوك

[بثينة محمود]

شوفى يا ستى ..!!

اراك امسكت بمكبر صوت وجاهرت بما لا تستطيع حواء منذ عصور الجهر به
دعينى اشد على يدك
واقدم لك خالص شكرى على هذه الكلمات القوية

[جارة القمر]

ايوه كده يا رشا
فهميهم ان الرجولة مش بس اسم


مش عشان عندك شنب
تبقى راجل والسلام
الرجولة تبقى موقف
مش كلام والسلام



شكرا يا رشا بارك الله فيك

[محمد محمد سعيد]

السلام عليكم ورحمة الله وبركاته
الاخت رشا
برغم ان كان صوتك عالى اوى وانتى نازله شخط فى الراجل الا اننى استشعرت دموع خفيه فى هذه الكلمات
باحثه عن صوة مثاليه تريدين الوصول اليها فى هذا النصف العجيب اوكد لك انها موجوده بالفعل وان قلّت نسبيا
عارفه كان هيبقى اجمل لو رسمتى صوره مثاليه للنصف الاخر التى تنتمى اليه واللى انا متاكد منه ان تقصيرها فى تربية النصف التانى هو اللى وصله لكده لان المراه هى البانيه الحقيقيه للاسره
اشكرك على كلماتك الجميله التى اجبرتنى على المشاركه

[رشا عبد الرازق]

بداية

للجميع اعتذاري الشديد عن تاخري في الرد على هذا الموضوع

كل عام أنتم بخير





ثورة جارفة

و حمم بركانية محرقة

و هب لاطبع علة فئة معينة مستهترة بالمشاعر و الأحاسيس

أيوه راجل بالفعايل

سدِّ شامخ

نار بتحرق كلِّ باغي

موج و عالي يا حياتي

يشهد التاريخ إنِّي

ركن شامخ في الهوايل

بسِّ بين إيدك حياتي

تبتدي و فيها مماتي

بين أقدامك نجاتي

أيوه إنتي و ليه أجامل

إنتي أمي و حضن دافي

إنتي أختي و شهد صافي

إنتي عمَّه و إنتي خاله

إنتي زوجة و ركن شايل

أيوه إنتي و ليه أجامل

تمسحي دمعي و همِّي

في الشدايد واقفه جنبي

مش يقولوا الناس يا عمري

خلف راجل يا هنايا

بنت راجل في المحافل

تشدِّ أزره و تمحي همّو

تطفي ناره و زيِّ أمه

إنتي نصِّ الدنيا ديَّه

----

أختي رشا

مجرد محاولة لمجارات قلمك الرائع و سامحي تطفلِّي

تحياتي القلبية

أخوك


اخي المتميز

عن اي تطفل تتحدث بل ما ارقها من كلمات

بدأتنا بدون حرب - وقد حظيت هذه القصيدة بحرب طويلة في موضع آخر - فكيف نرد عليك بغير الهدنة المحملة بكامل امتناني

أخي الفاضل

اطلالة ولا أروع في عملي المتواضع

لك مني خالص تقديري وامتناني

ولا تحرمنا

[رشا عبد الرازق]

شوفى يا ستى ..!!

اراك امسكت بمكبر صوت وجاهرت بما لا تستطيع حواء منذ عصور الجهر به
دعينى اشد على يدك
واقدم لك خالص شكرى على هذه الكلمات القوية


سنبلة

شكرا لتاييدك وهذا ما نرجوه من بنات حواء الرائعات

ما رأيك أليس في وجودنا قدر نحبه يا عزيزتي ؟

تحياتي لمرورك الكريم

دمت برقتك

[رشا عبد الرازق]

ايوه كده يا رشا
فهميهم ان الرجولة مش بس اسم


مش عشان عندك شنب
تبقى راجل والسلام
الرجولة تبقى موقف
مش كلام والسلام



شكرا يا رشا بارك الله فيك


أيوه صح
( الرجولة مش شنب )
او زعيق عند الطلب
الرجولة يعني تدي قبل ما تعرف سبب
الرجولة يعني قوة
تيجي والاحساس وَجَبْ ....!!


جارة القمر يسعدني في كل ميدان أن التقيك

ممتنة لهذا الحضور

[د.جمال مرسي]

رشا عبد الرازق ...

احم احم

انا ساكت أهو

و ان كنت ناسية اللي جرى

هاتي الدفاتر تتقرا

بس لو ما كناش صايمين

نهارك جميل ايتها الأخت الكريمة

تقبلي خالص الود

د. جمال

[رشا عبد الرازق]

رشا عبد الرازق ...

احم احم

انا ساكت أهو

و ان كنت ناسية اللي جرى

هاتي الدفاتر تتقرا

بس لو ما كناش صايمين

نهارك جميل ايتها الأخت الكريمة

تقبلي خالص الود

د. جمال


لا سياتك نسيت

فكرني كده ؟

وان كان ع الدفاتر بلاش اتكلم يعني انت عارف مين وقتها اللي غلب

ولو عايز جولة تانيه احنا في الصيام هناخد ثواب عشان الحرب حلال فيكم


منور دكتور جمال وصباحك نادي باذن الله

تقبل ودا يليق بود

[د.جمال مرسي]

أما و قد نكشتيني يا رشا
فخذي عندك ايتها الشاعرة المبدعة


شوفي يا ست
ليه نعجن في عجين و نلت
و نقول بس كلام مش قده
و بنرسم على بعض التت
شوفي يا ست
شوفي يا حوّا
لولا الراجل كنتي هتبقي يا شاطره ازاي ؟
مين هيقولك كلمة جميلة
و يشيل همك رايح جاي
مين يعزف لك ألحان قلبه زي الناي ؟
من غير راجل فين العيلة ؟

***
مين لو يوم غمضتي عنيكي
و طب حرامي ، واحد عاطل .
و الخوف يزحف جوه عروقك
و الخوف قاتل
مين يحميكي ؟
مين بالروح و الدم يا حوا راح يفديكي ؟
لو قولتيله اصحى يا راجل .

***

مين بيشيل مصاريف البيت
و بيحرم نفسه من القوت
علشان زوجته و ام عياله
ويا عياله ..
يتهنوا لو حتى يموت

***

مين من طلعة شمس بيطلع
و لنص الليل لما بيرجع
علشان يعمل عيشه كريمه للأولاد
يمكن يقعد يومه بحاله من غير زاد
يفضل يكدح
يمكن يفقد ضي عنيه
علشان يرجع آخر يومه بخمسه جنيه
عارفه دا ليه

و لا أقول من غيظي يا حوا؟
علشان حوا الحلوه حكايه
عاوزه فلوس للكوافيريايه
و المكياج في العلبه الحمرا
و كريم بينعم في البشره
و ملابس تنفع للسهره
و المجد تحقق و الشهره
هي الست و هو البيه

عارفه دا ليه ؟
و لا أقول من غيظي يا حوا
بس كفايه يا حوا عليكي
أحسن دمعك يملا عنيكي
و الكتاكيت اللي تلميهم من حواليكي
عاملين شله على الرجاله
راح يسيبوكي
و انت تخوضي الحرب لوحدك
من غير حد ياخد بأديكي


أختي العزيزة رشا
أتذكر هذه الحرب في غير ذي موضع
و كان المشاكسون المشاركون كثيرين .
فهل يتواجدون هنا كي نبدأها من جديد
رغم أني آليت السكوت
لكن أنت اللي عاوزة كده
( و على نفسها جنت براقش )
يللا يا د. سمير
يلا يا ابن بيسان و يا ناصر
يلا يا محمد سعيد و يا علي درويش
يلا يا هدب

أكيد رشا ذهبت لتجمع شاعرات الواحة
فهيا إلى النزال


تحياتي إلى الجميع

[محمد محمد سعيد]

السلام عليكم ورحمة الله وبركاته
الشاعره المتالقه رشا
الحرب فينا حلال................ طيب
ولا يهمك يا د.جمال
احسنت وابدعت الرد ولا يهمك يا جميل ايه يعنى حتى لو جابت كل شاعرات المنتدى
وراك رجاله
واحنا بقى قدهم وقدود
والان اسمحولى ان ان ارد

ايوه راجل


ايوه يا ما يا حبيبتى
منتى شكلتى ملامحى من زمان
لما كان العمر بذره
اه يا بحر من الحنان
كنت حاسس بين ايديكى
انى وانتى ظغننين
كنت بشعر بالامان
تحدفينى هُبّه فوق
القى قلبك
نصه لهفه ونصه شوق
اندفن جوه في حضنك
وانتى مستنيه اضحك وابتسم
لجل كل طريق في عمرك يترسم
كنت اشوفنى ف ننى عينك
القى نفسى بقيت كبير
كنتى ديما بتقوليلى انت راجل
***
وانتى ياختى يا حبيبتى
لسه مش حاسه بوجودى ؟
غير ف شخطه اوهزار؟
لما اخاف م النسمه لو عدّت حدودك
لما اشوف الورد فتّح فوق خدودك
لما اشوف البدر نوّر من وجودك
ياحبيبة قلبى من خوفى عليكى
برضه مش عايزانى اغار؟
طب قوليلى يا حبيبتى
طب قوليلى ازاى بكيتى
وانتى مستنيه غبتى
انى ارجع وتقوليلى
ان نور الصبح ما طلعشى ف غيابك
ان غربة روحى رجعت من جوابك
لما شوفته قولت اخويا
لما بقرا السطر قولتلهم هترجع
طرت م الفرحه اللى طلت
من عيون امى وابويا
روحت قايله اخويا راجل
***
وانتى يا حُبّى ومنايا
ياللى ف عينيكى بلاقى
عز فرحى او بكايا
لسه بردو بتشوفينى
كدب ما يعرف نهايه
لاء يا ظالمه
اصل انا وانتى حكايه
عمرها من عمر ادم
لما رب الكون لقاه
كل حزن الحزن ف سكوته وبكاه
رغم انه كان ياغاليه
ف النعيم ومنتهاه
جيتى لجل يكون وجودك من وجوده
لجل يسعد بس اه
كنتى اجمل نكبه ف مصيره الجديد
سايب الجنه وهايرحل
من سعادته وفرحه بيكى
احتمال رحلة عذابه
صار ف لحظه شىء اكيد
لسه فاكره او نسيتى مش مهم
بس فيه عندى الاهم
ان فرحك مش هيكمل غير معايا
نبرة الحزن ف كلامك
صرخه بتفتت حشايا
فيها بسمع صوتك الصارخ بيقول
انى راجل
القى ضعفى وانتظر تانى المثول
فى رحابك
لسه برضه عندى قوه
إنى استحمل عذابك
***

ها ايه رايكم بس بشرط يكون منطقى

سلاااااااااااااااااااام

[رشا عبد الرازق]

الله الله

دكتور جمال

واستاذ سعيد


ممممممممممممممممممممم

لا لا كده الحرب فعلا هتبقى قوية والرد عايز مخمخمه


انا حذرتكم

وقد أعذر من أنذر


تابعونا والنمصر او النصر باذن الله عشان بس ناخد الاجر والثواب